Шке профессийжым йӧрата

Таче мый уло чонжо дене шке пашаж верч тургыжланыше туныктышо нерген ойлынем. Тиде - биологийым туныктышо Марианна Хайдаршиновна Губеева. Тудо туныктымо пашаште кугу опытан, сай шинчымашан да творчески пашам ыштышан педагог-влак радамыш пура.
Ик профессий южо ешыште тукым гыч тукымыш куснен толеш. Марианна Хайдаршиновна педагог-влак ешыште шочын. Аваже - Любовь Андрияновна - биологийым туныктышо, ачаже - Хайдарша Ахметьянович - биолог. Конешне, ача-аван кышашт дене каен гына сай туныктышо лияш огеш лий. Тидлан эше чон йодмаш кўлеш.
Чорай кыдалаш школым тунем пытарымеке, тудо Бирский государственный педагогический институтышто шинчымашым поген. 1994 ийыште биологийым да химийым туныктышо специальность дене дипломым налын, шочмо школышкыжо пӧртылын. Тиддеч вра 28 ий эртен. Кызыт Марианна Хайдаршиновна - кўкшє категориян туныктышо. Тудын педагогический мастарлыкшым нимогай разряд да квалификаций дене аклаш ок лий. Тыгай педагог-влакым кугу буква дене возалтше Туныктышо маныт.
Тудо шке предметшым пеш сайын пала, шкеж да моло-влак деке пеҥгыде йодмашым шында. Тудын урокшо-влак пашалан тунемме дене гына огыл, а келге шинчымашым пуымо дене ойыртемалтыт. Шке тунемшыже-влаклан тудо мыняр чон порылыкым да куатым пуэн, кажныжлан биологийын законжым гына огыл, а илышын законжым туныкташ тыршен. Тиде тунемме ийыште тудо шкенжын латикымше классше дене чыла эртен: нунылан психолог, туныктышо, йолташ лийын. Тудын выпускникше-влак шке тунемшыштым тауштат. Тудын дене пырля эре поро энергийым налат. Тудым ончен, эре ончыко кайыме шуэш.
Марианна Хайдаршиновна - педагогический этикын, пашам йӧратымын, шке деке да моло деке йодмашын, шке предметшым келгын палымын да тунемше-влак дене пашам ыштен моштымын образецше.
«Пиал тыланда мо тугай?» - йодышлан тудо шоналтыде вашештыш: «Пиал - тиде кажне кечын йєратыме пашам ышташ». А тудын йӧратыме пашаже - йоча-влак дене ышташ.
Туныктымо пашан икымше кечыж гычак тудо умылен - шыргыжмашын вийже вурсымаш да шыде койыш деч кугурак. Тудо йоча-влак дене эре поро кумылан улеш, кажне йочам личность семын пагала да акла. Тудын тунемшыже-влак кажне ийын тўрлӧ конкурс, олимпиада, акцийлаште участвоватлат. Туныктышо ден тунемшын ваш келшен шуктымо пашан лектышыже эре сай лиеш. Тунемшыже-влак могай-гына конкурс ден олимпиадылаште огыт участвоватле, эре призер да сеҥыше радамыш лектыт.
Кужу жап пашам творчески ыштымылан, туныктымо пашаште кўкшє лектышыш шумылан Мишкан район муниципальный район Советын да администрацийын почетный грамотышт дене наградитлалтын. Гимназийын учебно-опытный участкыште шуктымо пашаже сай лектышыш шуэш. 2017 ийыште «Эн сай учебно-опытный участке» всероссийский конкурсын региональный этапыштыже участвоватлымылан диплом дене палемдалтын. 2021 ийыште «Почетный работник воспитания и просвещения Российской Федерации» оҥеш пижыктыме знак ден наградитлалтын.
Тудын шонымыж почеш, туныктышо уста садовник семын йоча чонышто порылыкым куштышаш. Вет тудо айдеме чонын конструкторжо улеш. Марианна Хайдаршиновна йоча-влакым поро пашалан гына туныкта, ончыкыжым чын айдеме лийын кушкышт манын шона.
Мутат уке, туныктышо профессий эре кугу вий-куатым йодеш. Вет нелылыкат, нойымашат вашлиялтыт, ешланат жапым ойырыман. Пелашыж дене пырля кум ўдырым куштат. Марианна Хайдаршиновнан кугурак ўдыржє пўрымашыжым медицина дене кылден. Наташа Башкирский государственный медицинский институтым пытарен, шке специальностьшо дене пашам ышта. Галина - БГМУ-н студентше, а Валерия эше гимназийыште тунемеш.
Туныктышын пуаш кумылжо уло гын, йочан налаш кумылжо эре лектеш. Кунам тиде кок шижмаш иктыш ушна, моткоч сай лектыш лиеш.
И. САЛАЕВА, руш йылмым да литературым туныктышо.