3 сес/октябрь – Мардеж кече.

3 сес/октябрь – Мардеж кече. Тиде кечын Мардеж Он ден Мардеж Авам жаплыман да мардеж кушеч пуымым эскерыман.

Вакшоза кече. Тиде кече вакшыште ыштыше-влакын кечыштлан шотлалтеш. Поснак – мардеж вакш оза-влакын. Вет Мардеж кечын эре виян мардеж пуа.

Вакш-влак дене тӱрлӧ манеш-манеш кылдалтын. Вакшоза-влак юзо виянлан - тӱрлӧ вий да екысуко-влак дене кылым кучен моштышылан шотлалтыныт. Калык ой почеш, вакш оза деке Вӱд Он ден Мардеж Он унала коштыт, вӱдӱдыр-влак вакш орва гыч йогышо вӱд йымалне вуйшытым мушкыт. Тошто вакш гын, поснак – вӱд вакш, тӱрлӧ екысуко-влакын пыжашыштлан шотлалтын. Амалже раш, вӱд вакш мланде ден вӱд коклаште верланен. А вӱд вес тӱнялан шотлалтеш, тудын дечын мландым сер серлага (арала). Вӱд вакш тиде серлагышым пудырта – вӱд ден мланде кокласе кӱвар улеш. Сандене тушто тӱрлӧ шырт-влак (чон-влак) верланат.

Мардеж йӱдвелчын пуа гын, йӱштӧ лиеш, кечывалвелчын пуа гын – леве, касвелчын – йӱр йӱреш, эрвелчын – ояр. Кож пӱгыльмо ӱлнӧ шукырак кушкеш гын, йӱштӧ вашке толеш, кӱшнӧ кушкеш гын – йӱштӧ теле мучаште лиеш.

Игече леве шога да эҥыремышвот шуко гын, шыже чевер лиеш да лум вашке ок воч. Кечывалвелчын пуышо мардеж сай лектышым сӧра.

3 октября - День ветров. В этот день нужно почтить богов ветра.

День мельника. У хозяев ветряных мельниц праздник двойной.

Если ветер северный - будет холодно, если южный - тепло, западный - будут дожди, восточный - будет ясно. Если сосоновых шишек больше внизу дерева - холода придут скоро, если наверху больше - поздно.

Если тепло и паутины много, осень будет ясной и снег выпадет не скоро. Южный ветер обещает хороший урожай.