29 август – Кинде Илян (Пӱкш Илян).

29 август – Кинде Илян (Пӱкш Илян). Южо вере лач тиде кечын у киндым кочкыныт. Тиде кече деч вара кокияшым ӱдаш тӱҥалман.

Тиде кечын тыгак у вынемым юлыман, памаш-влакым эрыктыман. Тугеже Йомшеҥерымат жаплыман. Вет лектыш лач тудет деч кугун шога – айдемым мланде пашам ышташ лач тудо туныктен. Йомшеҥер Перке Юмылан лишыл улеш, перкем лач тудо пуа манашат лиеш. Но тудо уло чонан ден чыла тӱрлӧ кушкылым эскера, а Перке Юмо – айдемылан пайдале кушкыл-влакым. Сандене калык сай лектышым утларакшым Перке Юмо (айдеме тукымлан перкем пуышо юмо) деч йодын.

Пӱкшым погаш тӱҥалме кече – тиде кечылан пӱкш шуэш.

Кайык-влакым эскерыме кече. Тиде кечын кечывалвелке вараксим-влакын пытартыш ужашыже чоҥештен кая. Шокшо элышке турня-влакат тарванат гын, Мланде кылмыме кечылан (Угинде пайрем) йӱштӧ толеш.