Келшымаш
-15 °С
Пылан
Все новости
Тӱрлӧ
24 Сорла 2022, 11:48

Журналист-влакын фестивальышт эртен

19 августышто Караидель районысо «Звездный» ФОК-ышто «Журфест-медиапатриот 2022» Башкортостан Республикысе журналист-влак кокласе кеҥеж фестиваль эртен

Журналист-влакын фестивальышт эртен
Журналист-влакын фестивальышт эртен

Фестивальыш «Келшымаш» да «Дружба» газет пашаеҥ-влакат миеныт. Пайремым Башкирийысе журналист ушем ден БР-се печать да СМИ шотышто агентстве эртареныт. Журфест шке йырже 500 утла журналистым чумырен. Нунын коклаште пўтынь эл, республик, район кўкшытан изданий, телевидений, радио да Интернет-сообщество пашаеҥ-влак лийыныт.
Журналист-влак тўрлӧ район гыч толын шумеке да шке верыштым налмеке, «Журфест-медиапатриот 2022» фесстивальын участникше-влакым Караидель район МР администраций вуйлатыше Айдар Шайдуллин саламлен. Тудо погынышо-влаклан чылаштланат пашам сайын ышташ да эше сайрак каналташ тыланен. Палемден кодымо шуэш: Караидель районышто журналист-влак кокласе фестиваль уже кокымшо гана эртаралтеш. Фестивальын тўҥ цельже тыгай лийын: кызытсе жапысе медиаотрасльын да журналистикын состоянийжым рашемдаш, медиапатриотизмым да журналист-влакын пашаштым вияҥдаш.
Пайремым салам да тыланымаш шомак дене Башкортостан Республикысе печать да СМИ шотышто агентство вуйлатыше Максим Ульчев почын.
- Тиде ий республикысе медиа-сообществылан поян улеш – июньышто Башкирийысе СМИ-влак «Медиайыйын» форумым эртареныт, 23 июльышто – «Медиагерой-влак таҥасымашым». Нине мероприятийлашке республикысе чыла газет ден журнал-влак, телевидений да радио ушненыт. Икымше гана журналист-влак фестиваль тыгай йӧн дене 2011 ийыште Салават районышто эртен. 11 ий жапыште журфест Кармаскале, Архангельск, Благовещенск, Кугарче, Татышле, Караидель районлаште да Октябрьский олаште эртаралтын. Мый ўшанем: таче фестивальыш толшо кажне еҥ шкаланже келшыше площадкым муэш да коллегыже-влак дене пеҥгыде кылым ышта. Палемдыде кодаш ок лий: журфест пайдале лийшаш, тыште чыланат шкеныштын опытышт, идейышт дене пєлалтшаш да республикысе журналистикым вияҥдаш йӧным рашемдышаш улыт, - палемден Максим Ульчев.
Журналист-влак кокласе фестиваль, коронавирус инфекций кумдан шарлымылан кӧра кок ий эртаралтын огыл. Тений, ситуаций тӧрланымеке, нуно уэшын пырля чумырген кертыныт. Салам шомак деч вара шке пашаштышт ойыртемалтше пашаеҥ-влакым палемдыме. Роман Серебряный сай пашаеҥ-влаклан Россий журналист ушемын чап грамотыжым кучыктен, а Вадут Исхаков – Башкортостанысе журналист ушемыным.
Поро йўла почеш СМИ пашаеҥ-влак посна калык кудо-влакым ончыктеныт. Вет республикыштына пеш шуко тўрлӧ калык ила. Газет ден журнал-влак гын 6 йылме дене лектыт: рушла, пошкыртла, татарла, чувашла, удмуртла да марла. Нине калык-влакым республикысе тўп калыклан шотлаш лиеш. Нуно Пошкырт кундемыште уже кужу жап илат. Чыланат Башкортостанын культурыжым вияҥдаш полшеныт.
БР-се журналист ушемысе изданий-влак район-влак кокласе 7 творческий ушемыш – МТО-ш чумыргеныт. Кажне МТО могай гынат калык кудым ончыктышаш лийын: пошкырт, руш, татар, чуваш, марий... Йўдвел МТО, а «Дружба» ден «Келшымаш» лач тиде ушемыш пурат, марий кудым ончыктен. Редакций коллектив-влак выставкыш тўрлӧ марий кочкышым, вургемым, кидпашам намиеныт. Марий кудышто тўҥ верым, конешне, «Келшымаш» газет налын. Ме выставкышке тўрлӧ марий кочкышым, ожсо марий вургемым (Мишкан селасе марий историй да тўвыра рўдер пуэн), уста тўрлызӧ Лилия Имаеван кидпашаже-влакым намиенна. Тудын творчествыже нерген ме район газетыште февральыште возенна ыле. Моло редакций пашаеҥ-влакат шагалын огыл марий вургемым чиен миеныт. Уна-влак марий кудо деке лишеммеке, нуным ондак марла саламлыме да марий-влакын Пошкырт кундемыш кузе да кунам толмышт нерген ойлымо. Варажым марла сем дене рушла да марла такмак-влакым йоҥгалтарыме, «тывырдыкым» куштымо. А «тывырдыкым» моло газет редакций пашаеҥ-влакат, марий огытыл гынат, чулымын куштен моштат улмаш.
Кудо-влакым ончен лекмеке, уна-влак моло выставке-влакым ончаш каеныт. А выставке-влакым тыгак «Башкирийсе спутник телевидений» телеканал да Башкортостан ГТРК, «Башинформ» информационный агентстве ончыктеныт. Тыгак «Медиашефство: Башкортостанысе СМИ – Донбасс йоча-влак» спецпроект дене палдарымаш эртаралтын. Фестивальын участникше-влаклан федеральный медиаэксперт-влак семинар-влакым эртареныт да мастер-класс-влакым ончыктеныт. «Диалог Регионы» АНО-н информационный паша шотышто специалистше Евгения Авраменко «Копирайтинг в социальных сетях» мастер-классым ончыктен. RUSSIA TODAY документальный редакцийын корреспондентше Вячеслав Гузь шокшо точкылаште пашам ыштыше журналист-влакын пашашт дене палдарен. РФ-се Цифровой министерствын периодический печать ден книга индустрийлан государственный полышым ончыктымо шотышто департаментше директорын заместительже Светлана Дзюбинская «Особенности освещения темы патриотизма в печатных СМИ» тема почеш мастер-классым эртарен. Тылеч посна, «Журфестын» участникше-влак дене Россий журналист ушемын секретарьже Роман Серебряный мутланен. Икманаш, ««Журфест-медиапатриот 2022» Башкирийысе журналист ден медиа-сообщество-влаклан икте-весышт дене палыме лияш, опытышт дене пєлалташ, уым пален налаш пеш сай мероприятий лийын. Нуно тушто, пырля погынен, газет ден журнал-влакын ончыкылыкышт нерген мутланен каҥашеныт, ончыкылыклан планым рашемденыт.
Культурный ден спортивный программат оҥай да пайдале лийын. Мутлан, кумылан-влак фестивальыште пикш дене лўйкалаш тунемын кертыныт. Пайрем кас «КваЦерт» медиа-рок группын концертше дене мучашлалтын.
Светлана ТОЙМУРЗИНА.

Журналист-влакын фестивальышт эртен
Журналист-влакын фестивальышт эртен
Автор:Светлана Тоймурзина