Чучка тынеш ынеж пуро

Чучка тынеш ынеж пуро

Летьке эҥер серысе Булат починга турасе келге вынем-влак чучка годсек кодыныт, манын ойлат еҥ-влак. Вынем лиймым тыге умылтарат. Чучка-влак пуйто тынеш пурыдымо лийыныт, пундышлан кумалыныт да чодраште рок пӧртыштӧ иленыт.

Толын нунын деке Степан угодник да шонен тынеш пурташ тиде калыкым. Но чучка-влак чот кожганеныт, шке вераштым вўд дене мушкын колтымышт шуын огыл. Степан угодник кугыжалан вуйым шийын, а тудыжо шуко сарзым колтен.

Чучка-влак пич чодраш йымен шинчыныт. Но туштат нуным кычал муыныт да виешак вӱдыш поктен пуртеныт. Тыгай намысым чытен кертде, нуно шканышт вынемым кӱнченыт да, ломаш левашым ыштен, тушко пурен шинчыныт, а леваш меҥгыжым руэныт. Леваш волен возын да чылаштымат пызырен пуштын. Тыге чучка-влак чыланат пытеныт, поянлыкыштым пеленыштак тоеныт.

Вятка, Вологда кундемлаште тыгай вынем поснак шуко, да нуно эре тўшкан, шымыт гыч латвизыт марте верештыт. Вынемлаште южгунам кӱртньӧ ӱзгарым, ший оксам да коклан той арверымат муыт.

Тошто марий ой-влак. Книгам лукшо марий книга издательство. Й.-Ола, 1972.