Илышыште шке вержым муын

Владимир Ильич шкенжын вержым культурышто муын – тудо «Акарт» да «Памаш» марий ансамбль-влакым вуйлата, ик гана огыл республик, пўтынь Россий кўкшытан конкурс ден фестивальлаште сеҥыше да лауреат лийын.
Владимир Хамитов 1967 ий 14 декабрьыште У Эшым ялыште шочын. Кудымшо класс гыч Ардаш ялысе школышто тунемаш тўҥалын. 8 класс деч вара Благовещенск оласе педучилищыш тунемаш пурен. Училищым тунем пытарымеке, Чебоксар оласе Чуваш государственный педагогический институтышто музыкально-педагогический факультетыште тунемын. Тунем пытарымеке, Совет Армий радамыште служитлен, тушто оркестрыште шоктен. Демобилизаций деч вара художественный вуйлатыше лийын Калтаса районысо Калмиябаш ялышке пашаш пурен.
1992 ий гыч Владимир Ильич Ардаш ялысе Культура пӧртыштӧ пашам ышта. 1995 гыч 2001 ий марте Марий государственный университетыште тунемын, 2018 ийыште Башкирский государственный университетыште «Менеджмент в сфере культуры и искусства» программе почеш профессиональный переподготовкым эртен.
Владимир Хамитов районыштына утларакшым «Акарт» ансамбльым вуйлатыше семын палыме улеш. Тиде коллективым чумыраш шонымаш 17 ий ончыч – 2005 ий мартыште шочын. Шонен пыштымеке, мурызо-влакым погаш тўҥалме. Коллективыш Эшым да Ардаш яллаште илыше-влак ушненыт. Владимир Ильичлан кугун Галина Эриковна пелашыже полшен, нуно 1997 ийыштак ешым чоҥеныт. Илен толын, коллектив кушкын да районыштына веле огыл, пўтынь республик ден моло кундемлаштат палыме лийын. «Акарт» ансамбль ондак ял калык ончылно выступатлаш тўҥалын, варажым тўрлє конкурслаште вийжым терген. Репертуарже марий калык фольклор дене кылдалтын. Кызыт «Акарт» ансамбльын выступленийже деч посна районыштына ик мероприятият ок эрте манаш лиеш. 2016 ий 10 мартыште тиде коллективлан «калык» лўмым пуымо. Тиде лўмым ансамбль уже ик гана огыл арален.
17 ий жапыште «Акарт» мурышо калык ансамбль ятыр вере выступатлен: Башкортостан Республикысе Балтач, Калтаса, Бурай, Шаран районлаште, Марий Элыште, Чуваш, Татар, Коми Республикылаште, Пермь крайыште, Челябе, Оренбург областьлаште, Моско, Санкт-Петербург, Выльгорт, Нефтекамск, Пўрӧ, Ӱпӧ олалаште да моло вере. Ятыр конкурс ден фестивальыште палемдалтын. Тидым тўрлӧ диплом ден тауштыме серыш-влак пеҥгыдемдат.
Тылеч посна «Акарт» мурышо калык ансамбль мер илышыштат чолган участвоватла, благотворительный концерт-влакым эртарымыжлан Марий Элысе Волжский ЦРБ-н, Пўрє оласе социальный приютын тауштыме серышышт дене палемдалтын.
Ансамбль поснак вургемже-влак дене ойыртемалтеш – нуным мурызо-влак шке ургат: тўрлӧ тўсан солык гыч, ситец да сатин гыч... Кажныжын моторын сєрастарыме ончылакше уло. Тувырыштым тўрлє тўр сӧрастара. Тыгай вургем кеч-могай концертышкат пайрем шўлышым пурта, ончышо-влакын кумылыштым савыра. Тидлан кӧра «Акарт» ансамбльын выступленийже шўм-чонеш кужу жаплан кодеш. Икманаш, коллектив калык муро-влакым веле огыл, калык вургемымат арала. Теве тыгерак Ардаш ялыште марий калык культура аралалтеш. Калык культурым аралымаште Владимир Хамитовын, конешне, надырже пеш кугу. Вет мурызо-влакым чыла тиде пашам шукташ кумылаҥден моштыман.
Владимир Хамитов шуко икшыван ача да ўшанле еш вуй улеш. Нунын куд икшывышт уло. Нунын кокла гыч кумытшо – ончаш налме. Икшыве-влак чыланат «Памаш» еш фольклор ансамбльын участникше улыт. Тиде коллективат районыштына кумдан палыме улеш. «Памаш» еш фольклор ансамбль 2008 ийыште «Еш мозаика» еш калык творчество республиканский фестивальыште участвоватлымыжлан диплом дене палемдалтын, 2016 ийыште - «РФ-се финн-угор тўвыра рўдер» ГРДНТ-н Ижевск оласе филиалжын дипломжо дене, 2017 ийыште – «Шежере» республиканский калык пайремыште участвоватлымыжлан Башкортостан Республикысе Культура министерствын дипломжо дене, 2018 ийыште – Еш фольклор пайремыште участвоватлымыжлан Татарстан Республикысе Культура министерствын дипломжо дене, «Творцы и хранители» еш-родо-шочшо фольклор ансамбль-влак I межрегиональный фестивальыште шымлымаш пашам шуктымыжлан – Марий Элысе Тўвыра, савыктыш да калык паша шотышто министерствын дипломжо дене. «Памаш» еш фольлор ансамбльым чумыраш, тўрлӧ конкурслаште выступатлаш эре Владимир Ильичын Галина Эриковна ватыже полшен да полша. Икманаш, Галина Эриковна пелашыжлан пашалан кумылаҥдышат, икымше полышкалышат улеш.
Кодший Ача кечыште (а тудет Россий Федераций Президент В. Путинын кўштымыжє почеш октябрьын кумшо рушарняштыже палемдалтеш) Владимир Ильич «Отцовская доблесть» оҥеш пижыктыме знак, знак деке удостоверений да БР-се общественный палатын лауреатше грамот дене палемдалтын. Тиде палемдымаш Уфа олаште Конгресс-Холлышто эртен.
15 октябрьыште Марий историй да тўвыра рўдерыште «30 ий сценыште» В. Хамитовын творческий концертше эртен. Тиде концертышке талантан музыкальный вуйлатышын да уста музиканчын усталыкшым аклыше еҥ-влак погыненыт. Концерт родо-шочшо ден лишыл еҥ-влакым ушен шогышо пайрем сынан лийын. Тудо 23 номер гыч шоген. Владимир Ильичым саламлаш да ончышо-влакым творчествышт дене кандараш тиде кечын Благовещенск оласе «Оҥгыр йўк» калык фольклор ансамбль, тале гармонист да мурызо Сергей Зайнитдинов, Мишкан селасе «МуроЭм» мурышо калык ансамбль, Марий Элысе Звенигово район гыч Изи Карина, Марий Элысе Кельмак сола гыч гармонист Валера Гусев ден тўмырзӧ Саша Митяков, Калтаса районысо Амчемучаш ялысе гармонист-влак Иван ден Андрей Петраевмыт, Монар ялын уста гармонистше Юрий Иликаев да моло толыныт. Пайрем концертым Мишкан селасе Марий историй да тўвыра рўдерын тўҥ специалистше Алексей Ибулаев вўден.
Концерт годым шукын верыште шинчен сеҥен кертын огытыл да кушташ лектыныт.
Пайрем кастене уста гармонист да талантан культура пашаеҥ Владимир Хамитовлан шуко шокшо мутым ойлымо да шагал огыл пӧлекым кучыктымо.
Пайрем кас икмыняр шагат шуйнен. Туге гынат, чылаланат шижде эртен. Мучашлан чыланат Марий историй да тўвыра рўдерын фойештыже чолга «тывырдыкым» куштеныт.
Светлана ТОЙМУРЗИНА.