Келшымаш
+26 °С
Пылан
Все новости
Образований
22 Сорла 2023, 15:41

Пашажым ӱшанлын шукта

Зинаида Абдулманова Нерге ялысе кыдалаш школышто тўҥалтыш класс-влакым моштен туныкта – изинек илышлан ямдыла.

Пашажым ӱшанлын шукта
Пашажым ӱшанлын шукта

«Тый шарнет, йырым-ваш пеледыш да сем теҥыз шолын. Аван шокшо кидкопаж гыч туныктышо тыйын кидкопатым нале»... Но икымше туныктышо кидкопам гына огыл, тыгак тунемшын изи шўм-чонжым налын да савырен кертын. Тудо ныл ий, поро ава семын, коклан тургыжланен, коклан куанен, изи йочам лудаш да возаш, моло наука ден культурылан да илаш туныкташ тўҥалеш, элнан ончыкылык гражданинжым воспитатла. Ныл ий гыч гын чылажат уэш пӧртылеш. Нылымше класс дене чеверласымеке, чылажат у, ару лаштык гыч тўҥалеш. Тўҥалтыш школышто туныктышын пашаже да пўрымашыже лач тыгай.
Зинаида Александровна илышыжым лач тиде пашалан пӧлеклен да тидлан изишат ок ӧкынӧ.
Тўҥалтыш класслаште туныктышо изи йочам возаш, лудаш, йолташыже-влак дене вашкылым кучаш, илыш йогынышто сай ден удам, поро ден осалым ойыраш туныкта. Тидыже куштылго огыл паша. Но ойырен налме профессийлан ўшанле улмаш, йоча-влакым йӧратымаш чыла нелылыкым сеҥаш полшат. Кӧ нелылык деч ок лўд, илыш дене тӧр ошкылаш тырша да перныше нелылыкым куштылгын сеҥа. Зинаида Александровна, мутат уке, талантан да уста туныктышо, чын педагог улеш.
М. Горький ала-кунам каласен: «Кажне икшывын чоныштыжо койдымо кыл уло, тудым мастар кид дене тўкаш гын, тиде кыл сылнын йоҥгаш тўҥалеш». Тыгай кыл-влакым Зинаида Александровна сайын шижын да муын мошта. Тудо, шкенжын вийжым да пагытшым чаманыде, икшыве-влаклан шке чон шокшыжым пуа. Уста педагог, шке пашажын мастарже, ик тукымым огыл кугурак класслаште тунемаш туныктен. Туныктымашыже ўдыр-рвезе-влаклан кугыеҥ илышыштат полшен. Тудын выпускникше-влак тўрлӧ сферыште тыршат, тўрлӧ вере илат, но нуным чылаштымат икте ушен шога – йӧратыме туныктышыштым алал кумылын шарнен илымаш.
Зинаида Александровнан чын туныктышо улмыжым рашемдыше чыла качествыжат уло: талант, чон шокшо, чолгалык, творческий шўлыш, шкеж деке да моло деке пеҥгыде йодмаш да нимучашдыме чулымлык, тунемше-влакым чын корныш шогалтен да тудын дене виктарен колтен, нуным личность семын вияҥден моштымаш.
Туныктышо тунемшыже-влак дене вашкылым писын муын мошта, нунын проблемыштым сайын умыла да кажне йочам пагала. Туныктышылан тўҥжӧ - икшывын чонжым савырен да шинчаш койдымо усталыкшым муын моштымаш. Зинаида Александровна лач тыгай еҥ улеш. Тудо тыматле койышыж дене кажне йочан чонышкыжо «сравочым» муын мошта, йочан школ илышыже умбакыже сайын шуйнаш тўҥалже манын тырша. Пашаштыже тунемшыже-влакым чылаштымат личность семын пагала, усталыкыштым почаш, тунемаш кумылаҥдаш тырша.
Зинаида Александровна тыгак чулым да уста ўдырамаш улеш. Тудын кабинетыштыже шуко пеледыш кушкеш да тунемше-влак кид дене ыштыме тўрлӧ ўзгар-влак аралалтыт. Зинаида Абдулманова кугу опытан, келге шинчымашан, творческий шўлышан туныктышо улеш. Тыгай туныктышо-влак нерген «чон тул дене» пашам ыштат манын ойлат. Нуно йоча-влакым туныктымо пашалан жапыштымат, тазалыкыштымат огыт чамане. Нине туныткышо-влакын пашаштым нимогай разряд да квалификаций дене аклаш ок лий. Пашаштым тунемшышыштын илышышт акла.
Ю. АЛМИЕВА.

Пашажым ӱшанлын шукта
Пашажым ӱшанлын шукта
Автор:Фирдаус Кадикова