«Келшымаште – вий!»

Вашлиймаш «Келшымаште – вий!» девиз почеш эртен. «Айык ял – 2022» конкурсышто участвоватлыше нине ял-влак коклаште вашполыш нерген келшымаш 20 январьыште подписатлалтын.
Кашкын сельсовет СП администраций вуйлатыше Ринат Галявутдинов ден Монар сельсовет СП администраций вуйлатыше Юрий Яншаев культурно-массовый, спорт да моло мероприятий-влакым пырля эртараш кутырен келшеныт. Тиде кечын корак-влак Кашкын ялыште эртыше фольклор пайремыш миеныт. 11 мартыште кашкын-влак Коракыш унала толыныт.
Тиде кечын ялысе клубышто «А ну-ка, ўдырамаш-влак!» лўман пайрем эртен. Уна-влакым кинде-шинчал, мелна дене да марий такмак-влакым мурен вашлийме. Тылеч вара чыланат клубыш пуреныт. Уна-влак толмо вашеш, ынышт кылме манын, коҥгаш сайын олтымо.
Конкурсым Корак ялысе клубын методистше Диана Николаева вўден. Тудо тиде пашам моткоч устан шуктен.
Уна ден ял калыкым пайрем дене Мишкан район МР советын секретарьже Татьяна Коледина, Монар сельсовет СП администраций вуйлатыше Юрий Яншаев, Мишкан районысо пошкырт курултай исполкомын председательже Мунир Нурисламов саламленыт. Поро шомакым тыгак Аскын районысо Кашкын сельсовет СП администраций вуйлатыше Ринат Галявутдинов ойлен. Тудо ял калыклан у клубым вашкерак чоҥаш тыланен.
Салам шомак-влак деч вара пайрем конкурс тўҥалын. Унала толшо Фарзана Яруллина, Эльмира Нурмухаметова, Инзиля Фазлинурова да Эльза Афтахова шкеныштын вургемышт дене палдареныт. Нуно Балыкча тукым вургемым урген чиеныт улмаш.
Тылеч вра ўдырамаш-влак кок командылан шелалтыныт да сеҥымаш верч чулымын таҥасеныт. Ик командышкыже «Рвезылык» ансамбльын участникше-влак пуреныт, весышкыже – «Сердэшлэр» фольклор коллективын участникше-влак. Таҥасымаш 12 конкурс гыч шоген. Нуно тыгай лўман лийыныт: «Саламлалтмаш», «Фантазий», «Комплимент», «Эстафета», «Музыкальный», «Бодиарт» да моло. «Кулинар батл» конкурслан кашкын-влак баурсакым, чак-чакым да ломбичке когыльым конденыт. Ӱстелыштым «Айык ауыл 2022» манын возыман торт сєрастарен. Корак-влак погымо ўстелат поян лийын. Нуно шокшо мелна да кешыр когыльым кўэштыныт. «Интеллектуальный» конкурсышто пўсӧ уш-акылан улмым ончыкташ кўлын. Тиде заданийымат чылан сайын шуктеныт. Ӱдырамаш-влак моло конкурслаште алал кумылын муреныт да куштеныт. Икманаш, пайрем пеш ямлын эртен.
Мероприятий мучаште ўдырамаш-влак пырля Келшымаш паласым «куэныт». Нуно йыр шинчыныт да икте-весышт деке тўрлӧ тўсан мундырам пєрдыктен колтеныт. Тыге оҥай палас «куалтын». Тудо чот улмаш. Покшекыже изи ўдыр вочмеке, тудым «Келшымаште – вий!» манын рўпшеныт.
Конкурс-влак деч вара жюри иктешлымашым ышташ тўҥалын. Моло-влак гын ты жапыште «тывырдыкым» чулымын куштеныт. Тиде куштымаш икте-весе ден ваш келшен илымым да эртыше ден кызытсе жап, тўрлӧ тукым кокласе кылым ончыкта. Татарла да пошкыртлат куштымо.
Пайремым Корак ялын мотор ўдыржӧ – Настасья Александрова сӧрастарен. Вет вашлиймаш деч ончыч Мишкан селаште «Саскавий – 2023» районысо моторлык виш конкурс эртен. Тушто Настя икымше верым налын. Тиде кечын гын марла мурым ныжылгын йоҥгалтарен.
Тылеч вара жюри иктешлымашым ыштен. Корак ден кашкын-влак иктєр баллым погеныт. Икманаш, конкурсышто Келшымаш сеҥен!
Команде-влакым торжественно палемдымеке, уна-влакым верысе краеведческий музейыш ўжын наҥгайыме. Тудет шукерте огыл почылтын. Музейыште верысе кидмастар Вероника Григорьева куымо станок дене пашам кузе ыштыме дене палдарен. Музейыште пеш шуко марий ўштє уло. Нуным шукерте огыл куымо. Музейым ончен лекмеке, уна-влак ял калыклан да музейлан поро тыланымашым возеныт.
Музейым ончыктымеке, делегацийым верысе тўҥалтыш школышко – кечывал кочкышым пукшаш ўжмӧ. Туштак верысе художник Марина Салишеван пашаже-влак художественный выставке эртаралтын.
- Мероприятий «Айык ял – 2022» республиканский конкурс кышкарыште эртен. Икте-весе дене ваш мутланен, ме тыгайрак иктешлымашым ыштышна: тыгай вашлиймаш-влак кугу пайдам кондат, икте-весына коклаште кылым пеҥгыдемдаш полшат, - каласен мероприятий мучаште Диана Николаева. – Ме унана-влаклан пайремнам сӧрастарымыштлан, чолгалыкышт дене пєлалтмыштлан чон гыч лекше тау мутым ойлена. Нунын полшымо дене пайремна пеш ямлын эртен.
Светлана ТОЙМУРЗИНА.