«Ме кеҥежымат пашам ыштена»

Кеҥеж – каникул да от­пуск-влак жап. Ты жа­пыште каваште чевер кече шыргыжеш, еҥ-влак тўрлӧ путешествийыш коштыт, йоча-влак уремыште юар­лен тўрлӧ модмаш дене модыт. Но коклан шин­чын каналтыман. Кечывал рўдыштӧ але йўран го­дым урем ден олыклаште куржталаш ок лий, ты жапыште, телефон але компьютер дене модмеш­ке, оҥай книгам лудын лекташ гын, пеш сай лиеш. Тидлан оксат ок кўл – тўрлӧ оҥай книга-влак библиотекыште улыт.

Июнь тўҥалтыш гыч меменан деке, литератур спискым ку­чен, йоча-влак толаш тўҥалыт. Йоча модельный библиотекыш­ке Мишкан селаште да райо­нышто илыше-влак веле огыл, коча да кувава деке унала тол­шо йоча-влакат толыт. Мемнам книгалан кувава ден уныкаже але ака-шўжар, иза-шольо-влак погынен толмаш куандарат. Ме кеҥежлан йоча-влаклан утларак­шым калык йомак, былина, тўр­лӧ йоча писатель-влакын произ­веденийлаштым лудаш темлена.

Тунемше-влаклан келшыше книгам ойырен налаш, кўлеш литературым муаш библио­текарь-влак Л. Байрамова, Е. Князева, Л. Яхина полшат. Но нуно тиде паша дене гына огыт серлаге, тыгак тўрлӧ мероприя­тий-влакым эртарат.

1 июньышто пўтынь Россий Йоча-влакым аралыме кечым палемда. РДК, «Путник» рў­дер, «Еш» БР-се йўдвел-касвел районласе рўдерын верысе от­деленийже дене пырля тиде пайремлан лўмлалтше оҥай мероприятийым эртаренна. Л. Байрамова йоча-влаклан оҥай конкурс-влак ден викто­рина-влакым ямдылен. Меро­приятийыште тунемше да йоча садлашке коштшо-влак тушто кумылын участвоватленыт. 5 ияш-влаклан янлык-влак нерген тушто-влакым туштымо, шко­лышко тений кайышаш-влаклан моло куштылго тушто-влакым туштымо, тўҥалтыш класслаште тунемше-влаклан неле огыл ло­гический задача-влак ден мыска­ра йодыш-влакым ямдылыме. Чын вашмутым пуышо-влаклан посна жетончик-влакым кучы­ктымо. Чолган участвоватлыше изи йоча ден ача-ава-влак изи сувенир дене палемдылтыныт.

Тиде кечын тыгак «Книган кеҥежын юзо вийже» выстав­ка оформитлалтын. Тушто тўр­лӧ палыме да палыдыме кни­гам вераҥдыме. Йоча-влак ден ача-аваштым библиотекышке возалташ ўжын пуртымо.

4 июньышто рўдӧ районный, краеведческий библиотек-влак дене пырля йоча библиотек Тазалык да чолга кужу ўмыр идалыклан лўмлалтше «А тый зарядкым ыштет?» флешмобым эртарен.

12 июньышто Мишканыште Сабантуй пайрем эртен. Тушто йоча модельный библиотек йоча сабантуйым эртараш пол­шен. Пайрем олыкышто би­блиотек пашаеҥ-влак библи­ошатёрым шогалтеныт. Тушто уна-влак шке кидышт дене поро уверым кондышо оҥгыр кур­чакым ыштен кертыныт. Тыгак «Серлагышем, мыйым серлаге» выставке оформитлалтын, тушто серлагыш курчак-влак дене пал­дарыме.

Россий кече вашеш библио­тек пашаеҥ-влак йоча ден под­писчик-влакым VK страницыш (модельный библиотекын тыгай йоча страницыже уло) «Россий­ын 7 юзо верже» виртуальный путешествийыш ўжыныт.

Шарнымаш да ойганымаш кечын VK старницыште ме Кугу Отечественный сар нерген пал­даренна.

Библиотек пашаеҥ-влак VI Тў­нямбал фольклориада дечат єр­дыжеш кодын огытыл. Меропри­ятий вашеш ме сувенир-влакым ямдыленна. Мемнан серлагыш курчакна-влак Йўдвел Македо­нийыш, Палестиныш, Франций­ыш, Перуш, Румынийыш, Бела­русьыш, Эквадорыш чоҥештен каеныт. Тиде кечын ме лач нине эл-влакын культурышт дене па­лыме лийынна.

Библиотекыште толшо-вла­клан «Кид дене ыштыме юзо па­ша-влак» книга выставке офор­митлалтын. Еш, йєратымаш да ўшанле улмаш кече вашеш ме Байрамаловмыт, Байрамовмыт, Изибаевмыт еш-влакын кидпа­шашт дене палдаренна. Тыгак «Пўртўс тайныже-влакым по­чеш», «Изумруд олашке путе­шествий» (А. Волковын книгаже почеш) книга выставке-влак эр­таралтыныт.

Кажне кечын VK страницыште посна рубрика-влак вераҥдалтыт: «Таче могай кече», «Шочмо кечет дене, книга», «Периодический изданий-влак» (йоча-влаклан периодический журнал-влакын у номерышт нерген информаций), «Писательын шочмо кечыже», «Ӧрышешет пўтырӧ» (калык мут-влакын значенийышт).

Кызыт библиотек пашаеҥ-влак лудшо-влакым «Ужар чодыра да чодырасе юзылык нерген» фото­конкурсышко ушнаш ўжыт. Тудо 8 июльышто тўҥалын да 16 ав­густ марте шуйна. Конкурсын ус­ловийже дене VK страницыште палыме лияш лиеш.

Икманаш, кеҥежым йоча модельный библиотекын паша­же ок чарне, тудо ончычсо се­мынак шукталтеш. Ончылно эше тылзе утла жап уло, библиотек пашаеҥ-влакын ты жаплан пла­нышт шуко. Ме шкенан лудшы­на-влакым библиотекыш алал кумылын вучена. Нуным юзо книга сандалыкыш толаш ўжы­на. Йоча модельный библиотек чыландамат вуча!

Л. БАЙРАМОВА.