Келшымаш
+1 °С
Лум
Все новости
СПОРТ
25 шорыкйол 2023, 09:59

Мардеж дене таҥасен...

21 январьыште Кульчубай ялыште Марсель Байрамов лўмеш ече дене таҥасымаш эртен

Мардеж дене таҥасен...
Мардеж дене таҥасен...

Ушештарена, М. Байрамовын ўмыржӧ Украиныште посна военный операций годым лугыч лийын, салтак колымекыже Мужество орден дене палемдалтын.
Тудын лўмеш таҥасымашке пеш ятыр ечызе погынен, нунын коклаште виян спортсмен-влакат, ече дене тыглай коштшо-влакат лийыныт. Чылаже 8 гыч 70 ияш марте 179 еҥ лийын. Ечызе-влак Пўрӧ, Бурай районла, Пўрӧ, Ӱпӧ, Нефтекамск да Дӧртыльӧ олала гыч толыныт.
Таҥасымашым эртараш 21 январьым арам огыл ойырен налме – М. Байрамов лач тиде кечын шочын. Тудо изинек спорт дене кылым кучен, ече дене куржталаш
йӧратен, ятыр таҥасымаште сеҥыше але призер лийын. «Сочи-2014» Паралимпийский тул эстафетын факелоносецше-влак коклашке логалын. Самырыкше годымак полиатлон дене спорт мастерлан кандидат лўмым сулен налын.
Старт деч ончыч М. Байрамов лўмеш шарнымаш оҥа ончылно митинг эртен. Торжественный мероприятийышке ятыр уна миен. Нунын коклаште РСФСР-н заслуженный тренерже, фехтований дене СССР-н спорт мастерже, БР-се фехтований федерацийын председательже Евгений Емельянов, биатлон дене БР-се олимпийский резерв спорт школын директоржо Виктор Никитин, Мишкан район МР администраций вуйлатыше Павел Трапезников лийыныт. Нуно шкеныштын выступленийыштышт Марсель Байрамовын ача-аважлан тыгай эргым ончен куштымыштлан тау мутым ойленыт.
- Марсельым пытартыш корныш ужатыме годым тудын нерген шарнымашым курымешлан кодаш мутым пуэнна. Таче шочмо кундемыштыже тудын лўмеш ече дене
икымше таҥасымаш почылтеш. Ончыкыжым тиде таҥасымаш идалык еда эртаралташ тўҥалеш.
Таче Марсель мемнан коклаште уке улеш гынат, чылаланнат лўддымылык, чолгалык шотышто пример семын кодеш, - каласен шкенжын выступленийыштыже П. Трапезников.
Тылеч вара сай йолташыже нерген шокшо шомакым физический культура, спорт, туризм да молодежный политика шотышто комитет председатель Н. Зайнитдинов
ойлен. Митинг мучаште мемориальный оҥа йымаке пеледыш аршашым пыштыме. Пӧлекым пӧлеклымашат лийын. В. Никитин верысе йоча-юношеский спорт школлан ече-влакым пӧлеклен. Нуным пӧлеклыме годым Кульчубай ялыште ятыр виян ечызе ден биатлонист кушмым палемден.
Таҥасымаште ечызе-влак ийгот шотышто 10 тўшкалан шелылтыныт: изирак-влак 500 метрыш куржыныт, кугурак-влак – 1000 да 2000 метрыш.
Кажне тўшкаште сеҥыше да призер-влак лийыныт, нуным чылаштымат Мишкан район МР-се физический культура комитетын чап грамотыж дене палемдыме.
Венера АГЛЯМОВА.

Мардеж дене таҥасен...
Мардеж дене таҥасен...
Мардеж дене таҥасен...
Мардеж дене таҥасен...
Мардеж дене таҥасен...
Автор:Венера Аглямова