17 сес/октябрь - Таргылтыш кече.

17 сес/октябрь - Таргылтыш кече. Калык ой почеш, тиде кечын чодыраште таргылтыш-влак (Пошкырт марий-влак нуным «шӱрале» маныт) орадыланат: кычкырлат, оҥырешлат, совыштым кырат да моло шучко йӱкым луктыт. Йӱдым гын эшеат чот толашат – чыте веле. Амалже тыгай: нуно мландӱмбалне пытартыш кече коштыт улмаш, эрдене, агытан йӱкым колмеке, чыланат мланде йымаке пурен каят. Сандене пытартыш кечын шкаланышт кугу пайремым ыштат. Тиде кечын еҥ-влаклан чодыраш кошташ лӱдыкшӧ – таргылтыш-влак кидышке логалат гын, вуй деч посна кодаш лиеш... Такшым тиде кечын чодыраште коштшо еҥын вуйжо уло манашат ок лий.

Калык коклаште чодыра ужеш да нур колеш манын ойлат. Раш лияш гын, тиде Чодыра Он, Чодыра Ава да таргылтыш-влак чыла колыт да ужыт. Чодыра Он ден Чодыра Ава тӱрлӧ кайык-янлык да айдеме сыным налын кертыт. Но еҥ-влаклан пеш шуэн кончат, айдеме ваштареш утларакшым нунын полышкалышышт – таргылтыш-влак лектыт. А нунын ончылныштат, шеҥгелныштат мардеж коштеш, сандене кышаштым нигӧ ужын ок керт.

Таргылтыш кече гыч йӱштӧ вийым налеш. Тиде кечын теле ужгажым чия.

17 октября - День Лешего. По народной молве, в этот день в лесу бесчинствуют лешие. Особенно - ночью. Ведь в этот день они в последний раз ходят по земле. Рано утром, услышав крик петухов, уходят под землю. Поэтому ходить по лесу опасно.

Говорят, что лес всё видит и слышит. Если быть вернее, всё слышат Хозяин и Хозяйка - Мать леса. А лешие - их помощники. Лешими становятся души не по обряду похороненных младенцев. Хотя люди часто путают леших и Хозяина леса.

С Дня Лешего мороз набирает силу. В этот день зима одевает шубу.