Нӧлпӧ вуян, чонан курчак

Нӧлпӧ вуян, чонан курчак

Мыскара

Ик кечын вич ияш Алена ӱдырем дене кевытыш каяш лекна. Тореш урем Йыванмыт тураш шумеке, ҥдырем кидшым Йыванын окнашкыже шуэн, кычкырале:

- Ачай, ончо, могай мотор курчак шога!

- Кушто? - ӱдыремын кид шуйымо велышкыла ончальым. Чынак, Йыванын окнаштыже пеш мотор курчак шога. Ӱпшӧ саре-саре, чылт нӧлпӧ вуй.

Тиде жапыште курчакат пуйто мемнам ужылалтыш, «Салам!» маншыла кидшым нӧлталят, уэш шыпланен шогале.

- Ачай, курчакше чонан. Мыламат тыгай курчакым налын пу? - яча ӱдырем.

- Йӧра, - манам, - налын пуэм.

Тиде жапыште уремыш лачак Йыван лектын шогале.

- Йыван, - манам, - тиде курчакым кушечын налынат?

- Могай курчакым? - Йыван ӧрын шогале.

- Нӧлпӧ вуян, чонан курчакым. Тевыс, окнаште шогышетым?

Лач ты пагытыште Йыванын ватыже «Ида ончо, шинчада возеш», маншыла, курчакшым окна ончычшо нумал кайыш.

- А-а, - шыргыжале Йыван. - Эрдене шкенан кевыт гычак налын тольым.

- Ӱдырем, - ойлем Аленалан. - Тый мӧҥгӧ курж, а мый тыланет тыгаяк чонан курчакым налын толам, - ӱдырем савыртен колтышымат, шкеже писын кевытыш ошкыльым.

Пиалешем, кевытыште еҥ шуко огыл ыле. Ик шоҥго кува налшашыжым налят, лектын кайыш.

- А тыланет мом пуаш? Ошым але йошкаргым? - сатучо ӱдыр шыргыжеш.

- Мыланем, - манам, - ошат ок кӱл, йошкаргат ок кӱл! А курчак кӱлеш.

- Пожалуйста, могай кӱлеш, тугайжым ойырен нал, - тунамак ончыкем иктаж лу курчакым конден пыштыш.

- Уке, мыланем тыгай курчак огыл, а нӧлпӧ вуян, чонан курчак кӱлеш, - манам.

- Могай, могай? - сатучо ӱдыр ӧрын шога.

- Нӧлпӧ вуян, чонан курчак кӱлеш...

- Япык, - тыгодым кевытыш толын пурышо Йыванын пошкудыжо, Аптык, шыргыжалын йодо: - А нӧлпӧ вуян, чонан курчакшым кушто ужынат?

- Кузе кушто? Йыванын окнаштыже шога ыле. Эше мемнам ужын, салам маншыла, кидшымат тарватыш.

- Ха-ха-ха, - воштыл колтыш Аптык. - Нӧлпӧ вуян, чонан курчакым налнет гын, ватетым ик йӱдлан Йыван деке намиен кодо, вара индеш тылзе гыч тыйынат тыгаяк нӧлпӧ вуян, чонан курчакет лиеш.

Валерий АБУКАЕВ.