+16 °С
Облачно
Увер
31 Декабря 2020, 21:00
30 ий шагал огыл
15 февральыште Мишкан районышто Совет войскам Афганистан гыч лукмылан 30 ий темме лўмеш ятыр мероприятий эртен
30 ий шагал огыл
Ондак воин-интернационалист-влак лӱмеш памятник ончылно торжественный митинг эртен. Митингыште афган сарын ветеранже-влакым кугу событий дене Мишкан район МР администраций вуйлатыше Р. Мусин саламлен.
Район вуйлатыше афган сар Кугу Отечественный сар ден кок гана кужурак жап шуйнымым, ты жапыште шагал огыл ойгым, но тыгодымак кугешнашат ятыр амалым кондымыж нерген ойлен. Вет совет салтак – воин-интернационалист-влак тушто лӱддымӧ сарзе
семын кредалыныт.
Тылеч вара мутым Мишкан да Бурай районласе военный комиссар С. Васильев налын. Тудо мемнан воин-интернационалистна-влак элна да калыкна ончылно порысыштым тичмаш шуктымыштым палемден.
Районысо афганец-влак ушем председатель В. Фатхинуровынат салам шомакше шокшо лийын. Венер Фанилевич тиде дата воин-интернационалист-влакым ик ешышке ушен шогымо нерген каласен. Тылеч вара чыланат памятник воктеке пеледыш аршашым пыштеныт.
Митинг деч вара торжественный мероприятий районысо Культура дворецыш куснен. Тушто «Закаленные Афганистаном» книга презентаций эртен. Тиде мероприятийым салам шомак дене район администраций вуйлатышын социальный йодыш-влак шотышто заместительже Л. Александрова почын. Тылеч вара мутым район администрацийын молодежь дене паша шотышто тӱҥ специалистше О. Биктубаевалан пуымо. Тудын кӱшнӧ палемдыме – Афган сарыште кредалше землякна-влак нерген книгам лукмаште надырже кугу.
Афганец-влакым тиде кечын тыгак КПРФ партийын верысе отделенийже вуйлатыше В. Князев, районысо ветеран-влак советын
председательже Ю. Балахнина, районысо афганец-влак ушемын председательже В. Фатхинуров, 2 №-ан Мишкан кыдалаш школышто 10 классыште тунемше, самырык армийын членже И. Саетгареев да моло саламленыт. У, типографский свежа чия дене ӱпшалтше «Закаленные Афганистаном» книгам тиде кечын чыла афганецлан, мемнан кокла гыч уже каеныт гын, нунын родо-шочшыштлан, книгам лукташ полшышо, спонсор-влаклан, район администрацийлан, депутат корпуслан пєлеклыме.
Торжественный мероприятий-влак нерген рашрак информацийым район администрацийын сайтыштыже муаш лиеш.
Вениамин КОНДОГИН.
