«Шке вийлан ўшаныман»

Туныктышо-влаклан, пашам сайын ыштымыштлан, тўрлє премий, пашадар деке надбавке, моло материальный поощрений тўлалтыт. 2019 ий гыч ял ден селалашке пашам ышташ толшо самырык туныктышо-влаклан полыш ончыкталтеш. Тений 690 тўжем тенгеаш грантым 150 самырык туныктышо налын. А проект пашам ышташ тўналме жап гычын – 525 ен. Нунылан чумыр шотышто 362 миллион тенгем тўлымє. Тений йоча садысе эн сай воспитатель-влаклан премийым тўлаш тўналме. Тылеч посна, самырык воспитатель-влаклан 50 грантым тўлымє, кажне енлан – 575 тўжем тенге дене. 2019 ий гычын профессиональный образовательный учрежденийлаште тунемше эн сай студент-влаклан посна стипендий тўлалтеш. 2023 ийыште тыгай стипендийын кугытшо 2300 тенге гыч 5000 тенге марте артен. 2022 ийыште, Профессиональный образованийым модернизироватлыме да пашазе тукым-влаклан полышым ончыктымо идалык кышкарыште, 10 эн сай туныктышо да производственный обучений мастерлан 690 тўжем тенге грантым тўлымє. 2023 ийыште тыгай грантым налше-влакын чотышт 20 ен марте артен. 2024 ий январьыште регион вуйлатыше Радий Хабиров БР вуйлатышын Ял ден селалаште пашам ыштыше самырык туныктышо-влаклан грант нерген указышкыже вашталтышым пуртен. У документ почеш тыгай грантым 20 тўжем ен илыме илемлаште пашам ыштыше-влак налын кертыт. Тылеч ончыч йодмаш почеш илемыште 15 тўжем деч шукырак огыл ен илышаш лийын. Мишкан селасе Ф. Буляков лўмеш 1 №-ан лицейыште тыгай грантым шым самырык туныктышо налын. Нунын коклаш Ринат ден Гульназ Ахмадуллинмыт пуреныт. Ринат Ралифовичын паша стажше 14 ий, Гульназ Наильевнан – 13 ий. Гульназ Ахмадуллина (ўдыр фамилийже Сиразова) отличий дене Пўрє оласе 9 №-ан школым тунем пытарен. Ринат Ахмадуллин Мишкан селасе 1 №-ан лицейын выпускникше улеш. 2004 ийыште тудо БирСГПА-н «Технологий да предпринимательство» факультетышкыже тунемаш пурен. Нуно лач институтышто тунеммышт годым палыме лийыныт да икте-весыштлан келшеныт. Лекцийлаште коктын эре йыгыре шинченыт. Институт деч вара Ринат армийыш служитлаш каен. Гульназ шочмо олаштыже пашам ышташ тўналын – РФ ФМС-ын БР-се управленийжын Пўрє оласе отделыштыже загранпаспорт шотышто специалист лийын. Йолташыже пєртылмым уло кумылын вучен. Ринат Оренбург олаште служитлен. Армий гыч пєртылмекыже, нуно мужыраныныт да Мишкан селаште илаш кумыланыныт. Ринат Ралифович 1 №-ан лицейышке пашаш пурен да специальностьшо почеш ышташ тўналын. Тудо кызытат тиде лицейыште ышта, технологийым туныкта. Гульназ Наильевналан специальностьшо почеш паша лийын огыл, тудо 2011 ийыште гына йоча-влак кўчык жап лийме группын воспитательже лийын ышташ тўналын. Ты жапыштак тўналтыш класслаште туныктышылан тунемаш пурен. Ик жап гыч тиде паша лач тудын улмым умылен. Кызыт туныктышо уже кумшо наборым туныкта, вашке тунемшыже-влак нылымше классыште тунемаш тўналыт. 2020 ийыште республиканский да всероссийский школьный олимпиада ден конкурслаште сай результатым ончыктымыштлан Ринат Ралифович ден Гульназ Наильевна, ял ден селалаште пашам ыштыше самырык специалист-влак семын, окса сертификатым налыныт. - Мемнан коллективна творческий шўлышан, чолга улеш да келшен ила, - ойлат Ахмадуллинмыт. – Школ директор Евгений Малмыгин туныктышо-влаклан чыла шотыштат полшаш тырша. Тудо коллективым моштен вуйлата, мыланна инттеллигентность, еным пагален моштымо, профессионализм шотышто сай пример улеш. - Кажне кечын пашам тыршен ыштымыштлан да творческий шўлышан улмыштлан кєра, Мишкан районысо туныктышо-влакын паша лектышышт пеш сай, тунемшына-влак чўчкыдын тўрлє олимпиада ден конкурслаште сенат але призер лийыт, - ойла районысо образований пашаен-влак профсоюз председатель Алена Килинбаева. – Обществым воспитатлыме пашаште туныктышын рольжо моткоч кугу, вет лач нуно самырык тукымлан шинчымашым пуат, могай ен лияш кумыландат. Грант-влак самырык туныктышо-влаклан ойырен налме пашаштлан ўшанле кодаш, шке вийыштлан ўшанаш полшат. Пытартыш ийлаште Башкортостан Республикыште образованийым вияндыме верч шагал огыл ыштыме, тиде паша ик эн кўлешанлан шотлалтеш. Республикыштына («Земский туныктышо» программе шочмо деч ончыч) самырык туныктышо-влаклан грантым эн ончыч тўлаш тўналме. 2019 гыч 2023 ий марте тыгай грантым чылаже 525 туныктышо налын. 2023 ийыште грантым налше-влакын чотышт идалыклан 150 ен марте артен. 2024 ийыштат тыгай грантым 150 самырык туныктышо налшаш.

Светлана ТОЙМУРЗИНА.