Келшымаш
+19 °С
Пылан
Все новости
Культура
10 Июнь , 15:31

«Марий тўр» кас

Шукерте огыл Нерге ялыште тыгай лўман мероприятий эртаралтын

«Марий тўр» кас
«Марий тўр» кас

2022 ийлан Россий калык-влакын тўвыра югыпогышт идалык лўмым пуымо. Тидлан кӧра Нерге ялыште, марий калыкын ожсо кидпашаже-влак ынышт мондалт манын, «Марий тўр» лўман марий касым эртарыме.
Марий тўр марий калыкын усталыкшым, чон поянлыкшым почын ончыкта. Тўрым тўрлымаш ик эн кугу пашалан шотлалтын. Марий калык тыге ойлен: «Тўр тўрлаш – йыдал тодаш огыл».
Тиде кас чапле пайрем эртараш йӧным ыштыш. Йӧн дене пайдаланен, шке мастарлыкыштым ончыкташ верысе тўрлызӧ-влак толыныт: Мария Гареева, Ольга Ишпахтина, Мария Захарова, Ирина Каншаева, Любовь Шуматбаева, Любовь Яникеева, Любовь Ишпахтина. Нуно выставкыш шкеныштын кидпашаштым конденыт: тўрлымӧ тувырым, мындер ўмбалым, ўстел шовычым, тыглай шовычым, салфеткым, сўретым да молым.
Ожно телым ўдыр-влак кечын иктаж суртышто погыненыт да тўрлє кидпашам ыштеныт. Пашам кастенат – изике але лампе тул дене шуктеныт: шўдыреныт, пидыныт, тўрленыт. Тидын нерген марий касыште мый ойлышым.
Могай шўртӧ, чия-влак улмо, тўр-влакын значенийышт нерген Ольга Саметова каласкален, тудак кидпаша выставке дене палдарен. Пайрем вўдышӧ-влак С. Валиева ден Л. Иванова тиде пашам умбакыже шуеныт. Нуно марий тўр кунам шочмо, ожно мо дене тўрленыт, тўрлымӧ сўрет-влак мо нерген ойленыт палдареныт да тўс-влакын значенийыштым умылтараш тыршеныт. Варажым кидпаша нерген марий калык тушто-влакым туштышна, таҥасен тўрым тўрлышна, мурышна, куштышна. Нерге ялысе библиотекын тўҥ библиотекарьже Л. Иванаева марий тўр-влак нерген книга выставкым ямдылен ыле. С. Яникеева марий калык модмаш-влак дене модыктыш. Ме тиде кас «Патколла», «Чия» модмаш-влак дене да шєргашым шалатен модна. Вара, йыр пєрдын, мурен-куштышна. Касым В. Колумбын марий тўр нерген почеламутшым лудмаш дене кошартышна.
Пайрем марий касыш мийыше-влаклан чылаштланат моткоч келшен. Тыгай ямле мероприятийым эртарымыжлан Л. Ивановалан чон гыч лекше тау мутым ойлена.
М. ГАРЕЕВА, Нерге ялысе тўҥалтыш ветеран организацийын председательже.

«Марий тўр» кас
«Марий тўр» кас
«Марий тўр» кас
Автор:Вячеслав Камилянов