Шыже тўҥалмым шижтарыше пайрем

Ме шкеже школышто тунемме жап гычак палена, тиде кече поснак ойыртемалтше. Кугеммекынат идалыкын ик эн тўҥ кечыжым ожнысо семынак палемдена, вет ме ынде шкеже ача- ава, коча-кувава лийынна гынат, икшывына, уныкана-влакым ты кечын школыш ужатен мияш тыршена.
Тений тиде кечын мыланем Йылыш тўп образовательный школышто лияш пиал логале. Кызыт ме игече могай лийшашым ончылгоч пален шогена. 1-ше сентябрь йўран лийшашым пален, ты школышто торжественный линейкым спортзалыште эртараш палемденыт. Спортзал кугу, тушко школышто тунемше-влак чылан погынен кертыт.
Школ зданий, коридор, класс-влак волгалт шинчат. Чыла вере свежа чия пуш шижылтеш. Коридор мучко тунемше-влак тўшкан-тўшкан погынен шогалыныт, мутланат, юарлат. Кеҥеж гоч икте-весыштым чотак сагыненыт, очыни. Икманаш, тожественный линейка тўҥалме деч ончыч школ мўкш омартала гўжлен.
Тений тиде школышто 90 йоча шинчымашым погаш тўҥалеш. Икымше классыш 10 еҥ толын, 14 еҥ индеш классым тунем пытара. Оптимизацийлан кєра Татарбай кыдалаш школ гыч тышке 27 тунемше куснен. Педагогический коллективат у туныктышо-влак дене пойдаралтын. Кокымшо классым Александр Васильевич Апсадиков шке шулдыр йымакыже налын, матем- атикым Анна Даниловна Алессева туныкташ тўҥалеш, историйым Лилия Ямиловна Хизяеван туныктымыж почеш шымлаш тўҥалыт. Тунемше-влакын пиалыштлан школыш тенер толын. Фануз Калимович Вафиев урок деч вара йоча-влакым спртлан шўмаҥдаш тўҥалеш. Такшым тыште йоча-влак чылан спортым йӧратат. А уста тренер нунын спортивный мастарлыкыштым кўшкӧ нӧлташ тўҥалеш. Тидыже вара пиал огыл мо?
… 10 шагат эр. Чылан погыненыт. Физкультурым туныктышо Э. Килинбаев школ директорын заместительже Р. Аймурзиналан пайремым тўҥалаш ямде улмо нерген рапортым пуа. Российын да Башкортостанын гимнышт йоҥгат, флаг-влакым луктыт.
Мероприятийым вўдышє-влак залышке икымше классыш толшо-влакым ўжыт. Нунылан тиде кече ик эн тўҥ, эн чот шарныме кечыш савырна. А нунын икымше туныктышышт Марьяна Анатольевна Аплекова эн кугу йолташышт, эҥертышышт, кокымшо авашт лиеш. Тудо шинчымаш корнын ныл тошкалтышыжым вончаш полшаш тўҥалеш.
Варажым школ директорын заместительже Р. Аймурзина мутым налеш. Тудын паша стажше кугу гынат, тургыжланымыже шижылтеш. Раиса Алексеевна 42 ий школышто ышта, тушечын 39 ийжым вуйлатыме должностьышто. Шкеже математикым туныктышо специальностьым налын. Тудын вуйлатымыж почеш школ районышто эре сай-влак коклаште коштеш, чўчкыдынак призовой верым налеш.
Район администраций лўм дене тунемше ден туныктышо-влакым мланде-пого кыл шотышто секторым вуйлатыше Андрей Алексеевич Аптулманов саламлен.
Икымше классыш толшо-влакын туныктышышт М. Аплекаеван тыланымашыже тыгай лийын: «Тунемза, тыршыза, ида єркане, а мый эре пеленда лиям».
- Ме, ача-ава-влак, эре полшаш тўҥалына, ойго годымат, куан годымат пырля лийына, - ача-ава-влак лўм дене каласен Марина Георгиевна Иркабаева.
Пайремыш толшо Шинчымаш кугыжа (Алиса Эриковна Зайнетдинова) икымше классыш толшо-влаклан экзаменым эртарен. Тўрлӧ туштылам туштен, но йоча-влак чылажланат вашмутым пуэн кертынат. Тидыже кугыжам поснак куандарен.
Шинчымаш элыш пурышашлан йоча-влаклан товатмутым ойлаш логалын. Теве кидышкышт шинчымаш элыш пурымо сравочым налыныт. Тидын годым нунын шинчашт кузе чолгыжмым ужат гын, чоныштышт мыняр куан улмым палаш лиеш ыле. Варажым индешымше классыште тунемше-влак икымше классыш толшо-влаклан пӧлекым пуэныт - азбукым, пеледышым да шарым.
Икымше оҥгыр йўкым пуаш школышто сайын тунемше Ангелина Апкаликова дене икымше класыш толшо Родион Иркабаевлан ўшаненыт…
Салам лийже, у тунемме ий!
Венера АГЛЯМОВА.