Паша кӱрылтде мия

Паша кӱрылтде мия

Шокшо, ояр игечым вучыдымын шӱлыкан, йӱран игече вашталтыш. Уржа-сорла тӱҥалме годым кажне ийын игечын тыгай

ковыра койышыжо мланде пашаеҥ-влаклан чаракым ышташ тырша. Туге гынат пасу паша шукталт толеш.

Пасу пашаеҥ-влак кажне ояр пагытым пайдалын кучылташ тыршат.

Тидын шотышто «Кштаев С. Ш.» КФХ пашаеҥ-влакым палемдаш лиеш. Озанлыкыште пырчан да корман культурым жапыштыже да чыла йодмашым шуктен ӱдымӧ. Кормам ямдылыше техникым сайын ямдыленыт. Сандене сезон пашалан кыртмен пижыныт.

Мемнан мийыме кечын ял озанлык отделын тӱҥ инженерже Александр Абукаев палемдыш, озанлыкын пасу пашаеҥже-влак кормам ямдылымаште да шурным погымаште палынак ойыртемалтыт. Тидыже тыгак. КФХ-ште шуко тӱрлӧ пашам шуктат. Сандене кажныжлан жапым ойырен моштыман. Вольыкым шуко ашнат. А вольыкым ашнет гын, кормам ситышын ямдылыман.

Крестьян-фермер озанлыкым вуйлатыше Самвел Шекоевич Кштаевым ме шурно идымыште вашлийна. Тушто тудо пасу гыч кондымо шурным приниматлен, оператор-влаклан шурным коштымо да эрыктыме оборудованийлам регулироватлаш полшен. Самвел Шекоевичын озанлыкше кугу. КФХ-ште 700 утла тӱкан кугу вольыкым ашнат, тушечын пелыже утла лӱштымӧ

ушкал. Районышто Пӱнчер ушкал ферма ик эн кугулан шотлалтеш. Тыште фермым теле жаплан ямдылыме паша тӱрыс куат дене мия. Тамбур-влак шокшемдалтыт, кӱвароҥа, кормушка-влак олмыкталтыт. Вольык вича-влакым олмыктымо дене пырля кормам ямдылыме паша мия. Кызытсе жаплан 2 тӱжем утла рулон шудым ямдылыме. Сенажым ситышын аралаш пыштыме. Фермер озанлыкыште кормам кок пачаш шукырак ямдылаш тыршат. Тыге ыштыме дене телым нимогай

проблема деч посна лектыт.

Озанлыкыште тыгак шурным куштат: кокияш уржа, шыдаҥ, шож, шӱльӧ, вика да молат. Шурным ӱдымӧ дене пырля кажне гектарышке ӱяҥдышым норма дене келшышын шавыме. Сандене шурно лектышат кугу. Кокла лектыш гектар гыч 25 центнер. А уржа южо пасушто 40 центнер дене лектын.

Озанлык вуйлатыше уста водитель А. Петросяным, пашан ветеранже-влак, шурно идымыште ыштыше Н. Ирбулатовым,

С. Сайпушевым, механизатор-влак Э. Парсаевым, Г. Якуповым да молымат сай могырчын гына палемда.

Кызыт механизатор да идым пашаеҥ-влак оборудованийым пасу гыч шурным вашлияш ямдылат.

В. КОНДОГИН.