Келшымаш
+24 °С
Йӱр
Все новости
Образований
17 Сорла 2022, 12:17

Профессий илышыште - илыш профессийыште

Марианна Пасечник кум тесте идалык физический культурым туныктышо профессийыште

Профессий илышыште - илыш профессийыште
Профессий илышыште - илыш профессийыште

Туныктымо да воспитатлыме нерген мут лекме годым, мыланем утларакшым «мут ўжеш, а пример почеш вўда» манме ой келша. Лач тиде ой Кемий кыдалаш школышто физкультурым туныктышо Марианна Пасечниклан келшен толеш.
Тудо шке предметшым пала гына огыл, а тудын дене пырля ошкылеш да 30 ий почешыже йоча-влакым вўден кая. Вўда моштен, ончылан шындыме цельыш шукташ тыршен. Сандене ме пеҥгыдын каласен кертына, школ тыгай туныктышо да айдеме дене кугешнен кертеш. А Марианна Емельяновна мыланем школ дене пиал шыргыжын, манеш. Коллектив икоян, келшен илыше, директор дене вашумылымаш озалана, тыгаяк вашумылымаш тунемше-влак дене ышталтын. Тудо йоча-влак дене ик ойым эре муын да кызытат муын шога.
- Тыге лектын, - манеш туныктышо, - мыланем йоча-влакым заниматлаш виеш поктышаш уке, нуным лыпландараш, порядкым кучаш ўжаш огеш кўл: нуно урокыш толын заниматлалташ кўлмым палат да умылат. Мутат уке, йоча - йочак, мый нунын дене мыскарамат ыштен кертам, мокталташат жапым муам. А нуным вурсаш йылмем ок савырне, кугурак класслаште тунемше-влаклан иктым гына каласен кертам, тендан койышда мылам ок келше. Тиде сита.
Мемнан мутланыме жап мучко шижынам, ончылнем шке профессийжым, шке пашажым йӧратыше айдеме. Туныктышо утларакшым шкеж нерген огыл, а йоча-влак, пашаже нерген ойла.
Марианна Емельяновнан ече деке кумылжо ойыртемалтше: ече спорт - тудын специализацийже, шке жапыштыже спорт мастерыш кандидатлан нормым сдатлен. Кызытат ечым йӧрата. Тиддеч посна волейбол да куштылго атлетикылан кугу верым ойыра. А спортын нине видшым Кемийыште поснак пагалат. Шке икшывыже-влакат - Максим эргыж ден Анастасия ўдыржӧ - куштылго атлетика дене Башкирийын чемпионжо да призержо улыт. А эн изи Дарья ўдыржӧ «Тулсавыш» военно-патриотический модмаш дене республикын чемпионжо улеш.
- Мый шке тунемшем-влаклан умылтарем, - ойла Марианна Емельяновна, - спорт мастарлыкым, мутлан, волейбол дене модын моштымым, вачўмбак пыштен нумал от кошт. Те кеч-кушто тунемыда але пашам ыштеда - тендам ужыт.
Шижылтеш, спорт, паша нерген М. Пасечник чарныде ойлен кертеш. Тудын чоныштыжо кок йӧратымаш иктыш ушнен - спорт деке да йоча-влак деке. Мом шкеже пала, мошта - чыла йоча-влаклан пуаш тырша. Тидыжым ыштен кертеш мо? Кертеш. Иктым палемдымат сита, тудо шкеже ече да волейбол дене районный да республиканский таҥасымашлаште чолган участвоватла да тийышле верлам айла. Марианна Пасечник - спортын ветеранже-влак коклаште ече дене республикын чемпионжо. Тидыже эше ик гана ончыкта, физрук шкежат сай формышто улеш.
Физкультурым туныктышылан предметше, пашаже туге чот илышышкыже шыҥен, тудын деч посна иленжат ок керт. Но тидын годымак ўдырамашын тўҥ пўрымашыжым - ешым огеш мондо: тудо пиалан вате, кум икшывын аваже, кок уныкан куваваже улеш. Чылаштлан жапше да вийже сита. Мут толмашеш, йєратыме пелашыж дене, ынде кумло ий пырля улыт, спорт ваш ыштен. Марианнан ўдыр фамилийже - Шамиданова. Шочын Кемий ялыште. 1988 ийыште школым тунем пытарен да Йошкар-Олашке Н. К. Крупская лўмеш Марий государственный педагогический институтыш физический культура факультетыш тунемаш пурен. Ныл ий тунемме жап писын эртен. Тунеммыж годым тўрлӧ таҥасымашлаште участвоватлен. Ик тыгай таҥасымаште ончыкылык пиалжым вашлийын. Ече дене таҥасымаш Кемерово областьыште эртен. Марианна Йошкар-Олан сборный командыштыже лийын, а ончыкылык пелашыже Алексей - Омск олан сборныйыштыжо.
1992 ийыште дипломан специалист шочмо кундемышкыже пєртылын. 1 №-ан Мишкан кыдалаш школышто физкультурым туныкташ тўҥалын. Тиде ийыштак Алексейлан марлан лектын да тудын фамилийжым налын - Пасечник лийын. Ик ий гыч самырык мужыр Марианнан шочмо ялышкыже - Кемийыш илаш куснен. М. Пасечник тренерлан пашам тўҥалын, ондак ече дене, вара куштылго атлетика дене, тидын годымак изирак класслаште физкультурым туныктен. 2011 ийыште физический культурым туныктышо Яков Аймурзинович Апсатаров сулен налме канышыш лектын, Марианна Емельяновна кыдалаш да кугурак класслаште физкультурым туныкташ тўҥалын.
1997 ий гыч Пасечник еш Руш Байбак ялыште ила. Тушто кугу, мотор пєртым чоҥеныт. Тиде ял Кемий деч кок километр тораште верланен. Еш вуй вахта йӧн дене Йўдвел кундемыште пашам ышта. Эргышт да кугурак ўдырышт шке ешым чумыреныт. Максим Уфа олаште ила, тудын Юлия ўдыржӧ кушкеш. Анастасия Сургут олаште ила, тудынат ўдыржє уло, лўмжӧ - Миа. Пасечникмытын изирак Дарья ўдырышт БГУ-н студенткыже.
Пелашыже вахтыште улмо годым Марианна Емельяновна пашамат ышта, суртымат куча. Садым, пакчам онча. А нунын озанлыкыштышт ушкал, шорык, юто улыт. Суртын шокшыжым аралыше мер пашаланат жапым муеш. Марианна Пасечник 20 ий Кемий ялысе 2648 №-ан избирательный участкыште пашам ышта, тушечын 15 ийже ИК-н председательже улеш.
Теве тыгайрак улеш кўкшӧ категориян педагог Марианна Пасечник. Ме тудым Физкультурникын кечыж дене шокшын саламлена.
Светлана ТОЙМУРЗИНА.

Профессий илышыште - илыш профессийыште
Профессий илышыште - илыш профессийыште
Автор:Светлана Тоймурзина