Тамык ден Узьмак

Тамык ден Узьмак

Ик поро еҥ Юмо дене мутланымыж годым йодеш:

-О, Поро Кугу Юмо, мый палынем ыле, мо тугай Тамык да мо тугай Узьмак?

Юмо тудым кок омса воктеке намия, ик омсажым почеш да поро еҥым пӧлемыш пурта. Пєлемыште пеш кугу йыргешке ӱстел шога, а покшелныже кугу под шинча. Под тич моткоч тамле кочкыш, поро еҥын эсогыл шӱвылвӱдшат йоген кая.

Ӱстел йыр шинчыше еҥ-влак моткоч черле да шужен ярныше улыт. Кажныжын кидыштыже моткоч кужу вурган калак уло. Калак мучаш кидеш пидын шындалтын. Тиде калак дене нуно под гыч кочкышым коштал налын кертыт, а калак вурго пеш кужу улмылан умшаш конден огыт керт.

Поро еҥ нуным чаманен, ӧрын онча.

Юмо тудлан каласа: «Тый кызыт Тамыкым ужыч».

Юмо ден поро еҥ вес омсашке пурат. Туштат тугаяк сӱрет: кугу йыргешке ӱстел, тугаяк под, тугаяк тамле пуш. Ӱстел йыр шинчыше еҥ-влакын кидыштышт тугаяк кужу вурган калак-влак, калак мучаш тугак кидеш кылдалтын. Но нуно чыланат темше улыт да икте-весышт коклаште ласкан кутырен шинчат.

Поро еҥ Юмылан каласа: «Мый нимомат ом умыло».

- А тыште умылышашыжат уке, - вашешта Юмо, - нине еҥ-влак икте-весыштым пукшаш тунемыныт. А вес пӧлемыште кажныже шкеж нерген гына шона. Тамык ден Узьмак ик семынак ышталтыныт. Ойыртемже мемнан кӧргыштына ила.

В.Абукаев.