Конкурсышто сенымаш - шкем сенымаш

Башкортостан Республикын рўдє олаже «Икымше-влакын движенийышт» йоча да самырык-влакын всероссийский движений организоватлыме конкурсын региональный этапшын самырык участникше-влакым чумырен. Мишкан район гыч тушто 2 №-ан полилингвальный шуко профилян школышто кандашымше классыште тунемше Алена Филиппова участвоватлен. Тудо «Планетым арале да элым чоно» номинацийыште выступатлен да икымше верым налын. - Мемнан тунемшына Алена конкурсын очный региональный этапше марте чыла текшырымашым шкеже эртен, - ойла 2 №-ан ПМШ директорын воспитатлыме паша шотышто заместительже Ангелина Шамшитова. - Пытартыш этапыште ямде проектым презентоватлаш кўлын. «Икымше-влакын движенийыштын» верысе специалистше Альбина Каримова Аленалан полшаш йодо. Вет кугурак-влакын полшымышт деч посна огеш лий. Мый уло кумылын келшышым, шкенан тунемшыналан полшымо шуын. Ме пырля проектын идейжым шонышна да тудым кўлеш семын оформитлышна. Эн нелыже тудым аралаш ямдылалтме годым лектын: конкурсын условийже почеш, кок минут жапыште эксперт-влаклан проектым почын пуаш кўлын. Моло 19 проект коклаште тудо ойыртемалтшаш. Ме тидым ыштен кертна. Лично мыланем тиде конкурс проект пашалан сай опытым пуэн. Мый умылышым - «Икымше-влакын движенийышт» - шкем ончыкташ пеш кугу йєн. Конкурсын участницыже Алена Филиппова конкурс нерген тыгерак ойлыш: - «Икымше-влакын движенийышт» порталым эскерышыла, конкурсышто участвоватлаш кумыл лекте. Тудо туризм ден экологий темым почаш полшен. Презентацийыште мемнан самырык натуралист-влак клубын пашажым ончыктымо. Иктаж арня гыч зональный этапыш логалмем нерген увер тольо. Вес ошкыллан тестым решатлаш кўлын. Тудым сайын эртенам. Ача-авамын, йолташем-влакын полышышт огыл гын, мый Уфашке ом кай ыле, очыни. Конкурсышто участник-влак шуко лийыныт. Мыйын участвоватлыме номинацийыште гына коло утла. Моло-влак мыйын выступленийым кумылын колыштыныт, тидыже куандарен. «Икымше-влак движенийын лидерже» конкурс мыланем пеш кугу опытым пуэн да шкалан ўшаным кугемден. «Икымше-влак движенийын» Мишкан районысо отделенийын специалистше Альбина Каримова Аленан личность семын кушмыжым палемда. - Алена икымше кече гычак изиш вожылшанрак, аптыранышанрак ўдыр гай чучын. Сандене мый тудым «Икымше-влак движенийын» эртарыме тўрлє акций ден конкурслашке ушаш тыршенам. Тыгеракын тудо у могырым почылтын. Сентябрьыште ме слетыш мийышна, Алена Икымше-влак советын председательже семын тушто участвоватлен. Тушко миен толмо деч вара мый ужым, Алена личность семын кушкын кертеш. Сандене «Икымше-влак движенийын лидерже» конкурс тудлан лач гына келшен толеш. Ме йодмашым пуышна, видеом возышна, муниципальный ден зональный этаплам эртышна. Тидлан ямдылалтмаште Ангелина Ивановна чот полшен. Школышто тыгай педагог-влакын улмыштлан пеш куаненам. Алена шкенжын наставникше-влак Ангелина Ивановна ден Альбина Венеровналан кугу таум ойла.

Виктория ИШМУРЗИНА.