Калык календарь 13-19 апрель

Калык календарь 13-19 апрель

13 апрель – Албаста коштмо кече. Тиде кечын ялла мучко албаста коштеш да малыше еҥ-влакым пикта. Пиктен ынже керт манын, каза парням тарватыман. Но коклан тидым ышташ моткоч неле, вет албаста лишеммеке, айдемын могыржо тӱҥеш.

Шӱкшондал кӧрвеч гыч лекме кече. Калык ой почеш, тиде кечын кӧрвеч гыч шӱкшондал лектеш. Кӧ тудын кум ӱпшым кӱрлеш, чыла тӱрлӧ погым йодын кертеш. Но тыште иктым мондыман огыл – уда чонан улат гын, погыжо кум кече гыч кумыжыш савырна, а ӱпшым кӱрлын от керт гын, нелын сусырта. Шӱкшондал лекме деч ончыч, йыгыжге ӱпш лектеш маныт. Кугезына-влак, очыни, тудет кумыж вуян кишке сыным налын кертмылан ӱшаненыт. Вет тудет пӧртыш пура гын, виклан йыгыжке ӱпш шарла, а вуйжо кумыжым ушештара. Икманаш, кучен кертат гын, кидыштет «кумыж» кодеш.

Шӱкым йӱлатыме кече.

14 апрель – Вӱд нӧлталалтме кече. Тиде кечын эҥерлаште вӱд нӧлталалтеш да ий тарвана. Южо вере кудыводыж лач тиде кечын кынелеш маныт. Амалже раш: 14 апрель - Юлиан календарь почеш 1 апрель лиеш. А теве гына кынелше кудыводыж, удан мален гын, чӱчкыдын изи осалым ышта. 12, 13 апрельыште туманлымыжат лач мален кынелмыж дене кылдалтын.

Вӱд тиде кечын ташла гын, шудо ума. Ий эҥер серыште кодеш гын, идалык неле лиеш.

15 апрель – Вӱд ташлыме кече.

Сузо-влак кӱдырлаш тӱҥалме кече.

14 апрель гыч 15 апрельышке йӱдым вӱд нӧлталалтеш да ташла гын, шудо ума. Карш кычкыра гын, кеҥеж лектышлан поян лиеш; карш деч ончыч пулдырчо кычкыра гын – шурно ден шудо умат. Ий вӱд йымаке пурен кая гын, идалык неле лиеш.

16 апрель – Вӱд Он кынелме – вӱд ташлыме кече. Ме уже возышна: ик ой почеш, Вӱд Он 3 апрельыште кынелеш. Тыгай лугалтмаш Юлиан календарь гыч Григориан календарьыш куснымо годым шочын. Чын лияш гын, калык ой почеш, Вӱд Он эҥер-влак почылтмеке да ий тарванымеке кынелеш. Тугеже, кунам кынелмыже, утларак игече деч шога.

Тиде кечын йӱр йӱреш гын, шошо йӱштӧ да ночко лиеш. Йӱдвел мардеж пуа гын, вашке йӱр йӱреш.

17 апрель – Турням жаплыме кече. Тиде кечын турня-влак дечын шокшым вашкерак кондаш йодман. Южо еҥ ойлымо почеш, чын шошым вараксим огыл, а турня конда.

Нӧлпӧ пеледме кече.

Нӧлпын кӧржшӧ шуко гын, уржа ума, нєшмыжє шуко гын – шож. Куэ нӧлпӧ деч ончыч лышташым колта гын, кеҥеж кукшо лиеш, нӧлпӧ ончычрак гын – ночко.

18 апрель – Мардеж Он ден Мардеж Авам жаплыме кече. Тиде кечын шокшо мардеж пуаш тӱҥалеш. Тидлан кӧра пӧртыштӧ окнам почман да Мардеж Он ден Мардеж Ава деч осал шӱлышым поктен лукташ йодман.

Шудошырчык-влак помыжалтме кече.

19 апрель – Мланде Авам жаплыме кече. Тиде кечын пасушко лекман да Мланде Ава деч йытыным сайын кушташ йодман.

Игече тымык да умыр гын, икияш ума.