Полышлан куан

Таче йоча жапысе ик йӧратыме верышке – ял воктенысе пўя деке миен тольым. Тиде пўям ме «Чыве пўя» манына. Шоҥгырак-влак чын лўмжє весе маныт гынат, тудым изинек лач тыге манаш тунемынна.
Изина годым тиде пўяште ме кечыгут дене йўштылын кертынна. Вўд гычын кылмен чытыраш тўҥалмеке гына лектынна. Лекмеке, шовыч дене пўтыралтын шинчынна. Изишак ырымеке, уэш вўдыш тӧрштенна.
Мый йолгорно дене ошкылынам да уэшын изинек моткоч палыме ужаралге вўдым ужаш ямдылалтынам. Тиде пўя ял мучаште верланен, йырже мотор чодыра кушкеш. Тудо кугу огыл, вўдшӧ эре да яндар. Кече шыман ончымо годым йолжо-влак вўдыштє моторын койын йылгыжыт. Пўяна коллан поян. Ял калык, кол эҥерым кучен, тушко эрдене эрок вашка.
Кастене гын, кунам вўдышкӧ пытартыш кечыйол-влак логалыт, пўяна эшеат моторрак коеш.
Мый, пўя деке лишемымат, тушто куандарыше сўретым ужым – сер воктене шукерте огыл кондымо гравий киен. Пўрӧ оласе «Башкиравтодор» ДРСУ-АО начальник сєрымыжым шуктен улмаш!
Жапым йомдарыде, ме Кульчубай ялысе рвезе-влак дене тиде гравийым писын шалатышна да пўя серым тўзатышна. Ынде эҥер воктене канаш пеш сай йӧн уло.
Российыште суапле пашам ыштыше-влак эре лектын шогеныт. Тидлан тўрлӧ амал таратен кертеш. Но поро пашам ышташ тыршымаш, очыни, айдемын чоныштыжак уло. Илыш лач поро чонан да алал кумылан еҥ-влакын тыршымыштлан кӧра саемеш.
Кульчубай ял калык Пўрӧ оласе «Башкиравтодор» ДРСУ-АО начальник Ф. Ф. Фатыховлан пўям тўзатыме пашаште полышым ончыктымыжлан кугу таум ойла! Ынде калыклан йўштылаш сай вер уло. Вет тыште ялысе калык веле огыл кана, йоча-влак «Старт» спортивно-тазартыме лагерь гычат толыт. Моло ял гычат толын йўштылыт.
Ме йоча жап гычак сайын палыме, чонланна лишыл вер-шєрна-влакым аралаш да тўзаташ тыршена. Иктаж вер-шӧрна тыге тўзлана гын, чонна моткоч куана. Мылам, пўянан тўзланымыжым ужмеке, яндар памаш вўдым подылмыла чучо.
И. ШАМИЕВ, Кульчубай ялын старостаже.