Поэзий кечым палемденыт

Краеведческий библиотекыште поэзийын тўнямбал кечыже вашеш верысе самодеятельный поэт-влак дене вашлиймаш эртен. Поэзийын тўнямбал кечыже кажне ийын 21 мартыште палемдалтеш. Тудым палемдыме нерген ЮНЕСКО тўнямбал организаций 1999 ийыште увертарен.

Касым марий-влакым обслуживатлыше секторын тўҥ библиографше И. Айбердина ден марий историй да культура рўдерын тўҥ специалистше А. Ибулаев вўденыт. Вўдышӧ-влак ты пайремын шочмо историйже дене палдареныт. Варажым секторын библиотекарьже-влак самодеятельный поэтесса С. Салиевам шочмо кечыж дене саламленыт. Тудо шке творчествыж дене палдарен, у почеламутшо-влакым лудын.

Касын кокымшо ужашыштыже ныл у книган презентацийжым эртарыме.

Г. Баширова «Чон ўжеш муралташ» у сборникше дене палдарен. Каласен кодаш кўлеш, Галина Ялкаевна кок ий ончыч тыгаяк лўман икымше почеламут да муро-влак сборникым луктын ыле. Тудо шке выступленийыштыже кумшо книгам ямдылаш тўҥалмыж нерген ойлен.

1968-1972 ийлаште «Дружба» районный газетын тўҥ редакторжылан У Эшым ялын эргыже Николай Яметов ыштен. Тудо уста журналист гына огыл, тыгак талантан поэт лийын. Но 1972 ийыште шучко аварийыште ўмыржє лугыч лийын. Тудын пеш шуко возымыжо кодын. Пел курым жап эртымеке, Николайын шочшыжо-влак возымыжын ик ужашыжым посна книга дене савыктен луктыныт. Поэт да журналистын «Уэш мый тольым…» книган шочмыжо, тушко пурышо произведений-влак нерген Николай Камалтдиновичын шўжарже Елена Шумаева палдарен.

Районыштына «Восточные марийцы. Философия, история, люди» книган авторжо Семен Новиковым (ЭрВел Семеным) палыдыме еҥже уке, очыни. Тиде жап марте ме Семен Сергеевичын ты книган куд томжо дене палыме лийынна гын, кызыт тудо шымше томым савыктен луктын. Марий историй да культура рўдерын тўҥ специалистше Алексей Ибулаев книган авторжо да тудын у книгаже дене палдарен. Автор шкежат выступатлен.

Уста поэт, композитор, мурызо да семўзгар-влак дене шоктышо Виктор Яшпаевич Миндияров 2012 ийыште 68 ияш улмыж годым ош тўня дене чеверласен. Илымыж годым возымыжым чумырен, посна книгам лукташ шонен. Но пўрымаш туддеке ала-молан тупела савырнен. Шонымыжым илышыш пуртен кертын огыл. Тудын творчествыжым аклыше-влак, поснак «Марий Эл» газетын тўҥ редакторжо Александр Абдуловын тыршымыжлан кєра 2020 ийыште В. Миндияровын «Шулдыран оҥгыр» книгаже ош тўням ужын. Вик каласен кодена, книга кўжгӧ, 287 страницан. «Келшымаш» газетын (автор илымыж годым ты газетын эн чўчкыдӧ унаже лийын) пашаеҥже-влак В. Камилянов ден В. Абукаев ты книга, тудын авторжо нерген ойленыт.

Поэзий касым «МуроЭм» вокальный ансамбль Галина Баширован мурыжо-влак дене сӧрастарен.

Библиотека пашаеҥ-влак «Время творить» книга выставкым ямдыленыт. Тушко районышто шочын-кушшо поэт-влакын книгашт-влакым вераҥдыме.

О. ЗАЙНИТДИНОВА.