Келшымаш
+3 °С
Облачно
Все новости
Культура
12 Ӱярня , 12:34

«Ӱярня» уна-влакым чумырен

Мишканыште «Ӱярня» пайремлан лўмлалтше финн-угор калык-влакын II региональный фестивальышт эртен

«Ӱярня» уна-влакым чумырен
Тений ты пайремыш Благовещенск ола, Пўрӧ, Илиш, Калтаса, Нуриман, Шаран, Мишкан районла гыч чылаже 11 творческий коллектив толын.
Шуматкечын эрденак районысо Культура дворец воктенсе площадьыште пайрем шўлыш озаланен. То ик вере, то вес вере тальянка, тўмыр сем почеш пайрем вургеман еҥ-влак сылне мурым йоҥгалтареныт. Пайрем ўстел-влакым сӧрастареныт…
«Ӱярня» пайремыш толшо-влакым район администраций вуйлатыше П. Трапезников, Башкортостан Республикысе
Калык-влак келшымаш пӧртын директоржо И. Султанмуратов, «Эрвел марий» региональный марий национально-культурный автономийын председательже В. Ялаев саламленыт.
Варажым творческий коллектив-влак шке шотан парад дене эртеныт. Погынышо-влак поснак «Ӱярня - 2020» финн-угор калык-влакын I региональный фестивальыште сеҥыше Нуриман районысо «Кугу Шеде» этнокультурный рўдерын коллектившым шокшын вашлийыныт.
Мемнан районын чапшым тиде гана кум вокальный ансамбль - «Ныжыл сем» (Кўрзе ял), «Эр кече» (Йылыш ял), «Нурпеледыш» (Кемий ял) да Козаш ялысе «Пўрӧ сем» вокальный коллектив араленыт. Пайремыш толшо кажне коллектив концерт номерым, калык модышым, пайрем ўстелым ямдылен. Пайрем пеш сӧралын эртен. «Пўкен налын», «Агытан кучедалмаш», «Салмавондо», «Пар кычалын модмаш», «Ведрам кырымаш», «Колым кучымаш» да моло модмашлаште еҥ-влак изижат-кугужат чолгалыкым ончыктеныт.
Модмаш да таҥасымаш-влак эртыме жапыштак то ик вере, то вес вере уна да ончаш толшо-влак «кандырам» пуненыт.
Кажне ўстелыште шокшо самовар, мелна, тувыртыш да моло сий-влак эн покшелне верланеныт. Чыла тидыже Мишкан
кундемыш «Ӱярня» пайрем толмым шижтарен. Тиде жапыштак юзо коҥга ден оҥгыран имне урем мучко йоча-влакым кондыштареныт.
Жюри шке пашажым иктешлыме жапыште мурызо Светлана Каншаева, «Ныжыл сем», «Эр кече» ансамбль-влак шке выступленийышт дене еҥ-влакым куандареныт.
Жюрин иктешлымыж почеш результат-влак тыгай лийыныт: кумшо верым «Ош пеледыш» (Шаран район) ден «Ош Виче сем» (Илиш район) коллектив-влак налыныт. Кокымшо верыш «Кугу Шеде» (Нуриман район) ден «Оҥгыр йўк» (Благовещенск ола) лектыныт.
«Ӱярня - 2021» финн-угор калык-влакын II региональный фестивальыште сеҥышыш Кўрзе культура пӧртын «Ныжыл сем»
вокальный ансамбльже лектын. «Ӱярня» пайремыште райцентрысе организаций ден предприятий-влак шке пайрем
ўстелыштым погеныт да куштыракувам ямдыленыт. Куштыракува-влак иктыж деч весыже моторрак лийыныт. Мелна
конкурсышто «Солнышко» ден «Василек» йоча сад-влак ойыртемалтыныт. Нунынак куштыракувашт моло-влакын деч чот ойыртемалтыныт.
Пытартышлан куштыра кувам йўлатеныт. Ожсекак марий-влак ты пайремым ыштымышт годым сурт гыч теле гоч погынышо
куштырам уремыш луктын йўлатеныт. Тек тиде куштыра чыла осалым, черым илышна гыч йўлатен колта!
Светлана ТОЙМУРЗИНА.