«Киль йымалне шым фут лийже!»

Июль тылзын пытартыш кечыштыже районысо моряк-влак Мишкан селаште шогалтыме памятный знакышт воктене погыненыт. Тений нунын пайремышкышт «Василёк» 2 №-ан йоча садын воспитанникше-влакат ушненыт. Ме уже возенна ыле, моряк-влак тиде йоча садым шулдыр йымакышт налыныт, йоча-влаклан моряк формым пєлекленыт да кажне пайремышкышт ўжыт. Тиде кечын изи моряк-влак Марий историй да тўвыра рўдерын сценышкыже Мишкан районысо Теныз братствын председательже Ралиф Мукимов ден тудын заместительже Вячеслав Сабировлан кидым пуаш лектыныт. А военно-морской флотын ветеранже-влак чылаштланат пєлекым кучыктеныт. Вет нине йоча-влак, йўштырак игече деч лўдде, 9 майыште эртыше митингыште маршироватленыт, варажым Кигазытамак ялыште Кугу Отечественный сарын участникше-влак лўмеш памятникым почмаште участвоватленыт. Икманаш, пєлекым сулен налыныт. Йоча-влак дене пырля «Василек» 2 №-ан йоча садыште пашам ыштыше-влакат палемдалтыныт. «Башкортостан Республикысе теныз собраний» региональный общественный организацийын почетан грамотыжым воспитатель-влак Ольга Иликбаевалан, Лилия Абдуловалан, Екатерина Шайдуллиналан, музыкальный вуйлатыше Анастасия Кутлуметовалан, физический культура дене инструктор Лариса Арсентьевалан, дошкольный учреждений вуйлатышын пашажым шуктышо Эльвера Мукимовлан кучыктымо. Тыгая грамота дене предприниматель Галина Айгузина палемдалтын. Мероприятий тўналтыше погынышо-влакым вўдышє Ирина Аликаева саламлен. Тылеч вара мутым Вячеслав Сабировлан пуымо. - Йоча-влакым шочмо элым йєраташ изинек туныктыман. Мемнан икшывына-влак патриот шўлышеш кушшаш улыт. А патриот шўлышым ме шкенан примерна дене пуртен кертына. Тидлан верч эре ончыл радамыште лийшаш улына. Чыландамат Военно-морской флотын кечыж дене саламлем! Суап ден пиалан тыныс илышым тыланем! Тудын деч вара мутым Мишкан районысо Теныз братствын председательже Ралиф Мукимовлан пуымо. - Теныз братство воспитатель, ача-ава да поснак «Василек» 2 №-ан йоча садыш коштшо ўдыр-эрге-влаклан кугу таум ойла да ончыкыжымат пенгыде вашкылым кучен илымылан ўшана, - каласен Ралиф Фаритович. – Тиде кечын Россий флотлан 328 ий темеш, вўдйымал флотлан – 118 ий, теныз пехотылан – 318 ий. Башкортостан Республик вуйлатыше Радий Хабировын тыршымыж дене республик правительство ден Краснознаменный Йўдвел флотысо «Иван Грен» кугу десант корабль коклаште шеф кыл ышталтын. Шеф кыл тыгак Уфа оласе административный ола округ ден Кок гана Краснознаменный Балтийский флотысо 128-ше вўд ўмбал бригадысе «Сообразительный» гвардейский корвет, Краснознаменный Тихий океан флотысо «Уфа» кугу дизельэлектрический вўд йымал пуш коклаште ышталтын. Тиде пуш кызыт Средиземный тенызыште улеш. Эше палемден кодыман: «Уфа» лўмым пограничный патруль корабльлан пуымо, тиде корабльым вўдышкє 2023 ий 15 июньышто волтымо. Тудо, пашам пытарымеке, Йўдвел теныз корно дене Петропавловск-Камчатский оласе портышко кайышаш. - Совет жапыште моряк-влак кум ий служитленыт. Вет корабльыште але вўд йымал пушышто служитлаш ятырлан нелырак да шукырак тунемман. Мый коклашкына изи моряк-влак пурымылан моткоч куаненам. Кє пала, ала нунын кокла гыч иктаж рвезыже ончыкыжым моряк лиеш? – каласен Мишкан район МР администрацийын дела управляющийже Ринат Сафин да «Василек» 2 №-ан садын воспитательже-влаклан йоча-влакым Кугу Отечественный сарыште Сенымашлан 79 ий теммылан лўмлалтше парадыште участвоватлаш сайын ямдылымыштлан тауштыме серышым кучыктен. Мишкан да Бурай районласе военный комиссариатын лўмжє дене младший лейтенант Александр Иванов выступатлен. Тудо 2022 ийыште частичнй мобилизацийыш логалын, Шаймуратов лўмеш медаль дене палемдалтын. Кызыт военкоматыште пашам ышта. - Киль йымалне шым фут лийже! – каласен тудо выступленийже мучаште. – Тиде шомак моряк-влак коклаште «корнан лийза» манмым ончыкта. Тугеже тек тыланда эре почешла мардеж пуа! Саламлымашке тыгак районысо ветеран-влак организаций председатель Юлия Балахнина, тудын заместительже Муллахан Ханов, президиумын членже Алексей Аптулманов ушненыт. Саламлымеке, ветеран-влак Теныз братствылан самырык-влакым патриот шўлышеш воспитатлаш полшымыштлан тау мутым каласеныт. - Мотор, пенгыде кап-кылан, чолга да чулым моряк-влак ўмбаке ончалмеке, икшывына да уныкана-влакын ончыкылыкыштлан ўшан шочеш, - палемден Юлия Григорьевна, а Муллахан Ханов ешарен: - Мый самырык годым ик матросын ялышке пєртылмыжым шарнем. Тиде кечын йырже уло йоча-влак погыненыт да мотор формыжым кєранен онченыт. Икманаш, тудо чылалан сай пример лийын. Тылеч вара мутым Алексей Аптулмановлан пуымо. - Мый тиде кечын чын матрос-влакым веле огыл палемдынем. Нуным ончен, конешне, кугешнаш гына кодеш. Но тыште изи моряк-влакат улыт. А нуным ончен, чон куана. Салам шомак-влак деч вара службыжо нерген военно-морской вийын запасыште улшо капитан-лейтенантше Александр Николаев палдарен: - Мемнам лўдыкташ тыршыше тушман корабль-влак, флотнан вийжым ужмеке, виклан чакненыт. Флотна чынжымак виян! Тидлан кєра россий моряк улмына дене чыланат пенгыдын кугешнен кертына! Кызытсе моряк-влак дене кугешныза да ветеран-влакым пагалыза. Военно-морской флотын кечыжым палемдымашке «Икымше-влак движений» самырык организацийын Мишкан районысо отделенийжат ушнен. Тиде организаций лўм дене верысе отделенийжын специалистше Альбина Каримова выступатлен. - Россий Военно-морской флотын пагалыме ветеранже-влак, чылаландат волгыдо куаным да пиалым тыланем, тек тендан илышышкыда таул мардеж ойгым пуэн ок кондо, а службына кугешнаш гына таратен шогаш тўналеш! Салам шомакше деч вара Альбина Венеровна Мишкан район МР администрацийын физический культура, спорт, туризм да молодежный политика шотышто комитетшын самырык-влак дене паша шотышто тўн специалистше дене пырля моряк-влаклан самырык-влакым патриот шўлышеш воспитатлаш полшымыштлан почетан грамотым кучыктен. Мероприятий мучаште пайрем вўдышє Ирина Аликаева увертарен: - Ынде шочмо элым аралымышт годым вуйым пыштыше да сар деч вара мемнан кокла гыч кайыше моряк-влакым ушташ жап шуын. Нуно тачысе кечын мемнан коклаште укелыт гынат, ме нуным нигунам она мондо да подвигышт дене кугешнен илаш тўналына. Тылеч вара тып минутым увертарыме. Погынышо-влак чыланат кынелын шогалыныт да мемнан кокла гыч кайыше-влакым шарналтеныт. Уштымаш деч вара военно-морской флотын ветеранже-влак, нунын ешышт, изи моряк да уна-влак Мишкан селасе культура да каныш паркышке ошкылыныт. Порысышт ден присягылан ўшанле улшо чыла жапысе моряк-влаклан лўмлалтше памятник лач тушто верланен. Поро йўла почеш марш дене старший мичман Ильдар Зарипов командоватлен. Игече йўранрак лийын гынат, паркыште пеш шуко ен погынен. Вет чын моряк нимогай вўд да йўр деч ок лўд! Мероприятий мучашлан памятник ончылно шукат шуко гвоздика чумырген. Йошкар тўс – шочмо элна верч кредалше моряк да моло воин-влакым пагалымаш тўс. Вет нуно мемнан тыныс илышна верч лач тыгай тўсан вўрым йоктареныт.

Виктория ИШМУРЗИНА