«Таза лий, кочай!»

«Таза лий, кочай!»

Нерге ялыште илыше ик эн пагалыме е‰ Изибаев Геннадий 8 августышто юбилейжым палемда

Тудо 1948 ий 8 августышто Монар ялыште шочын. Мыйын кугезе кувавам Анна Ахмазиевна шкетын кок эргым ончен-куштен. Сар деч

варасе ий-влак неле лийыныт. Кочкашат, чияшат ситен огыл. Сандене мыйын кочам изинекак пашам ышташ тў‰алын. Изаж дене пырля

пуым ямдыленыт, шудым ыштеныт, колхозышто имньым кўтеныт.

Кунам тудлан 7 ий темын, школыш каен. Школышто эре примерный йоча лийын. Тудо шкеже сайын тунемын, школын илышыштыже чолга лийын. Кочам икана ойлен ыле, тў‰алтыш класслаште тунеммыж годымак Робинзон Крузо, Робин Гуд, Петр I, Иван Грозный нерген книгалам чыла лудын пытарен. 8 класс деч вара Благовещенский педагогический училищыш тунемаш пурен. Ту жапыште тиде училище республикыште ик эн виянлан шотлалтын да тушко эн сай тунемше-влакым гына налыныт. Каныш кечылаште йолташыже-влак дене пырля изишак оксам ышташ тыршеныт: шо‰го-влаклан пуым шелыныт, лумым эрыктеныт… Тудын педучилищым тунем пытарымыжлан пел курым эртен гынат, пырля тунемме йолташыже-влак дене кызытат кылым куча: вашлийыт, юбилей-влакым пырля эртарат.

Педучилище деч вара кочам кок ий Совет Армий радамыште служитлен. Служба деч вара Йошкар-Олашке М. Крупская лўмеш Марий государственный педагогический институтыш тунемаш пурен. Кувавам Вера Александровнан мутшо почеш, институтыштыжат кочам гай студент лийын огыл. Тудо комсорг, студенческий отрядын командирже, фотограф, художник-оформитель, бальный куштымаш кружокыш

коштын, а кастене институтын котельныйыштыже кочегарлан пашам ыштен. 5 ий институт пеленсе духовный оркестрыште шоктен.

Кувавам дене студент улмышт годым вашлийыныт. Визымше курс деч вара нуно мужыра‰ыныт да Мишкан районыш толыныт. Паша

корныжым Нерге кыдалаш школышто тў‰алын. Кочамым вигак директорын заместительжылан шогалтеныт, а 1977 ийыште - директорлан. Тиде постышто 30 ий пашам ыштен. Тудын дирктор улмыж годым у школым чо‰еныт. 1997 ийыште школ «Идалыкын школжо» Всероссийский конкурсышто лауреат лийын, а кочамлан «Идалыкын директоржо» лўмым пуэныт.

Кужу жап пашам тыршен ыштымыжлан тудлан БР-ын заслуженный туныктышыжо» почетан лўмым пуымо, «Отличник народного просвещения РСФСР» о‰еш пижыктыме знак дене палемденыт. Кочамым ялыште гына огыл, районыштат пагалат. Ик гана веле огыл

депутатлан сайлалтын. Кужу жап тудо «Чолман» газетын собкоржылан пашам ыштен.

Кувавам дене пырля кум икшывым ончен-куштеныт. Кувавам эре кочамын ўшанле э‰ертышыже лийын. Икшывышт-влаклан чылаштлан кўшыл образованийым пуэныт. Надежда (мыйын авам) 2 №-ан Мишкан кыдалаш школышто пашам ышта, Герман - Йўдвел кундемыште, Юрий - МВД системыште.

Кызыт кочам сулен налме канышыште улеш. Но яра шинчен ок мошто. Тудо сурт сомылым виктара, мўкшым онча, корзина-влакым пидеш.

Кочам таза илыш-йўлам пагала. Кажне кечын, игечын могай улмыжым ончыде, 12 километрым йолын коштеш. Мемнам, уныкаже-влакым, шахмат дене модаш туныктен. Кунам чылан кочам деке чумыргена, шахматный турнирым эртарена.

Таче кочамлан 70 ий темеш. Тиде юбилей пайрем дене тудым шокшын саламлена, пе‰гыде тазалыкым, кужу, пиалан ўмырым тыланена. Тек эре тыгаяк весела, поро кумылан лий. Таза лий, кочай!

Сережа уныкат.