«Ава – икымше мут»

Залыште тиде кастене пайрем шўлыш озаланен. Концерт тўҥалтыштак погынышо-влакын кумылыштым салам шомак дене вўдышӧ-влак Анастасия Ялкаева ден Василий Кутлуметов нӧлталыныт.
- Таче, тиде пайрем кечын, ме ава лийше чыла ўдырамашымат алал кумылын саламлена! Ава лиймаш куштылго огыл, но пиалан пўрымаш! – каласеныт нуно залыште шинчыше ава-влаклан.
Тылеч вара погынышо-влакым пайремышт дене БР-се Мишкан район МР совет председатель Вячеслав Сабиров саламлен. Вячеслав Александрович ава-влаклан чылаштланат волгыдо пиалым да суапым тыланен. Саламлымаш деч вара сай икшыве-влакым ончен куштышо ава-влакым палемдыме.
Икшыве-влакым сайын ончен куштымылан да Ава кече лўмеш БР-се Мишкан район МР район совет ден администрацийын тауштыме серышышт дене Зинаида Яметова, Надежда Байдуганова, Лариса Ишмурзина да Эльза Абдуллина палемдалтыныт. Ава пашам суаплын да тыршен шуктымылан тауштыме серышым Лариса Яншаевалан, Эльвира Галимовалан да Гульнара Зариповалан кучыктымо.
Пайрем касым ямле концерт сӧрастарен. Тудым поснак «Эрвел» куштышо калык ансамбль сылнештарен. Ончышо-влакым тыгак «МуроЭм», «Надежда» мурышо ансамбль-влак да РДК пеленсе трио куандареныт. Калык семўзгар-влак сем почеш Василий Кутлуметов ава нерген почеламутым ныжылгын лудын. Ямле муро-влакым Ирина Аликаева, Олесия Мусалина, Анастасия Апекова, Ильдар Галинуров, Ильфак Арсланов да Игорь Мурадымов муреныт. Ава-влакым куштымашышт дене Йоча искусство школын самырык мурызыжо да куштызыжо-влак куандареныт.
Ава нерген ятыр почеламутым возымо да сўретым сўретлыме. 7 гыч 22 ноябрь марте районысо культура дворецыште школыш коштдымо йоча-влак коклаште «Йӧратыме авам» йоча сўрет конкурс эртен. Изи художник-влакын пашашт Культура дворецын фойежым сӧрастареныт.
Шукерте огыл РДК-ште культура волонтер-влак команде чумырген. Аван кечыже вашеш нуно фойеште фотозоным ыштеныт да тудым мотор гирлянде-влак дене сєрастареныт. Тушто кумылан-влак чыланат возалтын кертыныт, сай телефонышт але фотоаппаратышт лийын огыл гын, тидым волонтер-фотограф-влак ыштеныт.
Концерт деч вара ме пайрем концертым ончаш толшо ик ава – «Чумыр Россий» политический партийын верысе отделенийжын исполнительный секретарьже Наталия Шамшиева дене мутланышна:
«Ава кече идылак мучко эртыше тўрлӧ пайрем коклаште посна верым налын шога, - каласыш Наталья Анатольевна. – Тиде тукым-влакым ушен шогышо, курымашлык пайрем. Вет ава кажне еҥлан эн шерге – илышым пуышо айдеме. Концерт мылам моткоч чот келшыш. Пайрем шўлыш тўҥалтыш гыч мучаш марте озаланыш, кызытат пытен шуктен огыл. Тудым ямдылыше-влак чынжымак сайын тыршеныт. Калык кажне номер деч вара совым рўж кырен. Мылам поснак «Ладушки» ОВДА-се ўдыр-влакын выступленийышт келшыш, нуно сценышке шкеныштын авашт дене пырля лектыныт. Чылаштланат «Браво!» манаш гына кодеш.
Светлана ТОЙМУРЗИНА.