Еҥым онченыт да шкеныштым ончыктеныт

Еҥым онченыт да шкеныштым ончыктеныт

Тиде фестивальышке «Ӱжара» мурышо калык ансамбльын коллективше дене пырля Мишкан РДК-н пашаеҥже-влак – Равия Саматова, Марина Минилбаева, Станислав Салиев да Надежда Кошиева миеныт. Мероприятий Уфа оласе «Торатау» амфитеатрыште эртен.

Мишкан районын делегацийже пайремыште эн йомартле да чолга лийын. Юрий Иликаев устан гармоньым шоктен, моло-влак чыланат чулымын «кандырам пуненыт» - тывырдатен куштеныт. Делегацийна йыр моло делегаций-влакат чумыргеныт. Кӧ-дыр куштымым телефоныш возен, кӧ-дыр шкат «кандырам пунаш» ушнен, молышт шыргыжын онченыт.

Амфитеатр кӧргыштӧ калык вургемым чийыше еҥ-влак тич погыненыт. Мотор деч мотор вургем-влакым ончен шинча шаланен, манаш лиеш. Калык-влак тӱрлӧ лийыныт гынат, пайремыште алал кумыл озаланен.

Пайрем мучаште чыланат – рушыжат, марийжат, чувашыжат, татаржат, одыжат, пошкыртшат – кугу хороводышто пырля куштеныт.

«Евразийын шӱмжӧ» фестиваль уло калыкым моторлыкшо, сылнылыкше, алал кумылжо да йомартле шӱлышыж дене ӧрыктарен. А концерт программа шуматкечынат шуйнен. Икманаш, пайрем калыкын кумылжым чынжымак нӧлталын.

Н. КОШИЕВА, РДК-н художественный вуйлатышыже.