Керемет – калыкым тушман деч аралыше
Кереметым ятыр вере осал шўлышлан шотлат, но, тиде культым сайрак шымлаш гын, тудын марий он-влак дене кылдалтмыже рашемеш
Ондак рашемдена: керемтыште кунам кумалаш лектыныт да тудын дечын мом йодыныт.
Мишкан районышто кереметыште кунам кумалмым сайын шарнат – кундемыштына эн кугу - Султан кереметыш Кўсӧ кумалтыш деч вара тошто тылзе годым лектыныт. Моло, изирак кереметлаште шыжым, тыгак тошто тылзыште кумалыныт. Керемет-влак деч утларакшым эмлалташ (йоҥылыш пашам ыштымылан керемет логал кертеш маныныт), родо-тукымлан сайым пуэн шогаш йодыныт. Икманаш, тыныс илыш годым кереметын значенийже кугу лийын огыл, но сар ылыжме годым тудет кенета калыклан эн чот полшышо вийыш савырнен. Мутлан, сарыш кайыше-влак арален кондыштараш лач шочмо кереметышт дечын йодыныт. Илыше кодыжо манын, тудлан тагам але моло вольыкым лўмденыт, тиде вольыкым кереметлан сар гыч пєртылмеке тауштен пуэныт. Эше, сар кужу жап пытен огыл гын, тудын дечын сєгышым чараш йодыныт. Тыге, мутлан, Калтаса районышто ыштеныт. Чыла тидым шотыш налаш гын, керемет-влак Сар юмылан лишыл лийыт. Но Сар юмо икте веле, а керемет-влак шукын улыт да чылаштынат посна лўмышт уло. Тидлан кєра кереметым, чын лияш гын, керемет-влакым, Юмын антиподшылан шотлаш ок лий. Мутлан, мландым ыштыме нерген ик легендыште Юмо ден Керемет изак-шоляк улыт да тушто кокымшет осал улеш. Но легендыште могай керемет нерген ойлалтеш? Лўмдымӧ керемет мо? Тыгайже вет лийын ок керт – нуно чыла лўман улыт! Вет кумалтыш годым керемет дечын: «Керемет, тидым-тудым пу», - манын огытыл, а лўмжӧ дене ойленыт. Мутлан, «О, Султан тєра (он)!», «О, Аксылтан керемет!». Икманаш, кажне кереметын посна лўмжӧ уло, а керемет шомакше нуным ик радамыш пурышо вий улмышт нерген гына ойла. Керемет лўман керемет лийын огыл.
Тыште палемден гына кодаш кўлеш: керемет – чылт марий шомак огыл, тиде тюрк-влак дечын пурышо мут. Мутлан, Алтайыште але мартеат кёрмёс-влакым жаплат. Тиде культым шымлызе-влак кёрмёс-влак сарзе он-влак дене кылдалтмыштым палемдат. Очыни, ожно сарышке тюрк-влак сарзе-влакым тукым - кёрмёс-влак дене погеныт, тидын годым кажне кёрмёсын посна аралышыже – чынжымак илыше але мифический герой лийын. Юл Булгарийыштат сарзе-влакым, очыни, лач тиде система дене погеныт. Тидлан кӧра чуваш, марий да одо-влак коклаште керемет культ кумдан шарлен.
А ожно марий-влакын тыгай культ лийын але уке? Лийын. Вет марий йўлаште керемет-влак деч посна кугурак-влак улыт. Кугурак-влак Курык кугыза-влак дене иктак улыт манына гынат, йоҥылыш она лий. Нине культ-влакым пеҥгыдын «сарзе он-влакым жаплымаш» («культ военных вождей») манын кертына. Икманаш, кугурак, курык кугыза да керемет-влак ик – шочмо калыкым аралыше, сарыште полшышо вий улыт. Тидым легенда-влак рашемдат. Теве Султан керемет нерген легенде гыч ужаш:
...Курманай ден Кугу Соказа кундемыште кредалмаш кум кече шуйна. Тушман тиде кредалмаште уло вийжым йомдара, кодшо сарзыже-влак чакнат да савырнен куржыт. Марий-влак нуным Пўрє ола марте поктен колтат. Тыге кугезына-влак тушманлан карум пуат да шочмо кундемнам арален кодат.
Но кугу сеҥымаш неле ойго дене йӧрналтын – ик чашкерыште кредалмаште вуйжым пыштыше Султаным муыт. Чолга патырым тушанак тоят. Кажне ийын тошто тылызын тиде верыш марий калык Султаным шарналташ да жаплаш кошташ тўҥалеш. Кызыт тиде верым – «Султан тӧра», «Султан кумалтыш маныт». Теве тыге Султан кумалтыш лектын…
Чоткар (легенде почеш, XIII курымышто илен. Чоткар Кабаксола ялыште - кызыт Юлсер кундем - сонарзе ешыште шочын) нерген легенде гыч ужаш:
« – Шергаканем-влак! – каласен Чоткар. – Мый кужу жап иленам. Колаш жап толын шуын. Мыйым йӧратыме Элнет воктен кўкшӧ курыкышто ужатен тойыза.
Еҥ-влак ойгаҥыныт да шортыныт. Чоткар патыр дене чеверласымаш шучко лийын. Чоткар нуным лыпландарен.
– Ида ойгыро. Тыланда йєсєлиеш гын, мый декем чоҥгашке толза да йўкын кычкыралза: «Чоткар, Чоткар! Мемнам тушман чактара!» Мый кынелам да нуным поктен колташ полшем. Но шарныза: ўжаш мыйым эн неле жапыште кўлеш, кунам шке вий дене тушманым нигузеат сеҥаш огеш лий».
Чоткар марий калыклан кужу жап полшен шогаш тўҥалеш ыле, но ик эрге тудым арам кынелтен.
«...Эшполдо Чоткарын шўгарышкыже каен да корнышто кугызам вашлийын. Эшполдын шонен пыштымыжым пален налмек, чал кугыза каласен:
– Ит кошт тушко, ок лий. Арам кынелтымылан Чоткар иралта, тый тудым лунчыртет гын мыланна кокымшо гана полшаш ок нєлталт. Тунам тушман мемнан мландым сорлыкла.
Эшполдо кугызам колыштмек воштыл колтен.
– Те, шоӧго-влак, чылам шекланеда да эре чыла деч лўдыда.
Тудо кугызан ушан ой-каҥашыжым колышташ шоненат огыл. Чоҥгашке шолыпын кўзен да кычкыралын:
– Чоткар, Чоткар! Мемнам тушман чактара!
Тудо эше кычкырал колтенат ыш шукто, кўдырчӧ рашкалтарыш, чоҥгата шергылте да шўгар почылто. Чодыраште мардеж пўтырен эртен кайыш, пушеҥге-влакым пўгыртен шындыш. Колоткан петыртышыже шеле, шўгар гыч Чоткар патыр лекте.
Тудо тыгаяк кугу да куатле лийын. Чал ўпшӧ ший гай йолген, ош пондашыже оҥжым петырен, кидыштыже неле керде йылгыжын.
– Кушто тушман, кєм кыраш кўлеш? – тудо шинчаж ден ончалын мўгыралтен.
– Нигӧат уке, – лўдын каласыш осал Эшполдо. – Мый палынем веле, чыным мо ойлат тыйын нерген…
– Мом тый ыштышыч, пиалдыме йоча! – ойгаҥын каласыш Чоткар да шке шўгарышкыже эркын волыш…».
Мучашлан Чумбылат нерген легенде гыч ужашым лудаш темлена. Чумбылат (Курык кугыза, Лэмдэ курык кугыза, Курык ўмбал керемет, Кугу еҥ, Курык кугыза, Поро Лемдетÿр Курык Кугыза, Полемдрук Кугыза) – чапым налше марий князь-сарзе, легенде почеш, XI курымын мучашыште илен, да марий мифологийыш «Йўдвел марий кугыжа» лўм дене пурен. Тудын нерген легенде тыгайрак:
«Чумбылатын илышыже кужу лийын, но колаш жап шуын. Легенде каласкала, тудын йырже марий калык шинчавўдым поген чумырген. Нуным Чумбылат шыматен: «Ида шорт, колем гынат, тыланда полшаш тўҥалам. Йєсє лиеш гын, мыйын шўгарем деке мийыза да йукын каласыза: «Чумбылат, кынел! Тушман толын!..». Мый тендам аралаш кынелам»…
…Тыныс илыш икмыняр жап шуйнен, но вучыдымын кенета виян тушман толын лектын. Марий-влак шке патырышт нерген шарналтеныт. Курыкыш куржын толын, тудым чот кычкыралыныт. Курык шелын кайыш, тушеч Чумбылат лектын да имне дене тушман ўмбак керылтын. Тале сарзе тушманым руэн да тошкен пытарен. Вара Чумбылат курык дек пєртылын: тудын ончылно курык почылтын да имньыж ден пырля тудым кӧргышкӧ мӧҥгеш пуртен».
Ынде марий йўлам шымлыше Ю. Калиевын «Сылнымут да тошто» пашаж гыч Чумбылат нерген возымыжым лудаш темлена:
«Чумбулат - Кугурак лийын. Кугуракше - старейшина, он манмым ончыктен. Чумбулатын курыкышто шинчаш койдымо олаже лийын, тушто тудын сарзыже-влак илат манын ўшаненыт.
Кугурак-влакын илымышт эреак курык дене кылдалтын. Чумбулат деч посна, У. Харва эше Турек кугыза, Арын курык патыр, Юл тўр курык кугызам палемда».
Нине возымо-влакым лудын лекмеке, Керемет, Кугурак да Курык кугызан ик вий улмышт рашемеш. Тидым эше ятыр вере керемет-влак лач курыкышто верланыме пеҥгыдемда. Мутлан, Мишканын да Мишкан воктенсе Ирсай ден Метръялын кереметышт-влак лач курыкышто шогат. Мишканын кереметше, але ик кереметше, Мишкан Кугу Курык кугыза манылтын.
Ожнырак Керемет ден Кугуракым, очыни, тыгак шырт маныныт. Арам огыл, ик легендыште возымо почеш, ожно Моржан шырт ден Йўксӧ керемет калыкым таваленыт. Шырт шомакым раш умылтараш неле. Но тудо кок ужаш гыч шогымыжо раш: «ш» да «ӧрт». Икманаш, ала-кєн єртшє – чонжо. Курык марий йылмыште тазалыкым ончыктышо «шу» мут уло. Мут тыгак «шур» да «єрт» шомак-влак гыч шоген кертеш. Ожсо марий йылмыште, марий да саам йылмылаште икгай шомак шуко улмым шотыш налаш гын, «шур» мут кугуракым ончыктен кертын.
Вет саамла «шурр» кугу лиеш. Такшым скандинав мифологийыштат Сурт уло (тул кугыеҥ), но тыште нимогай кылым муаш ок лий.
Ынде Кугурак – Керемет – сарзе оным жаплыме культ кунам шочмым рашемдаш тыршена. Культ ятыр ожсо лийшаш. Вет эстон-влакынат иканаште марий Онар, Чумбылат да Чоткар нерген легенде-влаклан лишыл легендышт уло. Нунуо Кугу Тылльым жаплен илат. Теве легенде гыч ужаш:
Большой Тылль жил в деревне Тыллусте со своей женой - великаншей Пирет - и занимался тем, что возделывал землю на собственной мызе и ловил рыбу, как все жители деревни, хотя был местным правителем. Он часто навещал своего брата (по другим рассказам - племянника Лейгера, такого же великана, на соседнем острове Хийймаа. Тылль был такой большой, что мог ходить пешком по дну моря, а его посох, сделанный из ствола ели, был длиной в 5 саженей, около десяти с половиной метров. Он любил капусту, пиво и баню. Нрав у Тылля был горячий, но душа добрая, и он всегда приходил на помощь людям и защищал их...
…Когда на остров напали рыцари-захватчики, Тылль пошёл с ними биться, но врагов было слишком много, и их главарь сумел отрубить великану голову. Поддев голову на свой меч (по другой версии, взяв под мышку), Тылль пошёл умирать, но перед смертью пообещал встать из могилы и помочь людям, если враги опять пойдут на них войной, - пусть только позовут его. Но озорные дети решили подразнить великана и крикнули: «Тылль, Тылль, вставай, на дворе война!» Великан встал, рассердился, увидев, что его зря позвали, и лёг обратно, поклявшись, что больше уж не вернётся».
Теве тыгай легенде. Тыште марий легенде-влак дене икгайлык раш коеш. Кугезына-влак ожсек шочмо калык верч кредалше, калыкнам аралыше патыр да он-влакым жаплен иленыт. Неле жап толын гын, тушманым сеҥаш полышым лач нунын дечын йодыныт. Эше легенде-влак гыч коеш – нуным арам ўжмаш, кынелтымаш сайлан шотлалтын огыл.
Тыште мом ешараш лиеш? Марий калыкынат ятыр ожно Кугу Тылль нерген йомак сынан легендыже лийын. Очыни, тудым Кугыеҥ але Кугурак маныныт да могай-гынат кугу кў воктене жапленыт. Илен толын, шочмо элым да калыкым аралыше мифический персонаж могай-гынат исторический личность дене ваш кылдалтын. Мутлан, Чумбылат дене. Тюрк калык-влак, мутлан, булгар-влак, толмо деч вара Кугуракым жаплыме культ Керемет-влакым жаплыме культ дене йӧрналтын.
19 курымышто Уржум да Малмыж уездлаште, Г. Я. Яковлевын возымыжо почеш (Религиозные обряды черемис, 1887) эн кугу кереметлан Курык Кугыеҥ (курук-кугу-йынг) ден Кўвар кугыза (кўвар-кугузай) шотлалтыныт. Курык Кугыеҥын статусшо моткоч кугу улмым (Юмын гае) тудлан, ўшкыж да лудо деч посна, аргамакым пуымо рашемда. Мо олҥай, возымыжо почеш, нунылан посна онапу лийын огыл, тудын олмеш мландыш тоям шогалтеныт. Тидын годым кумалме годым «онапует» манын ойленыт: «Теве кугу онапует…».
Онапу олмеш тоям шогалтымаш чуваш-влакын йўлаштым ушештара. Чуваш-влакын Керемет кумалтышышт «Киремет карти» манылтын. Тудын покшелныже онапу кушкын але посна меҥге – «юпа» шоген. Юмыштлан кумалме верыште (учўк) тумо кушкын гын, кереметыште – тумо деч посна кеч-могай пушеҥге. Онапу лийын огыл гын, меҥгым шогалтеныт. Учўкыштыштат меҥге шоген кертын. Но тушто тўҥжӧ дене мландыш шогалталтын гын, кереметыште – тўҥжӧ ден кўшкє (шўгарлаштат меҥгым тыге шогалтеныт). Марий-влакын тыгай сынан тояшт – «керемет тоҥгак» деке ме эше пєртылына, кызыт гын керемет-влакын сарзе-влак дене кылдалтмышт нерген умбакыже возена.
Олык марий-влак Курык Кугыеҥым тыгак йўдвел кугыжа маныныт. Ожно ўшаненыт: тудын шинчалан койдымо сарзыже-влак улыт. Вес ой почеш, тудын курыкышто тыгак шинчалан койдымо олаже уло. Тиде олам шагал еҥ ужын кертеш. Тиде курык воктечын шып гына эртыман, Курык кугыеҥ нерген ойлаш тўҥалат гын, черланен кертат. Икманаш, курыкшо воктене лўмжым пелештет гын, сарыште сеҥаш полшаш ўжмє дене икте лиеш, арам кынелтымылан сырен кертеш.
Уньжа кундемыште кажне кереметын полышкалышыже – витньызыже лийын. Кугурак кереметлан, Курык кугыеҥ ден Кўвар кугыза деч посна Курыктўр керемет шотлалтын. Тыгак У кереметышт, Мўкш шырт кереметышт (Мўкш шырт деке керемет мут ешаралтын), Ял ўмбач коштшо кереметышт лийыныт. Мо оҥай, Г. Я. Яковлевын возымыжо почеш, кудыводыжат керемет-влак радамышке пурен. Эше возен: курык марий-влакын «шырт» лўман ожсо, изи кереметышт лийын. Тугеже, марий-влак чынжымак ожно керемет-влакым шырт манын кертыныт. А шырт мут ӧрт мутлан лишыл улмым Мланде ӧртым тыгак Мланде шырт манмаш пеҥгыдемда (Словарь марийской мифологии, К. И. Ситников). Тиде книгаштак Мланде шыртланат, Мланде єртланат шем ўшкыжым (Мланде єртлан тыгак шем тагамат пуэныт) пуэныт манын возымо. А икгай вольыкым пуэныт гын, ик водыжак лийшаш улыт.
Керемет-влакым курык марий-влакат жапленыт. Нунын куграк кереметышт Кўртньӧ водыж манылтын. Лўмжє сарзе улмыжым пеҥгыдемда. Кўртньє водыжын аваже, эргыже, толмачше але поч кучен коштшыжо улыт. Южо еҥже «поч кучен коштшыжо» мутым колмеке, Кўртньӧ водыж почан лийын манын шона. Тиде, конешне, тыге огыл. Поч кучышо, кызытсе йылмыш кусараш гын, «знаменосец» лиеш. А молан тудым поч маныныт? Тиде, очыни, тюрк влияний. Мутлан, Крымский ханствын сарзыже-влакын тистышт (знамяшт - «бунчук») йыпыш пижыктыме имне поч сынан лийын. А тюрк-влакын тистышт «тугъ» манылтын. Мо оҥай – тиде мут мемнан йлымыштына аралалт кодын: мутерыште «ту» мут уло, тудо лач тистым, знамям ончыкта.
Тиде ту Кўртньӧ водыжын – курык марий онын Булгарийыште але Озаҥ ханствыште кугу да эрыкан он улмыжым рашемда. Туштыжо ик поч гына кечен гынат, Кўртньӧ водыж (чын лўмжӧ раш огыл) кундемыштыже йозакым шке поген да Булгарийыш але Озаҥыш тушечын икмыняр ужашыжым гына колтен. Тюрк-влак знамя-тушко ўшкыж почымат сакен кертыныт.
Тыште ешарыде ок лий «ту» («тугъ») шомакым тюрк-влак шкат кўсынленыт. Мут Китай гыч толын. Китай-влак армийыштын эн кугу знамяштым «ду» маныныт. Тюрк-влак поч кучышым – знаменосецым «тугчи» але «туглуг» манмашат шоналташ тарата. Марий тулар да тулаче мут-влак лач тиде шомак дене кылдалтын кертыныт.
Курык марий-влак, Кўртньє водыж деч посна, Кўрсер водыжым (тыгак эргыже, аваже, толмачше уло), Ер водыжым, Яуш кереметым, Икса кереметым, Юнгывуй кереметым (Юнга – эҥерын лўмжӧ) жапленыт. Г. Я. Яковлев кудыводыжымат тиде радамыш пуртен. Тидым умылтараш лиеш. Вет кудыводыжат ала-могай шонен лукмо шўлыш огыл – а ондак суртлан але тукымлан негызым пыштыше еҥ лийын. Мутлан, сурт олмышо пӧртым чоҥышо икымше кугезе. Тудын чонжо, керемет – кугурак семын, шке тукымжым арален.
Оҥай, Кугунур ялыште илыше санчур марий-влакын Моисей да Елисей лўман кереметышт лийыныт. Нунылан идалыклан кок гана – майыште да октябрьыште (кугарнян) тага, ўшкыж але талгыде дене кумалыныт (МКМ 1991,114). Тыште ме мом ужына? Мишкан районышто кереметышке Кўсӧ деч вара гына лекташ тўҥалыныт гын, Марий Элысе южо кундемыште – майыштат. Икманаш, йўла изишак ойыртемалтын. Мутлан, Султан кереметыште К. И. Ситниковын Марий мифологий мутерыштыжат кунам кумалме да Султан кереметлан мом пуымо нерген возымо: «Султан «султан», Султан кереметь «кереметь султан». Кереметь. Культ С. широко распространен среди мари, испытавших тюркское влияние (Акцорин 1991,273). С. - «татарский» кереметь. Жертва - рыжий бычок в июле, после кўсӧ. Жертвоприношение устраивается в отдельной роще, поскольку считается недопустимым молиться чужому кереметю в той же роще, что и своим (Sebeok 1956,104)».
Кўртньӧ водыж ден Кўрсерлан, тыгак нунын ешыштлан, кумалтыш ойыртемалтын. Нунылан куд изи киндым, куд нужголым але нуранголым (нуран, сўгӧ – стерлядь), куд аргамакым – имне сынан куд пряникым (марлаже, очыни, вес тўрлын манылтын. Но Г. Я Яковлев «пряник» манын возен) пуэныт. Коклан пряник-влак моло вольык але юто сынан лийын кертыныт.
Ожнырак, очыни, нине керемет-влаклан талгыде-влакым пуэныт. Но, илен толын, талгыде-влакым имне але моло вольык, юто сынан пряник-влак вашталтеныт. Коклан Кўртньӧ водыж ден Кўрсерлан чын тага ден лудымат пуэныт. Мо оҥай: юмо-влаклан эре посна вольыкым пуэныт гын, мутлан, Кугу Юмылан – талгыдым, аргамакым, Юмын пиямбарлан – ўшкыжым, Юмын авалан – ушкалым, Юмын шукчылан – тагам, керемет-влаклан – тўрлӧ вольыкым але ютым. Кумалтыш-влакым ужшо-влакын мутышт почеш, кереметлан могай вольыкым пуаш рашемдашлан салмашке вўдым пыштеныт да тушко вулным левыктен веленыт. Вулно вўдыштє могай сыным налын, тудлан тугай вольыкым пуэныт. Янаул районышто кызыт вулным товарышке велат. Но тушто, кереметлан кумалмым чарнымылан кӧра, тыге Кугу Юмылан могай вольыкым пуышашым рашемдат. Кугу Юмылан талгыде-влакым пуымым молан чарныме чылалан раш лийшаш. Кӧ ок пале, ушештарена: совет жапыште имне-влакым чыла колхозыш поген налыныт, тидлан кӧра талгыде-влакым Юмылан пуаш йӧн йомын. Мом ойлаш? Марий-влак кумалашат шонымышт семын лектын кертын огытыл. Тидлан кӧра Кугу Юмыланат тўрлӧ вольыкым але ютым пуаш тўҥалыныт.
Ме уже возышна – кереметыш посна жапыште гына кумалаш лектыныт. Но айдеме кенета, мутлан, телым черланен гын, мом ыштеныт? Тыгай годым сук, чук манме посна йўлам шуктеныт.
Суклан чўчкыдын черлын тувыржым але моло вургемжым ойырен налыныт, презым але ўшкыжым пуаш сєреныт гын, тудым вўден кондыштарыме кандырам пыштеныт, тагам пуаш сӧреныт гын – межшым. Имньым пуаш сӧреныт гын – ний сорлыкым. Пурам шолташ сєреныт гын, лустыраш полтым да ложашым кылденыт. Икманаш, сук тўрлӧ ужаш гыч шоген кертын. Тиде пўтыркам клатыште але кудышто сакеныт. Кереметыш кумалаш лекме марте тудым тўкален огытыл. Кумалтыш деч вара йўлатеныт. Г. Я. Яковлевын возымыжо почеш, ятыр шымлызе керемтлан лач тыгай пўтыркам шотлен.
Сукым тыгак вучыктым але сӧрым маныныт. Кугурак але кереметлан сєрымє годым южо вере кудышто, пєрткоклаште але клатыште тўрлє арверым: товарым, сорлам сакеныт.
Ынде керемет-влак шотышто изирак иктешлымашым ышташ лиеш. Нуно нимогай осал шўлыш огытыл, а калыкым аралыше єрт улыт да марий патыр да он-влак дене кылдалтыныт (чаманаш кодеш, кереметлашке миен локтенытат, но тыште титакше кереметын огыл, а локтызын: локтызо тудым арам тарватен, шыдештарен да «шыдыжым» иктаж еӧ деке ондален виктарен, варажым шкат эӧгекыш логалын). Керемет марий шомак огыл гынат, кугезына-влак ожнат патыр да он-влакым жапленыт да неле жапыште тушманым сеӧаш вийым да полышым, сарыште илышым арален кодаш полшаш лач нунын дечын йодыныт.
Но южо вере керемет-влак ожсо ала-могай юмо але Ош Юмын вес сынже дене ик вийыш ушнымо шижылтеш. Ик вере кереметлан ош тўсан вольыкым пуаш тыршеныт гын, вес вере – шем тўсаным. Шем тўсан вольыкым пуымо нерген Медведево районысо шымлызе М. Иванов воза. Онапу олмеш тоям шогалтымашат керемет-влакын Юмын вес сынже – Йын але Йоон дене кылдалтмыже шижылтеш. Вет ик марий легенде почеш, тўням Юмо ден Йын ыштеныт. Коклан тиде Йын Керемет лўмым нумалеш. Юмо легендылаште кече дене кылдалтын гын, Йын але Керемет – ўмыл, йўд, тылзе дене (Юмо да Йын (Йоон) нерген лишыл жапыште посна статьям возена). Кызытеш иктым гына каласен кодена: ожно кугурак, шырт да керемет-влак Йын дене христианство толмеке гына кылдалтыныт. Моланжым умылаш лиеш. Вет Юмо илышым пуышо, илышым тӧрлышӧ вий улеш гын, Керемет – сарыште полшышо, кудыжым арам кынелтыман огыл. Тидлан кєра шуко вере тудлан онапу лийын огыл, а тоя шогалталтын. Кереметлан лўмлалтше меҥге сынан тоҥгак (укшан), М. Ивановын возымыжо почеш, ожно кажне оралтыште шоген. Мо оҥай, меҥгым але укшан пырням южо вере Юмын тошкалтыш маныныт, а моло вере – Керемет тоҥгак. Тыгай укшан меҥге (моло вере тыгак шопшар маныт) метрат пеле кўкшытан лийын. Тудым утларакшым кож гыч ыштеныт. Коклан – пўнчє, тумо, пиште, куэ гыч.
Тыгай Керемет тоҥгакым оралтыште кўнчен шогалтеныт. Коклан – сурт деч тораште огыл. Икманаш, тиде укшан меҥге йыр яра вер лийшаш лийын. Южгунам тоҥгак монча воктене пакчаште (монча ожно эре пєрт деч тораште ышталтын) шоген кертын. Совет жапыште тыгай тоҥгакын укшышкыжо иктаж арверым кошташ сакен кертыныт. Но шоҥгырак-влак тушан нимат сакаш огыл кўштеныт. Суртышто иктаж-кӧ колен гын, тиде тоҥгак гыч (кечен гын) чыла арверым поген налыныт. Ты жапыште тушто нимат лийшаш огыл улмаш. Колышын ныллыже годым тушак тудын вургемжым сакеныт.
Керемет тоҥгакын эн кужу укшыжо йўдвелке – Шўдыр (Кавамеҥге - Полярный шўдыр) деке ончышаш лийын. Вет тиде шўдыр Юмын ўдырын шўдыржылан (веретено) шотлалтын. Кава рўдысє Шўдыр деке ончышо укшым Керемет нер маныныт (Але Йын нер, Йоон нер). Южо вере Керемет тоҥгак укшдымат лийын кертын, тыгай годым тудын йўдвел могырныжо тисте (тисте – тукымын знакше, тамгаже) пўчкылтын. Тиде меҥге ден тисте суртышто илыше-влакым йўд - йўдвел тўня деч араленыт, а йўдвел колышо-влакын тўняштлан шотлалтын. Кугече да Семык годым тыгай тоҥгак унала кугезе-влакын чоныштлан «суртышкышт» корным ончыктен.
Икманаш, Медведево районышто керемет-влак Йўдвел каван ятыр функцийжым шке ўмбакышт налыныт. Тидлан кєра вольыкымат нунылан лач шемым пуэныт.
Медведево районышто керемет-влаклан шем тўсан вольыкым пуаш тыршеныт гын (а Какшан да Юл воктене илыше-влак кол дене кумалмым ойлат), Виче (Киров) кундемысе марий-влак – ошым. Татартсан кундемысе Кукмор ялысе Княгор ялын шочшыжо Вячеслав Афанасьев керемет нерген тыгайрак серышым возен колтен:
«Еҥ-влак огыт шинче кугу вольыкым пуымым. Эртак комбо, лудо лийын. Мемнан кочана лудым кў вўд дене чиялтен ошыш! Вот! Бавай кўйым вўдыш чыкен шолтен – тыге ош порым ыштен. Кочам лудым муын кертын огыл ошым, сандене сур лудым кў пор вўд дене чиялтен. Кумалтыш годым тугак кычкырен:
- О, Мэраш Кэрэмэт! Ошат- ошо лудым пуем, коят-коям... Пунжат ош кава лум гане... Шылжат пешак коя, перкан... Авызлаш пыштем, ончык луктын уло чон дене моктем…
Ожно рекрут йодын шке кэрэмэт дечын але, кунам шукын лийыныт, ял кэрэмэт дечын. Родо-тукым гычын кум еҥ миен шогалын кече вашеш. Ше‰гелне рекрут-шамыч шогеныт. Каласеныт, кє толын, молан толын. Почаш ойым йодыныт. Онапун йырже кече почеш кум гана калтай дене савырненыт. Капка ончылан каласеныт, кє толын. Кажныже тыге ыштен. Вара кугурак миен онапу деке, адак пелештен, кылден ний ўштым але лывырге пиште укшым. Вара кодшо ратым шуктеныт. Чылажлан чыла шып каласеныт: тул ылыжташ, вўд кучаш…».
Тыште ме мом ужына? Виче кундемысе марий-влакын йўлашт Мишкан кундемысе йўлалан лишылрак. Тидлан єршаш уке. Эрвел марий-влакын утларак ужашыже лач Виче эҥер воктеч толын. Арам огыл верысе эн кугу эҥерым кугезына-влак Ош Виче манаш тўҥалыныт.
Мишкан кундемысе керемет-влак нерген сайрак палдараш манын, Х. Паасоненын возымыж гыч ужашым лудаш темлена.
Керемет-влак
Кереметын культшо марий коклаште кугу верым налын шога. Мо але кє тугай Кереметше? Тиде йодышлан марий-влак деч чын вашмутым налын шым керт. Но чыланат ик еҥ семын ойлышт: «Керемет – юмо огыл». Еҥ-влак Керемет нерген мутланашыжат пешыжак кумылан огытыл.
Чорай волостьышто кум тўрлӧ Кереметлан кумалыт. Иктыже – Султан керемет, весыже – Кайык керемет да кумшыжо – Шкенан ончымо керемет. Икымшыже эн кугулан, эн тўҥлан шотлалтеш, пытартышыже – эн изилан.
Султан Кереметлан талукышто ик гана уло волость дене кумалыт. Сандене Кереметлан пуышаш вольыкым налаш оксам волостьыш пурышо чыла ялыштат погат. Кумалмаш Кўсӧ пайрем деч варарак, шукыж годым июль мучаште, эртаралтеш. Кумалме верже Тӧргымдўр ял деч иктаж кум уштыш тораште. Султан кереметлан пуаш йошкар тўсан ўшкыжым кондат.
Кайык кереметлан кок-кум ял дене погынен кумалыт. Мутлан, Тӧргымдўр ден Чорайыште илыше-влак Кайык кереметлан кумалаш посна отыш чумыргат, тудыжо Тєргымдўр деч ныл уштыш тораште верланен. Кум ийлан ик гана ош тагам але лудым пуат.
Кажне насылын (тукымын) тылеч посна шке кереметше уло, тудо Шкенан ончымо керемет але Насыл керемет манылтеш. Тудлан кажне тукым шке отыштыжо талуклан ик гана кумалеш. Мыйын кусарышем ойлыш: тудын тукымжо Тӧргымдўр ялыште кугорно деч тораште огыл верланыше отышто Кўсӧ пайрем деч ондакрак кумалеш (тыште Х. Паасонен кусарышым йоҥылыш умылен кертын – Кўсӧ кумалтыш деч ончыч шуко вере кереметлан огыл, а Кугу Юмылан насыл кумалтышым эртарат, верысе краевед О. Янсубинын погымо материалже-влак почеш, керемет-влаклан насыл кумалтыш-влак шыжым эртаралтыныт). Тыгодым Шкенан ончымо кереметлан ош тагам але лудым пуат. Чоклымо йўла моло юмылан кумалме годымсо деч огеш ойыртемалт.
Мучашлан ешарена: Мишкан районышто керемет-влаклан тошто тылзын кумалаш лектыныт. Тидат нунын сар дене кылдалтмыштым пеҥгыдемда. Тылзе кушмо годым чыла кушкеш, вийым налеш. Ты жапыште сарзе оным жаплаш сай огыл.
Палдарыде ок лий: Султан кереметын, Султан тӧран лўмыштыжє чуваш-влакын тўҥ – «Султи-тура» («Тура-тала») юмыштын лўмжӧ раш коеш. Угарман кундемыште марий-влак Султан тӧра семын Суртаным жаплат. Тыштат чуваш йўла дене кыл раш палдырна. Вет «Султи-тура» пелен тўрлӧ «суратакан-влак» - полышкалышыже-влак улыт. Мутлан, «Чун суратакан тура» – чоным пуышо юмо але тєра, «Сурт суратакан тура» – Сурт юмо але тєра.
Но керемет-влак нерген чыла раш умылашлан, Ош Кугу Юмым вожшым шымлаш да сонарзе-влакын ожно юмышт могай сынан улмым изишак рашемдаш кўлеш. Тунам чыла шке верышкыже шинчеш. Но тидыже йӧршын вес статья лиеш.
Эсен ЭЛАЙ.