+19 °С
Дождь
Калык ойпого
31 Декабря 2020, 21:00
Пӱрӧ велысе тиякат мурымо муро-влак
Юрьё Вихманын возымыж гыч
Пӱрӧ велысе тиякат мурымо муро-влак
1. Эр гына кынелын тӱгӧ лектым -
Юмын ӱдыр вӱдлан волалеш.
Юмын ӱдыр вӱдлан волымо годым
Шемер калык Юмылан кумалеш.
2. Элнан гына уремже кумда урем,
Кок могырышто киялеш шем кишке.
Шем кишкыжын чонжо ай могане,
Мыланна лай тушманже тугане.
3. Аркашан шочшаш тыгыде куэрла
Арам шочын-кушкын арамаш.
Узьмакеш шочын-кушшаш ужар вуем
Арам шочын-кушкын ты тӱняш.
4. Арка гыч икте йӧртын вола,
Салпундыш сайын тайналеш.
Тайналеш гынат, огеш йӧралт:
Ош Юмыжо тудым саклалеш.
5. Йылдыр лай йылдыр вӱд йога,
Вӱд почеш саламым кӧ колта?
Еҥ почеш саламым колтымешкет,
Толын ужын кает гын, мо лиеш?
6. Чоҥеште, комбем, чоҥеште!
Ик йыр савырнет – мӧҥгеш тол!
Шулдыр мучашешет язум серем,
Шочшем деке намиен текшыре!
7. Ош Виче воктен коштмем годым
Сер сӱмырла ман лӱдым.
Ты тӱня ӱмбалне коштмем годым
Еҥ ойлалеш ман мый лӱдым.
8. Кӱкӱжӧ мура, шӱшпык шӱшка –
Молан ямле ты тылзе?
Рвезына годым айват ыльна –
Молан эртен кая рвезе ӱмырна?
9. Йӱксӧ чоҥешта шӱдыр ужын,
Кӱкӧ чоҥешта ер ужын.
Мыйын шочшем пешат мӱндыр –
Ужын ойлена гын иктырет?
10. Кашташке кидым мый шуяльым,
Ужар катат налаш кид ыш шу.
Налаш шонышыжо налде кодшо,
Шойылчынна ончен шортшо.
11. Изи падыраш, ший падыраш,
Савырен ончальым – ший шӧргаш.
Изырак улат, мотор улат,
Шеҥгечынет ончен сугланышым.
12. Ош Вичын келгыжым шинчем гын,
Ом шич ыле мурамеш.
Ты тӱнян нелыжым шинчем гын,
Ом шоч ыле ава леч.
13. Шӱшпык шӱшка, кӱкӧ мура,
Ты тылзе молан эрталеш?
Ты элна ямле, калыкна поро,
Ты ӱмырна молан эрталеш?
14. Шем шинчанемлан таум ыштем
Шем чодырам налын лукмыжлан.
Ош Юмемлан таум ыштем –
Ужар вуйым эсен кондыштеш.
15. Кӱкӧ лай муралеш Ош Виче воктен,
Ошко парчаште «кӱкӱк!» лай манылда.
Ынде шке шочшем кушак ужам?
Ош Виче воктен, Пӱрӧ лай ярмиҥгаш.
16. Йылдыр, йылдыр вӱд йога
Омыж кӱвар йымалчын.
Омыж кӱвар кӱр лиеш,
Тошкен коштмо элна йот лиеш.
17. Мемнанат лай пасуна тӧва пасу,
Вӱдена гын, шурныжо уҥалеш.
Мемнанат лай уремна пешат тӧва,
Модына гын, модышна келшалеш.
