Тумна ден рывыж

Тумна ден рывыж

Тумна чашка вуеш пыжашым ышта. Кум игым луктеш. Тушко рывыж толеш.

Тумна, тум-тум!

Ик игетым кудалте, тум-тум!

Кӱзенат кочкам, тум-тум!

Воленат кочкам, тум-тум!

Руэнат кочкам, тум-тум!

Ик игетым кудалте, тум-тум!

Тумна шортеш-шортеш, ик игыжым кудалта. Рывыж ер воктен наҥгаят, кочкеш.

Эр лиеш, адак рывыж толеш тумна деке:

Тумна тум-тум!

Ик игетым кудалте, тум-тум!

Кӱзенат кочкам, тум-тум!..

Тумна шортеш-шортеш, кудалта. Рывыж налын каят, ер воктене возешат, кочкеш. Тумна мӱгырен-мӱгырен шинча. Шогертен толеш:

„Молан мӱгырет, тумна?"— манеш шогертен.

„Мом ом мӱгырӧ?— манеш тумна,— рывыж толешат, лӱдыктен-лӱдыктен игем-шамычым кудалташ йодеш". Шогертен манеш:

„Кӱзен кочкаш тошкалтышыже уке, руэн кочкаш товарже уке, молан пукшет игетым рывыжлан?" Шогертен каен колта.

Эр лиеш, рывыж адак толеш:

Тумна, тум-тум!

Ик игетым кудалте, тум-тум!..

Тумнаже манеш: „Молан тыланет игем кудалтем? Кӱзен кочкаш тошкалтышет уке, руэн кочкаш товарет уке, кызытат кок игем ондален кочкыч". Рывыж манеш; „И-и, тыге шогертен гына каласен кертын!" Манешат, кая. Кая-кая, ер воктен возеш, колышын койын кия. Шогертен толеш рывыж деке, шогертен манеш:: „Шинча коят коеш, „чыгырдык1", шеҥгел коят коеш, „чыгырдык". Рывыж деке мия шогертен, шинчажым чӱҥгалаш тӧча, рывыж шогертеным кучен кудалта. Рывыжше манеш шогертенлан:

„Молан тумыналан каласышыч?"

„Каласенам гын, мо лийын?"—манеш шогертен. Рывыжше манеш: „Тыйым кырен пуштам". Шогертенже манеш: „Кырет гынат, ом коло, тошкет гынат, ом коло, кум пырче поч пыстылем гыч кучен, шӱшӧ кашкаш лупшалт гын, иже колем". Рывыж кум пырче поч пыстылже гыч кучен, лупшал колта, почшо гыч кум пыстыл лектын возеш да шогертен чоҥештен кая. Рывыжлан кум пыстыл веле кодеш. Шогертен манеш: „Рывыжым ондалышым, рывыжым ондалышым".

Йомак умбак, мый тембак.