Образовательный учреждений-влакын у тунемме ийлан ямдылыкыштым межведомственный комиссий текшырен. Комиссийым район администраций вуйлатышын икымше заместительже Л. Александрова вуйлатен.
Кум кече жапыште комиссий член-влак кугу пашам шуктеныт. Текшырыме годым молан кугу тўткышым ойырымо? Эн ончычак, школ оралте, спортивный зал, класс-влак, мастерской, столовый, электрооборудований, котельный да олтымо система, школ пакча да моло ончалтыныт.
- У тунемме ий вашеш образовательный учреждений-влакым текшырымаш - тиде образовательный процессын чыла участникшылан шке шотан экзамен, - манеш комиссийын секретарьже, районысо образований отделын ХЭК начальникше Г. Яниев. - Школ-влакым у тунемме ийлан приниматлымаште шуко служба участвоватла. Ме тиде пашашке тийышле ведомство-влакым ушаш тыршена, вет йоча-влакын лўдыкшыдымылыкышт - мемнан тўҥ обязательствына. Идалык мучко йоча-влак санитарно гына огыл, тыгак антитеррористический, экологический да корно безопасность дене аралалтшаш улыт. Тунемме идалык мучко мемнан йочана-влаклан чыла шотыштат комфортно лийшаш. Чыла правилым шуктен толаш гын, сай результатыш шуаш лиеш. Ме образовательный учреждений-влакын педагогический, технический персоналлан, тунемше-влакын ача-аваштлан школым да йоча садым у тунемме ий вашеш олмыктымаште тыршымыштлан кугу таум каласена.
Комиссий член-влак текшырыме годым помещений кєргыштє да школ оралтылаште кажне метржым манме гай текшырат. Тыште изи экшык манме лийшаш огыл, вет приемкын качествыж деч мемнан йочана-влакын илышышт шогаш тўҥалеш. Ик тўҥ йодмашлан образовательный организацийлаште противопожарный да антитеррористический безопасность шотлалтыт. Уремым волгалтарымым, тревожный кнопкын уло-укежым, пече-влакын тичмаш улмыштым да молымат тўткын эскерена.
Текшырымашын итогшо почеш тунемме заведений-влак йоча-влакым приниматлаш ямде улыт. Тачысе кечылан Мишкан районышто 31 школ уло (кыдалаш школ - 10, тўп общеобразовательный школ - 11, тўҥалтыш школ - 10). Районышто тунемше-влакын чотышт кум тўжем наре, тушечын 279 йоча икымше гана школыш толеш, 104 рвезе ден ўдыр 11 классыш тунемаш каят.
Туныктышо коллектив-влак у тунемме ийлан сайын ямдылалтыныт. Чыла образовательный учрежденийыште косметический олмыктымо пашам шуктымо. Чыла образовательный учрежденийыште Интернет уло, Wi-Fi пашам ышта. Поснак райрўдысє 1 №-ан лицейым, Чорай ялысе гимназийым, Ардаш, Пўнчер, Пўрӧмучаш, Иштыбай, Кўшыл Шогертен, Корак, Арзамат ялласе школ-влакым палемдыме шуэш. Текшырыме годым нуно кўкшӧ акым налыныт.
Комиссий член-влак йоча-влаклан школышто лўдыкшӧ уло-укем поснак чот тергеныт. Икманаш, ниможат ӧрдыжеш кодын огыл - антитеррористический безопасность, пашам аралыме, материально-технический база, ПДД да молат ончалтыныт. Школ да йоча сад вуйлатыше-влаклан документацийым, Россий Федерацийын да Башкортостан Республикын законодательствышт дене палдарыше наглядный пособийым шотыш кондаш кўштеныт.
Мишкан районысо образований отдел образовательный организаций-влакын материально-технический базыштым пойдарыме планым ямдылен.
Ме возенна ыле, «Модернизация школьных систем образования» программа почеш 2022 ийыште Мишкан селасе 2 №-ан школым капитально олмыкташ окса пурышаш. Вес ийлан тиде школ пелен 250 ученический верлан пристрой чоҥалтеш. Тиде программа денак 2023 ийыште районышто вич образовательный организацийыште капитально олмыктымо пашам шукташ палемдыме: Мишкан селасе 1 №-ан лицей, 1 №-ан лицейын Нерге ялысе филиалже, Монар ден Кугу Соказа школ-влак, Чорай селасе марий гимназий.
Тиде жаплан «Раш паша» программа дене Кемий школышто тєрзам вашталтыме, Монар школын Корак ялысе филиалыштыже леведышым уэмдыме, Кугу Соказа школлан мебельым налме. БР-ын бюджетше гыч (495 тўжем теҥге) да верысе бюджет гыч (209 тўжем теҥге) пурышо окса дене Монар школышто спортзалым олмыктымо. 4 №-ан йоча садыште зданийын фасадшым, печым олмыктымо. Верысе инициативылан полшымо программа дене Кугу Соказа школын леведышыжым вашталтыме. Тиде программа денак тушто 2019 ийыште олтымо системым тўрыснек уэмдыме.
Кажне ийын школышто тунемше-влак ял озанлык продукцийым куштымо пашашке ушнат. Мотор пеледыш йыраҥ-влакат нунын тыршымышт дене шочыныт.
Йоча сад-влакат куандареныт. Дошкольный учрежденийлаште моткоч уста, творческий еҥ-влак пашам ыштат.
Школ-влакым приниматлыме пашам иктешлыме. У тунемме ийлан ямдылалтме шотышто кыдалаш школ-влак коклаште икымше верыш Мишкан селасе 1 №-ан лицей, кокымшо верыш Чорай ялысе марий гимназий, кумшо верыш Ардаш школ лектыныт. Тўп общеобразовательный школ-влак коклаште Пўнчер школ икымше, Пўрӧмучаш школ кокымшо, Иштыбай школ кумшо верым налыныт. Тўҥалтыш школ-влак коклаште Корак школ икымше верым налын, Кўшыл Шогертен ден Арзамат школ-влак икгай баллым налын, кокымшо ден кумшо верым пайленыт.
Светлана ТОЙМУРЗИНА.