Лермонтовым шарналтеныт

Лермонтовым шарналтеныт

Ирсай кыдалаш школышто тунемше-влак «Библиотекыште Лермонтовын поэзийже кече» VI межрегиональный акцийышке ушненыт.

«Трагический пўрымашан поэт» литературно-музыкальный унагудышко 7 да 10 классыште тунемше-влакым ўжмє. Ялысе библиотекарь А. Айкашева ўдыр-эрге-влакым поэтын йоча жапше, куваваже Е. Арсеньева дене Тархан илемыште илымыж дене палдарен.

Лермонтовын поэзийжылан лўмлалтше «Герой нашего времени» книга-сўрет выставкым ямдылыме. Мероприятийыште М. Лермонтовын произведенийлажым лудмым, «Казачья колыбельная песня», «Парус», «Горные вершины», «Отчего», «Выхожу один я на дорогу» романс-влакым колыштмо, поэтын «Автопортрет», «Парус», «Кавказ нерген шарнымаш» сўретше-влакым ончымо.

М. Лермонтовын талантше шуко шєрынан лийын. Кўчык жапыште тудо Россий мучко уста поэт семын чапланен. Тыгак скрипкым, фортепианом шоктен, сайын мурен да почеламутшо-влаклан семым келыштарен. Лермонтов эше сўретлаш йєратен. Тиде пашалан кид кергалтен пижеш гын, уста художник лиеш ыле.

А. АЙКАШЕВА.