Келшымаш
+24 °С
Йӱр
Все новости
Культура
16 Кылме 2022, 10:12

Ял клубын пўрымашыже

Ӱлыл Шогертен ялыште илыше-влакклубым олмыктеныт

Ял клубын пўрымашыже
Ял клубын пўрымашыже

Ӱлыл Шогертен ялыште жапыштыже сай клубышт лийын. Еҥ-влак тушко кином ончаш коштыныт, шкеныштын да толшо артист-влакын концертыштым онченыт. Тыглай кечынат самырык-влак клубыш погыненыт, дискотекым эртареныт.
Тыгай каслашке пошкудо ялла гычат толыныт. Икманаш, ты культура учрежденийыште илыш эре шолын шоген. Но жап эртыме, у саман толмо дене клуб петыралтын. Тудын омсаштыже кугу кӧгӧн кечен. Тидыже шуко еҥым тургыжландарен, вет зданийже эше сай, совет пагытыште чоҥымо лийын. Тунам ялыште самырык-влак шукын лийыныт, кугыеҥ-влакат тўрлӧ пайремлан верысе клубыш погыненыт. Икманаш, йокрокланаш жап лийын огыл. А кызыт? Еҥ-влаклан чумыргаш нигушто. Уремыште гына, кевыт воктене погынен кертыт. Мутлан, У ий пайрем годым туштак йоча-влаклан У ий кожым сӧрастарат, Йўштӧ кугыза да Лумўдыр вургемым чиен, йоча-влакым куандараш тыршат. Ял погынымаш-влакат лач тушто эртат. Кодший октябрь тылзыште мыланем ик тыгай погынымаште лияш перныш. Тунам ял калык «Ял уремым тӧрлатыме» проектым илышыш пурташ погынен. Ялыште ик пўсӧ проблема кораҥдалтын - уремыште корно олмыкталтын. Еҥ-влак тунамат кевыт воктене чумыргеныт ыле.
Ялыште клубын ситыдымыже нерген еҥ-влак шукертак мутым луктыныт. Кеҥежым ялыште самырык-влак шукемыт - студент- влак каникуллан толыт, вес кундемлаште илыше-влак шочмо верыштышт отпускым эртарат. Нуно, петыралт шинчыше клубым ончен, ожнысо жапым чаманен шарналтат. Вет совет пагытыште ялыште клуб тўвыра рўдер лийын. Кажне ялыште клуб пашам ыштен.
Историйым ончалаш гын, яллаште клуб-влакым сар деч вара ышташ тўҥалыныт. Клубышто артист-влаклан выступатлаш сцена, зал, кином ончыкташ кинобудка ышталтыныт. Залыште пўкен але теҥгыл-влак верланеныт. Тўрлє погынымаш-влак эртеныт, а самырык-влак кастене, теҥгыл-влакым пырдыж воктеке шогалтен, залым куштымо площадкыш савыреныт. Ӱлыл Шогертен ялыштат илыш тыгаяк лийын. Вет ялыште клуб кеч-кунамат еҥ-влакым ушен шогышо культурный верлан шотлалтын да кызытат тугаяк рольым шукта.
Клуб деч посна орланен, ялысе чолга еҥ-влак тудым уэш пашаш колташ шонен пыштеныт. Клубым олмыктымаш ял илышыште кугу событийыш савырнен. Олмыктымо паша кузе мийымым фотосўретлашке возен шогеныт, тыге шке шотан фотожурнал шочын. Ме ялын ик чолга еҥже Эдуард Килинбаев дене вашлийна.
Тудын ойлымыж гыч пален нална, Кодшо курымын 80-ше ийлаштыже чоҥымо кермыч зданийыште клуб, медпункт да кевыт лийыныт. Варажым ялыште медпункт петыралтын, райпон кевытше-влак йомыныт. Клуб 2017 ийыште петыралтын. Ик шошо кечын тудын леведышыже сўмырлен.
- Леведышым ме писын вашталтышна, - ойла Эдуард Килинбаев, - но тудо кужу жап ыш шого. Йўдвел могырышто лум шуко шинчеш, тений шошым тывелже ночко лум дене темдалалте. Августышто, шудо деч вара, тудым уэш олмыкташ тарванышна. Ватсапыште да ВК-ште мемнан шкенан группына уло. Тушко ўжмаш дене лекна. Ӱлыл Шогертен гыч кайыше землякна-влакат йўкыштым пуышт. Олмыктымо пашалан ямдылалташ тўҥална, кӧ мо дене кертын - полшен. Пиломатериал дене Ирсай СП администраций вуйлатыше С. Хазиев полшен. Шиферым, саморезым, инструмент-влакым кондышна. Кажне шуматкечын, кок тылзе жап, пашам ыштенна. Паша шуко лийын, леведышым ронченна, шояк-влакым весемденна. Мыняр кертынна, шиферым погенна, тыгак налынна. Ик могыржылан ситен, вес могыржым профнастил дене вакшме. Тӧрза-влакым шындышна. Тудыжым Ирсай школ да Кўшыл Шогертен ял клуб гыч кондымо. Нуныштышт у тєрза-влакым шындыме. Чиялтышна, коҥгам олмыктышна.
Уэмдыме клубышто икымше пайрем мероприятий - Калык-влакын икоян улмо кечышт эртыш. Эдуард Байгазов, ожно тудо ялыште клуб вуйлатышылан ыштен, кызыт Ирсай школышто водитель улеш, пайремыш музиканым конден. Тудын шоктымыж почеш ял калык шер теммеш куштен да мурен. Ончыкыжым ме тўрлє пайрем-влакым - Аван кечыжым, У ий пайремым, 23 февральым, 8 мартым да молымат клубышто эртараш шонена.
Клубым олмыктымаште кугу полышым Ирсай сельсовет СП-н депутатше, Ӱлыл Шогертен ялыште илыше Людмила Саляева ончыктен.
- Мемнан ончыкылык планна - клубнам уэш пӧртылташ да тудым уэш пашаш колташ, - манеш Людмила Петровна. - Ялыште илыше-влаклан клуб кўлеш. Вет клубышто тукым кокласе кыл пеҥгыдемеш, вашла келшымаш вияҥеш. Сандене ончыкыжым ялыште илыше-влакын, Ирсай сельсовет ден Мишкан район администрацийын, культура пӧлкан полышыштлан ўшанен кодына да клубна тичмаш праван тўвыра учрежденийыш савырна манын шонена.
Светлана ТОЙМУРЗИНА.

Ял клубын пўрымашыже
Ял клубын пўрымашыже
Ял клубын пўрымашыже
Ял клубын пўрымашыже
Ял клубын пўрымашыже
Ял клубын пўрымашыже
Автор:Светлана Тоймурзина