Туныктышо тукым

2022 ий элыштына Профессиональный образованийым уэмдыме, сай паша условий да паша тукым идалык семын увертаралтын. Тидлан кӧра ик пашам ыштыше тукым-влаклан посна верым ойырыман. Вет тыгай тукым-влак ятыр еҥлан сай пример лийын кертыт.
Ардаш ялысе школышто туныктышо семын, мый раш каласен кертам: школыштына туныктышо-влак чыланат шкеныштын пашаштым йєратат да алал кумылын шуктат. Тидлан єршаш уке. Тыште ончыкылык профессийыштым арам огыл ойырен налше еҥ-влак погыненыт. Иктылан туныктышыжо сай пример лийын, весылан йоча-влак дене пашам ышташ келша, кумшыжлан туныктышо лияш пўралтын. Рашрак лияш гын, нуно туныктышо-влак ешыште шочын-кушкыныт да шкеныштым изинек туныктышо семын ужыныт.
Кызытсе туныктышо-влак кокла гыч шукыжым жапыштыже Леонид Алексеевич Бадамшин туныктен. Тудо математикым туныктышо лийын 42 ий ыштен. Ме тудым уста педагог, сай организатор, кажне йоча дене вашкылым муын моштышо класс вуйлатыше да поро чонан айдеме семын палена. Леонид Алексеевич ятыр еҥым математикым йӧраташ кумылаҥден, шкенжын икшывыже-влакланат сай пример лийын. Калык ой почеш, иктаж пашалан усталык ача деч икшывыж деке кусна - лач тыге кужу жап иктаж пашам ыштыше еш тукым-влак шочыт. Тиде ой дене келшыде ок лий. Лач тидлан кӧра Леонид Алексеевичын икшывыж ден уныкаже-влак тудын пашажым умбакыже шуят: Евгений Леонидович эргыже Ардаш ялысе школ директор улеш, тыште математикым уже 18 ий туныкта, Алена Леонидовна ден Алевтина Леонидовна ўдыржӧ-влак тўҥалтыш класслаште 25 ий да 29 ий туныктат, Снежанна Леонидовна ўдыржӧ физический культурым 15 ий утла туныкта, Елена Сергеевна шымше ий ышта.
1967-2004 ийлаште Ардаш ялысе школышто математикым Леонид Алексеевичын шочшыжо Светлана Алексеевна Бадамшина туныктен. Пўсє уш ден усталыкыштым Светлана Алексеевна ден Геннадий Айгузинович пелашыже (тудат математикым туныктен) ўдырыштлан – Эльвира Геннадьевна Васюткиналан пуэныт, тудо кызыт 2 №-ан Мишкан кыдалаш школышто математикым туныктышо лийын ышта.
Елизавета Алексеевна Аптулманова (Бадамшина) Ардаш ялысе школышто тўҥалтыш класслаште 38 ий туныкта, тудо кугу опытан да уста педагог улеш. Елизавета Алексеевнан ўдыржє-влакат аважын пашажым умбакыже шуят: Лариса Владиславовна 32 ий йот йылме-влакым туныкта, Энна Владиславовна Губаева йоча ден самырык-влакым туныктымо пашалан 6 ийым пєлеклен.
Бадамшинмыт тукым икмыняр йыжыҥ гыч шога. Кажне йыжыҥже нерген посна статьям возаш лиеш.
Тиде тукымлан негызым ятыр ий ожно Ахметзян Бадамшинович Бадамшин пыштен. Тудо кумло кум ий математикым туныктен.
Бадамшинмытын чумыр педагогический стажышт 652 ийыш чумырген. Тиде шагал огыл. Тиде тукымлан ончыкыжымат нунылан пўралтме пашаштым шукташ да самырык тукымым эше кужу жап туныкташ тыленана.
О. АПТЫКАЕВА, Ардаш ялысе школ директорын туныктымо-воспитатлыме паша шотышто заместительже.