Таза илышым ойырен налына

19 январьыште Монар да Шугу Шаде сельсовет СП-влак коклаште договорым подписатлыме.
Ончыкыжым нине сельский поселений-влак культурно-массовый, спортивный да моло мероприятий-влакым пырля эртараш тўҥалыт.
«Айык ял – 2022» республиканский конкурс кышкарыште Кугу Шаде ялысе библиотекыште «Таза илышым ойырен налына» теме почеш йыргешке ўстел эртаралтын. Мероприятийыште Кугу Шаде да Монар сельсовет СП-влакын представительышт, Мишкан район МР советын секретарьже Т. Коледина, Мишкан районысо пошкырт курултайын председательже М. Нурисламов, верысе самоуправленийын депутатше-влак участвоватленыт.
Йыргешке ўстел тўҥалтыште салам шомакым Мишкан район МР советын секретарьже Т. Коледина ойлен. Тудо эше ик гана «Айык ял» республиканский конкурсын цельже ден задачыже-влакым ушештарен. А цельже ден задачыже-влак проста улыт – калыкым таза илышым илаш, уда койыш-влакым кудалташ кумылаҥдаш.
Монар сельсовет СП администраций вуйлатыше Юрий Яншаев ден Кугу Шаде сельсовет СП адинистраций вуйлатыше Расил Аллаяров сельский поселенийлаштышт уда койыш-влак дене кузе кучедалмышт дене палдареныт.
Ушештарена: 2022 ийыште «Айык ял» конкурсын районный этапыштыже Монар сельсовет СП-се Корак ял сеҥен. Тиде сеҥымаш верч пўтынь сельский поселений тыршен. Кугу Шаде сельсоветат конкурс деч ӧрдыжеш кодын огыл. 2020 ийыште муниципальный этапыште Изи Шаде ял кокымшо лийын, Кугу Шаде посна номинацийыште палемдалтын. 2021 ийыште Кугу Шаде адакат посна номинацийыште ойыртемалтын. 2022 ийыште калмазан-влак ойыртемалтыныт.
- Ме конкурсышто сеҥымаш верч веле огыл, тыгак калыкым таза илышым илаш кумылаҥдаш манын участвоватлена, - палемден шкенжын выступленийыштыже Расил Казбекович.
Йыргешке ўстелыште тыгак библиотекарь-влак И. Васина ден Н. Шириязданова выступатленыт. Нуно наркоманийым, аракам йўмашым, тамакам шупшмашым ончылгоч кораҥдыме нерген ойленыт. Нунын деч вара мутым Корак ялысе клубын методистше Д. Николаева ден тиде ялын тўҥалтыш ветеран организацийжын председательже Т. Ташбулатовалан пуымо. Палемдыде кодаш ок лий: Корак ялыште «Корак увер» лўман ял газетым лукташ тўҥалме, тиде газетын лаштыклаже гоч калыкым таза илышым илаш кумылаҥдаш тыршат.
- Вашлиймаште ме ятыр мутланышна, каҥашышна да тыгай иктешлымашым ыштышна: аракам йўмашым чумыр вий дене гына сеҥаш лиеш, - каласен йыргешке ўстел мучаште Монар сельсовет СП администрацийын пашажым виктарыше Дина Аликова.
Вашлиймаш деч вара чыланат Кугу Шаде ялысе Сар да Паша Чап музейыш миеныт. Музей эскпонат-влак дене Мишкан районысо пошкырт курултайын председательже Мунир Нурисламов палдарен.
- Тиде вашлиймаш мыланна чылаланнат кугу пайда ден куаным конден, - каласен мероприятий мучаште Корак ялысе клубын методистше, «Рвезылык» мурышо ансамбль вуйлатыше Диана Николаева. – Музеят пеш келшыш. Тушто пеш оҥай арвер-влак аралалтыт. Меат ончыкыжым ялыштына тыгай сынан музейым почаш тыршена. Тиде пашам шуктымо годым Кугу Шаде ялысе музей пашаеҥ-влак дечын опытышт дене пӧлалташ йодына.
Светлана ТОЙМУРЗИНА.