Шошо пайрем

Шошо пайрем

Шукерте огыл Нерге ялыште Тўнямбалсе ўдырамаш кечылан лўмлалтше пайрем эртаралте. Тиде пайремыш ўдырамаш-влак чылан мотор тувырым чиен, чевер ялукым пидын, тамле кӧстенечым кучен толыныт. «Кидпаша конкурсышто» ме кувавана, кокана, акана-влакын усталыкыштым ончаш погынышна. Нунын пашаштым посна фотовитриныш вераҥденна. Моткоч уста кидпашазе, пўсӧ шинчан да лывырге кидан улмыштым ме лач тыгай выставке гоч пален нална.

Пайрем касым салам шомак дене Светлана Каншаева почын. Саламлымашке тыгак верысе тўҥалтыш ветеран организацийын председательже М. Гареева ушнен. Нуно погынышо-влакым Тўнямбалсе ўдырамаш пайрем дене саламленыт да ончыкыжым эшеат сылнырак кидпашам ышташ тыланеныт. Салам шомак деч вара С. Каншаева верысе уста кидпашазе-влак дене палдарен.

М. Гареева конкурсышко крючок дене пидме салфетка-влакым, име кўпчыкым, пўкен леведышым, тапочке-влакым ончыктен, погынышо-влаклан крючок дене пидаш кушто да кунам тунеммыж нерген каласкален.

Д. Александрова куваважын шондыкшо гыч 120 ияш кез тувыржым (ожнак ургымо) конден, кузе ожно кид дене тувырым ургымо нерген палдарен. Ме тиде тувырым чыланат, кидыш налын, кӧранен ончышна. Ожсо уста-влак кид дене машина дене ургымыла ургеныт. Д. Александрова тыгак аппликаций йӧн дене тўрлымӧ марла тувырым конден. Тыгай тувыр-влакым сєрастарыме йӧн дене палдарен, чыла раш умылтарен. Икманаш, ойлымыжым алал кумылын колыштынна.

Л. Иванаева крючок дене пидме чылдар-влакым конден, тўрлӧ оҥай тўран (пеледыш ате, салфетке) тўр-влакым ончыктен. Нуным кунам да кузе пидмыж нерген ойлен.

О. Ишпахтина выставкыш сылне тўран ончылак-влакым ямдылен. Тудо моткоч уста тўрлызӧ улеш. Погынышо-влаклан чевер пеледыш-влакым кузе тўрлымыжӧ нерген умылтарен.

Кидпашазе-влакын пашашт дене палыме лийме деч вара изирак концерт эртен. Концертыште С. Каншаева пайремыш толшо ўдырамаш-влаклан «Аваем» мурым пӧлеклен, а С. Яникеева «Ава» почеламутым лудын. З. Захарова йӧратыме «Сарман» мурыжым мурен.

Погынышо-влаклан пайрем моткоч келшен. Вет пайремыште ўдырамаш-влакым сылне сем да мурыж дене тыгак Ю. Иликаев куандарен. Тудо чылаштымат мурыктен да куштыктен. Икманаш, мурыде да куштыде нигӧ кодын огыл. «Ӱжара» ансамбльнат «Ава-ачам ида мондо» мурым йоҥгалтарен.

Конкурсышко кидпашаштым кондышо-влаклан изи пӧлекым пӧлекленна. Мучашлан чыланат пырля возалтынна.

Пайрем чай йўмаш дене мучашлалтын.

М. ГАРЕЕВА, Нерге ялысе тўҥалтыш ветеран-влак организацийын председательже.