90 ий - шагал огыл

90 ий - шагал огыл

Мемнан районышто кужу ўмыран-влакым саламлымаш поро йўлашке пурен. Римма Никитичнам ты чапле юбилей дене саламлаш район администраций вуйлатышын кадр да социальный йодыш-влак шотышто заместительже Л. Александрова, районысо ветеран-влак Советын председательже Ю. Балахнина толыныт.

Юбилярлан пеледышым, пєлекым да Россий президент деч саламлыме серышым кучыктымо. Президентын серышыштыже тыге возымо: «Уло кумылын юбилейда дене саламлем. Те Кугу Отечественный сар жапым чытен лектында, суапле пашада дене элнан поянлыкшым, куатшым таптенда. Шочмо элым йєратен, чын пашалан ўшанле кодында. Тендан тукымын шуктымо подвиг эре калык чонышто илаш тў‰алеш. Тыланда чон куатым, сай илышым тыланем. Россий Федераций Президент В. Путин».

Римма Никитична уна-влакым пайрем ўстелым поген вашлийын. Эртыше илышыжым шарналтен. Тиде кечын тудын эн кугу Николай эргыж ден Екатерина шешкыжын суртышкыжо чыла икшывыже чумырген: Лида ден Ольга Йошкар-Ола гыч толыныт, Зина ден Динара - Мишкан гыч, Виталий - Оза‰ гыч.

Вате-марий Римма Никитична ден Василий Салмиярович куд йочам ончен-куштеныт. Шуко ий пырля иленыт, но сурт озалан тыгай кужу ўмыр пўралтын огыл улмаш. Тудо тракторист, бригадир лийын, икмыняр ий ветфельдшерлан ыштен.

Римма Никитичнат пелашыже семынак ўмыржє мучко тўшка озанлыклаште - ондак «Мишкинский» совхозышто, вара «Заря» совхозышто пашам ыштен.

- Мемнам изинекак пашалан туныктен куштеныт, - шарналта юбилярша. - Мыйын пелашем тулык лийын. Тудлан нелылык кок гана шукырак логалын. А мый ача-авам пелен кушкынам. 7 класс деч вара пашаш каенам…

Шкенжын шарналтымыж почеш, неле илыш корным эрташ логалын. Изирак улмыж годым эр гыч кас марте пасушто тыршен, кугырак лиймеке, чодырам руаш коштын. Илыш корныжо неле лийын гынат, шкенжым пиалан е‰лан шотла: йєратыме, ўшанле, калык коклаште пагалыме пелашыже Василий Салмиярович дене илен, тудын воктене эре поро е‰-влак лийыныт, пе‰гыде, икоян да сай коллективыште пашам ыштен.

Тиде чын, Римма Никитична шкежат пешак поро, волгыдо чонан, молылан пайдам пуаш тыршыше улеш. Тудын воктене кажне е‰ изишак сайракыш савырна. Адакшым тудо мураш пеш йєрата.

Тиде кечын Римма Никитична пеледыш ден пєлекым гына огыл, а икшывыже-влак деч саламлымашым налын. Меат нунын деке ушнена да юбилярым уло кумылын саламлена, кужу ўмырым, пе‰гыде тазалыкым тыланена. Эше шушаш Илалше-влакын кечышт дене саламлена!

Алена ГРИГОРЬЕВА.