Келшымаш
-13 °С
Пылан
Все новости
Ял озанлык
7 Сорла 2020, 14:17

Мландым йӧратен

Инвестор Тимофей Геннадиевич Родныхлан мишкан мланде шочмо верышкыжак савырнен

Мландым йӧратен
Таче фермер озанлык предпринимательствыште ик эн пайдале корнылан шотлалтеш. Сандене Москваште илыше Тимофей Родных агробизнесыш инвестицийым пышташ кумылаҥын.
Тудо яра верыште пашам тӱҥалын. Йолташыже, Мишкан районын шочшыжо, крестьян-фермер озанлык вуйлатыше Сергей
Васюткинын темлымыж почеш Тымбай сельсовет сельский поселенийыште мландым арендоватлен.
Пасу корно дене эртыме годым обрабатыватлыме мланде, пасула кокласе тӧр межа чоным куандарат. Шӧртнялге тӱсан уржа пасу теҥызла ловыкталтеш, шыдаҥ шыркам колта, йытын пасум ончен шер ок тем. Верысе шоҥго-влакын мутышт почеш, Тымбай кундемысе мланде сай озам вучен шуктен.
Мландым кужу жаплан арендыш оформитлыме деч ончыч тӱрлӧ йӧным ончымо. Тымбай сельсовет СП-н мландешыже чарненыт. Мланде участкым ойырымо годым тӱҥалше предприниматель ончыкылык бизнесшым кузе вияҥдаш шонымо деч шоген.
Кызыт гына почылтшо озанлыклан обрабатыватлыме мланде изи огыл. Тенийсе уржа-сорла годым КФХ-лан 590 гектарыште шурным погыман. Ончыкыжым курал-ӱдымӧ мландым кумдаҥдаш шона. Рапсым, горчицым да пурсам ӱдаш ямдылалтеш.
- Крестьян-фермер озанлыкын пасужо Кугу Соказа ден Тымбай сельсовет-влак ушнымо чек гыч тӱҥалеш, - ойла управляющий Вил Михайлов. - Корно воктене, посадке радам дене «Кинельская юбилейная» элитный урлык шыдаҥым ӱдымӧ. Озанлыкыште икияш шыдаҥ 200 гектарым айла. Йытын, кокияш «Памяти Кунакбаева» уржа да вика 190 гектарыште сайын кушкыныт. Химпрополкым жапыштыже эртаренна.
Ончыкылык урожайлан такыр пасум куралаш тӱҥалынна. Кокияш культурым 300 утла гектарыште ӱдаш шонена. Тыгак пасушто кушшо пушеҥгылам пеш шуко куклаш кӱлеш. Чаманаш веле кодеш, чылажат шонымо семын ок шукталт.
Ик кугу проблемылан потрава шотлалтеш.
Ял озанлыкыште производствын тӱҥ средстважлан мланде шотлалтеш. Но пасу улмо гына шагал. Сай результатыш шуаш
специалист-влак, пашаеҥ-влак кўлыт. «Родных Т. Г.» КФХ-ште тидын шотышто проблема уке. Тыште кугу опытан механизатор-влак шукын улыт. Теве Григорий Ильбахтинын ял озанлыкыште паша опытшо нылле ий утла погына. Кумда профилян специалист, тудо каҥашымат пуа, пашам кузе ышташ кӱлмымат ончыкта. Тудлан КФХ-ште пашам
тӱҥалаш темлымеке, кумылын келшен. Георгий Николаевич вигак МТЗ-12.21 трактор рульым кучен. Шошым вӱдыжгым петырымаште тыршен, тырмален, тыгак кылмаш куралме пасум культивироватлен, химпрополкым эртарен.
Тыгак механизатор-влак Виталий Ярмингинын, Филюс Миндияровын, Александр Алкаевын, механик Вадим Князевын пашашт аклаш лийдыме.
- Мый шкеже Раевка ял гыч улам. Ешем дене Бирскыште илем. Тымбайыш пашаш коштам, - ойла Вадим Витальевич. - Мишканыште СПТУ-м тунем пытаренам, трактористын удостоверенийжым налынам. Ленин лӱмеш колхозыш пашаш пурышым, ачам дене пырля комбайн дене пашам ыштенам. Профессиемлан ӱшанле улам. КФХ-ште механиклан ыштем, кӱлеш годым тракторыш шинчам. Озанлыкыште паша кид кӱлеш. Тачысе кечылан пашаеҥ-влак шурно склад-влакым олмыктат, кӱвароҥам бетонироватлен пытареныт.
Озанлыкыште пашам сайын намияш технический йєн лийшаш. КФХ-н машина-трактор паркше кугу огыл. Кодший МТЗ-12.21 ден Т-150 трактор-влакым, тений СКП-2,1 х 3 (Омичка) сеялкым налынна. Тиде кечылаште комбайным кондышаш улыт. Шурным погымаште проблема лийшаш огыл, лач игече гына келшыше лийже. Мутат уке, кызытеш результат нерген ойлаш ондакырак. Тенийсе ий могай лектышым пуа, шыжым рашемеш. Эн тӱҥжӧ, Тимофей Родных ӱшана, пашам кумылын ыштет гын, чыла сай лиеш.
Ял озанлык отдел.