Чойн калпакан овда

Чойн калпакан овда

Ик курык уло Виче воктен. Тушто памаш йоген эрта. Мариемын изаже сонарзе ыле. Пийже лийын Маска лӱман. Ожно тыште йырым-йыр кожла гына лӱшкен шога улмаш. Тушко имньым кӱташ колтеныт. Изанан имньыже кажне эрдене эре пӱжалт толеш. Вара марий смолам пӱрен колтен имне тупеш. Тегытешет оввда иге шижын толеш. Тудым тӱкен огытыл, мӧҥгеш колтеныт.

Адак икана тыге тудо кожлаште коштын. Ала-мом пийже пеш опташ, каньысырланаш тӱҥалын. Пий оптымашкет миен онча - шекаште аза магырен кия, шкеже чылт ший тӱсан, манеш. Сонаразет азам конден мӧҥгыжӧ. Почешыже толеш тудын аваже да ойла: «Йора, - манеш , - нимом ыштен отыл. Уке гын ончыктем ыле». Тыге манын да пеленже нумал наҥгаен. Овдат порым ышта: марийын кудвечышкыже кугу колым конден кода.

Овда кеч-кунамат иктаж-мом ыштен але модын кая.

Икана ӱжара тӱр дене мемнан родына унала каеныт. Корнышто кӱчызӧ кува шогылтын. Нунет пелештыде эртен кудалыныт. Вара чойн калпакан пӧръеҥ тарантасыш шинчеш да ойла: «Опай кугызай, муралтен колто!» Опай кугыза мура. «Ынде тый муралте», - манеш Опай кугыза. Овда шӱшкалтен колта -уло кожла сургалтеш. Вара овда ойла: «Мый каем ынде».

Тудо тарантас гыч волен кодын - тарантас кӱшкӧ нӧлталтын.

Овда коклаште сайжат лийын, маныт. Еҥ-влак нунын деке унала коштыныт, ваш-ваш йӱын-кочкын иленыт. Овдан рок вынемышкыже пурат улмашын. Вынемже пӧрт гаяк койын - сай, ару. Тыге марий-влак пуйто родым кученыт овда дене.