СВО герой-влаклан лўмлалтын

Тушто шочмо элым аралымаште колышо школын выпускникше-влакын фотографийыштым верандыме. Тиде пырдыж гыч мемнан ўмбаке моткоч самырык рвезе-влак ончат. Нунын чумыр илышышт ончылно лийшаш ыле, но… «Шарнымаш пырдыжым» почмашке фото гыч ончышо рвезе-влакын ача-авашт, нунын родо-шочшышт, пырля тунемме йолташышт, район вуйлатыше-влак, Афган да Чечен сарвлакын ветеранышт миеныт. Пырдыжыште воинский порысым шуктышыла колышо салтак-влакын, школын выпускникше-влакын фотошт верандалтыныт. Тиде - Владимир Александров (1983-2024), Финат Гайнанов (1985-2023), Александр Доминикин (1991- 2024), Сергей Исанбаев (1988- 2024), Юрий Кекух (1985- 2024), Ильмир Миргалиев (1998-2024), Роман Шамарзанов (1999-2024), Денис Яныбеков (1979-2024), Игорь Яшкин (1986-2023). Пырдыжым почаш герой-влакын эргышт Егор Яшкин ден Эмиль Исанбаевлан чапым пуымо. Российын да Башкортостанын гимнышт йонгалтыныт. Мутым эн ондак школ директор Станислав Хазиев налын: - Моткоч самырык рвезе-влак мемнан кокла гыч каят, пеш чот чаманена, ойганена. Нуно ты корным чон йодмышт почеш ойырен налыныт. Мемнан школышто нунын лўмеш посна вер ышталтын, тушко каже ен толын, ончыланышт вуйым савен кертеш. Кажне фотографий йымалне QR-код уло, тушко пурен, кажныжын илыш корныж дене палыме лийын кертыда. Нуно кушкын толшо тукымлан эре пример улыт. - Кум ий жап эртыше специальный военный операцийыште шочмо элым аралаш Мишкан район гыч шўдє дене ен шогалын. 1941 ийысе сар годым кузе мемнан кочана-влак тушман ваштареш кредалаш каеныт, тугак таче мемнан икшывына ден уныкана-влак шочмо элым аралаш шогалыныт. Чаманаш веле кодеш, ятыр ен мемнан тыныс илышна верч шке илышыжым пуэн. Ик арня ончыч ме Йылыш школышто «Шарнымаш пырдыжым» почна. Таче Мишканыште шуко профилян полилингвальный школышто тыгай пырдыж почылтеш. Тиде моткоч чын да шке жапыштыже ыштыме суапле паша. Ме шкенан геройна-влакым палышаш, нунын дене кугешнышаш улына. Нунын нерген поро шарнымаш эре чоныштына илаш тўналеш, - каласен район администраций вуйлатыше Павел Трапезников. Афган сарын участникше, Мишкан районысо воининтернационалист-влак ушемын председательже Гадиф Бикбулатовын ойлымыжо чылан чоным вошт шўтен: - Нине рвезе-влак, нуно мемнан деке лач фотосўретышт дене гына пєртылыныт, чылан мыйын ученикем улыт. Ме нунын дене автоматын кузе ышталтмыжым, тудым рончен-погаш тунемынна. Тунам нигє шонен огыл, тиде урок ончыкыжым илышыштышт кугу верым налаш тўналеш… «Родничок» йоча садын воспитательже Раиса Иликбаева пырдыж гыч ончышо рвезе-влакын йоча садыш коштмо жапышт нерген шарналтен. Тиде сарыште Раиса Ильиничнан племянникше - Роман колен. - Ме икшывына-влакым тыныс илышлан куштена, а сарлан огыл. Но мемнан эргына-влак, патриотизм шўлышеш шуаралтын, коча да кугезе коча-влакын примерышт почеш, шке илыш корныштым шке ойырат - нуно мландўмалне тыныс илыш лийже манын, шочмо элым аралаш шогалыт, - каласен Раиса Ильинична. Шке илышыштым шочмо элым аралышашлан пуышо школын выпускникше-влак да фронтышто колышо чыла салтак-влак лўмеш ик минут шып лиймаш увертаралтын. Варажым пырдыж воктеке пеледышым пыштеныт. Мероприятий «Защитим Родину» патриотический муро дене мучашлалтын. Тудым 4-5 класслаште тунемше-влак муреныт.

Венера АГЛЯМОВА.