Марий ИКЦ-ште ямле концерт эртен

Уремыше чарныде йўштӧ йўр йўрын гынат, Марий историй да тўвыра рўдер кєргыштє пайрем шўлыш ден алал кумыл озаланеныт. «МуроЭм» ансамбльын юбилейже вашеш концерт тўҥалтыш гыч мучаш марте марла эртен. Муро-влакат марла гына йоҥгалтыныт. Саламлыше-влакат марла ойленыт.
«МуроЭм» ансамбль вич ий ончыч Марий историй да тўвыра рўдер пелен шочын. Тудым Алексей Ибулаев (Васли Ольош) вуйлата. Алексей Васильевичым районыштына веле огыл, пўтынь республикыште да моло кундемлаштат сайын палат. Тудо Марий историй да тўвыра рўдерын тўҥ специалистше улеш. А. Ибулаев шкеже Караидель районысо Шопкер ялыште шочын-кушкын. Уста музыкант да мурызо улеш, ятыр семўзгарым шоктен мошта. Тыгак шке кидше дене шўвырым, кўслем, ковыжым, шиялтышым ышта. Эше кеч-могай мероприятийым устан да сылнын вўден кертеш. Тидым ышташ мыскара койышыжо да кумылым савырен моштымыжо полшат. Икманаш, чолгалыкше нимучашдыме.
2017 ийыште «МуроЭм» ансамбль лач тудын тыршымыж дене шочын. Кодший ансамбль «калык» лўмым сулен налын.
Ансамбль кызыт кандаш еҥ гыч шога. Нунын денат изишак палдарыде ок лий. «МуроЭм» ансамбльын ик эн чолга мурызыжо – Галина Баширова. Тудо мурызо гына огыл, тыгак шке сынан поэтесса улеш, «Чон ўжеш муралташ» да «Чон ўжеш муралташ – 2» почеламут сборник-влакым савыктен луктын. Ансамбль Галина Ялкаевнан тиде сборникыш пурышо икмыняр мурыжым мура.
Галина Алексеева Кўшыл Шогертеныште ила. Тудо кужу жап Ирсай кыдалаш школышто туныктен, пашан ветеранже, БР просвещенийын отличникше улеш.
- Мый ончыч школ ансамбльыште муренам, - ойла Галина Вениаминовна. – «МуроЭм» ансамбльым ыштыме нерген колынамат, тышке толынам. Репетиций-влак мыйын кумылем нӧлтат. Кажне выступлений шулдыраҥда. Ме сценышке куанен да чон вургыжын лектына. Вет сценыш лекмеке, ончышо-влакын кумылыштым волташ ок лий. Алексей Васильевичлан мемнам сайын туныктымыжлан кугу таум ойлем. Тудо мыланна музиканым шокта, кўлеш гын, шкат пырля муралта.
Тамара Муртазина 27 ий рўдӧ районный библиотекыште ыштен. Тудат изинек мураш йӧрата. Пашам ыштымыж годым Тамара Нуримановна районысо Культура дворецын хорыштыжо мурен.
Ансамбльыште тыгак Раисия Федько, Раита Шамсутдинова, Татьяна Саметова, Мария Тойметова, Снежана Яшкина мурат. Нунат изинек мураш йєратат да «МуроЭм» дене уло чонышт дене кылдалтыныт.
Юбилейный касыште ансамбль ончышо-влакым кандаш муро дене куандарен: «Ямле шошо кастен», «Ӱшанен вучем», «Лўмешет мурем», «Тый шарнет мо?», «Маска, маска кугыза», «Идым шеҥгел сӧремыштет». «МуроЭмым» саламлаш тиде кастене Мишкан район МР администраций вуйлатышын икымше заместительже Лариса Александрова, «Эрвел марий» Мишкан районысо национально-культурный автономийын председательже Валерий Байбулатов миеныт.
Марий мурызо да ансамбль-влак икте-весышт дене пеҥгыде кылым кучат. Тиде кастене юбиляр-влакым саламлаш БР культурын сулло пашаеҥже-влак Светлана Каншаева, Валерий Садретдинов, «Ӱжара», «Акарт», «Мишкан сем» мурышо калык ансамбль-влак, Олесия Мусалина да Вероника Исеметова мурызо-влак миеныт да шкат сценышке лектыныт. Пайремыште мўндыр уна-влакат лийыныт - Благовещенск район гыч «Оҥгырйўк» фольклор калык ансамбль толын. Концерт программым палын Марий ИКЦ пеленсе «Шўвыр-тўмыр» дуэт (Алексей Ибулаев ден Станислав Салиев) сєрастарен. Тиде дуэт шукерте огыл «Кече почеш илыше» («Живущие по солнцу») тўнямбал фестивальыште Гран-прим сеҥен налын. Погынышо-влакын шўм-чонышкышт чолгалыкым «Эрвел» куштышо калык ансамбль пуртен.
Пайрем, поро марий йўла почеш, келшымаш кандырам пунымаш – «тывырдык» куштымаш дене мучашлалтын.
Светлана ТОЙМУРЗИНА.