Келшымаш
-1 °С
Облачно
Все новости
Культура
23 Ӱярня , 10:57

«Саскавий-2021»

Мишкан районышто Саскавийым сайленыт

«Саскавий-2021»
Мишкан районышто Саскавийым сайленыт
Конкурс тений уэмдыме Марий историй да тўвыра рўдерыште эртен. Творческий таҥасымашке кандаш ўдыр ушнен. Нуно Мишкан, Калтаса да Краснокам районласе тўрлӧ ялла гычын лийыныт. Нунын дене палдарыде ок лий: Яна Абдулина (Тымбай ял), Виолетта Айбердина (Краснокам район, Пура ял), Надежда Акмурзина (Кемий ял), Нина Измариева (Калтаса район, Ӱлыл Качмаш ял), Мария Ишалина (Чорай ял), Анастасия Миксонова (Пӧкленде ял), Лилия Салиева (Кўшыл Шогертен ял), Анастасия Ялкаева (Мишкан).
«Саскавий-2021» лўм верч кучедалше ўдыр-влак марий йылмым сайын палышаш, шке койыш-шоктышыштым да усталыкыштым почын ончыктышаш лийыныт. Конкурс вич текшырымаш гыч шоген. Икымшыже кидпаша конкурс лийын. Тушто ўдыр-влак шке але лишыл еҥышт полшымо дене ыштыме пашашт дене палдареныт, выставкысе ўзгар-влакым кузе ыштымым умылтареныт. Конкурсантка-влак тўрлӧ кидпашалан моткоч уста улыт улмаш – выставкым тўрлӧ мотор тувыр, такия-шога, солык, шовыч да моло арвер сӧрастареныт.
Кидпашаштым аклымеке, чыланат актовый залыште погыненыт, а ўдыр-влак сценышке лектыныт. Пайрем вўдышӧ Алексей Ибулаев ондак конкурсантка-влак дене палдарен, вара чылаштымат шеревам кучаш ўжын. Тидым ышташ Мишкан районын символжо – Маска кугыза полшен.
Шеревам кучымеке, ўдыр-влак шкенышт дене палдареныт, тидым тўрлӧ йӧн дене ыштеныт.
Творческий конкурсышто нунылан иктаж усталыкыштым ончыкташ кўлын. Тыште ўдыр-влак муреныт, куштеныт, почеламутым лудыныт... Анастасия Ялкаева Вячеслав Абукаев-Эмгакын «Ава шўм» произведенийже гыч ужашыжым устан да сылнан лудын. Эше палемден кодыде ок лий - ўдыр-влак, чылан манаш лиеш, кажне конкурсышко посна тувырым чиен лектыныт: ожсым, кызытсе жапысым...
Умбакыже «Тўрлӧ ситуаций гыч лекташ йӧным му» манылтын. Тыште ўдыр-влаклан чолгалыкым ончыкташ – оҥай йодышлан пўсӧ вашмутым пуаш кўлын. Конкурсышто эн шуко баллым Надежда Акмурзина ден Анастасия Ялкаева погеныт. Нуно кеч-могай ситуаций гычын лекташ йӧным муын кертмыштым рашемденыт.
Мучашлан ўдыр-влаклан жюрим тўрлӧ марий кочкыш дене ӧрыктараш кўлын. Тыште чыланат тамле деч тамле кочкышым ямдыленыт: мелнам, тыглай когыльым, тувыртыш, поҥго когыльым, перемечым, пўкштушым, пуштым, мотор да тамле марий тортым... Тутло сий жюри шичыме ўстелышке пыкше гына шыҥен.
Конкурс-влак деч вара жюри каҥашаш каен. Ты жапыште ончышо-влакым шкеныштын выступленийышт дене «Калейдоскоп» куштышо коллектив, мурызо-влак Олесия Мустафина, Алексей Ибулаев куандареныт. А. Ибулаев кум мурым йоҥгалтарен. Тудым колыштын, ончышо-влак шинчен чытен кертын огытыл да кушташ лектыныт.
Ик жап гыч жюри пӧртылын да ўдыр-влакым уэшын сценышке ўжмӧ. Тушкак жюри председатель Радион Плотников кўзен да конкурсантка-влакым палемдымаш церемоний тўҥалын.
Ныл ўдырым посна номинацийлаште палемдыме: Лилия Салиева «Яндар йўкан» номинацийыште ойыртемалтын, Мария Ишалина – «Марий йўлам ончыко шуйышо» номинацийыште, Нина Измариева – «Уста кидмастар» номинацийыште, Надежда Акмурзина – «Эн ныжылге» номинацийыште.
Почетан кумшо верым Тымбай ялын мотор да ныжыл ўдыржӧ Яна Абдулина налын. Кокымшым – Пӧкленде ял гыч Анастасия Миксонова. Икмыше верым жюри чолга да кумылым савырыше Виолетта Айбердиналан пуэн. Тудо конкурсышто мурашат сылнын мурен, кушташат ямлын куштен. А «Саскавий-2021» лўмым Мишкан села гыч Анастасия Ялкаева сулен налын.
Гран-прим налше А. Ялкаева шкеже Кульчубай ял гычын улеш. Салаевмыт шуко икшыван ешыште шочын-кушкын. 9 класс марте шочмо ялыштыже тунемын, 10-11 класслам – Чорай ялысе марий гимназийыште. Школым шӧртньӧ медаль дене пытарен. Высший образованийым Уфа олаште налын – Башкортостан Республик Вуйлатыше пеленсе башкирский государственный служба да управлений академийым йошкар диплом дене пытарен. Марлан полиций пашаеҥ Дмитрий Яметовлан лектын. Самырык еш Мишкан селаште ила. А. Ялкаева районысо Культура дворецышке пашам ышта, ондак кадровик лийын, кызыт информационно-аналитический паша шотышто вўдышӧ методист улеш. Яра жапыштыже «Триумф» ФОК-ышто йога дене кружокым намия.
- Мыйын шонымаште, кажне айдеме шочмо калыкшын культурыжым пагалышаш да историйжым палышаш, - ойла «Саскавий-2021» конкурсышто сеҥыше Анастасия Ялкаева. - Мероприятий кышкарыште, тыгак илышыште, мый шочмо культурым вияҥдаш, тушко у шўлышым пурташ тыршенам да тыршем. Конкурс мылам моткоч келшен, ме, ўдыр-влак, ончышо-влаклан пайремым пӧлеклаш да марий ўдырамашын моторлыкшым, ныжылгылыкшым, усталыкшым, кумылым савырен моштымыжым почын ончыкташ тыршенна. Ончышо-влаклан совым рўж кырымыштлан, жюрилан мыйын выступлениемым кўкшын аклымыжлан чон гыч лекше тау мутым ойлем.
Светлана ТОЙМУРЗИНА.