Келшымаш
+25 °С
Раш
Все новости
Тӱрлӧ
15 Шыжа 2021, 11:00

Паша куаным конда

Мишкан почтамтын почтальонжо Татьяна Янсубаева шке пашажым йӧрата

Паша куаным конда
Паша куаным конда

Кызыт илышышке Интернет чот шыҥен гынат, почта услуга ожнысо гаяк калык коклаште кугу йодмаш дене пайдалана. Еҥ-влак ончычсо гаяк серышым возат, посылкым колтылыт, газет ден журнал-влакым налыт. 9 октябрь - Почтын тўнямбал кечыже. Тиде кечын почта пашаеҥ-влак шке профессиональный пайремыштым палемдат.
Мишкан почтамтыште паша шуко: пурышо чыла корреспонденцийым налаш, ойыркалаш, адрес почеш намиен шукташ. А вет тыште газет ден журнал-влак гына огытыл. Райрўдыштӧ да лишыл яллаште илыше-влак посылкым, бандерольым налыт, туллан, газлан, телефонлан, коммунальный услугылан тўлат, подпискым ыштат. Тиддеч посна почта отделений пеш шуко сатум калыклан темла. Пытартыш жапыште почтын калыклан ончыктымо услугыжо кумдарген. Тышке уведомленийым оформитлаш толыт, вкладым почыт, мобильный телефон оператор-влак деке ушалтыт, Интернет дене пайдаланат. А тора ялласе почтальон-влак квитанцийлам налыт, кочкыш сатум нумалыт. Почта банк пашам ышта.
Мишкан почтамтыште Рая Ерыгина 31 ий начальник лийын ышта. Изи, икоян коллективыште чылан икте-весылан полшат. Пашам сайын ыштен, коллектив подпискым ыштыме шотышто планым эре темаш тырша. Моло услуга денат почеш огеш код. Кеч-могай почта связь отделенийыште ик эн кугу верым почтальон-влак налын шогат. Кугу олалаште почтальонын пашаже пешыжак шинчалан ок кой, а яллаште тудо вашталташ лийдыме еҥ улеш.
Эн кугу нелылыкше нунын вачўмбакышт возеш. Почтым ойыркалыме деч вара неле сумкам вачўмбаке сакен, тудо шке участкышкыже ошкылеш, сурт гыч суртыш коштеш. Кеч-могай игечыште, идалыкын кеч-могай жапыштыже тудо кажне кечын лу километр дене йолын коштеш, кажне адресат деке корреспонденцийым жапыштыже намиен шукташ тырша. Мишкан почта связь отделенийыште вич почтальон пашам ышта. Нунын коклаште Ирина Шаяхметова, Элита Саркиева да Татьяна Янсубаева эн кужу жап ыштат. Кажне еҥ шкаланже келшыше пашам иканаште муын ок керт. Татьяна Анатольевнат изиж годым тыгай паша нерген шонен огыл.
Тудо Ленинский ялыште шочын. Пўрє оласе кооперативный училище деч вара «Мишкан» совхозын Ленинский отделенийыштыже повар лийын. Варажым тудо Свердловский областьыште больницыште санитаркылан ыштен. Шочмо кундемышкыже пєртылмеке, пўрымаш тудым почтыш конден.
- Йочам ончымо деч вара декрет отпуск гыч лекмеке, пашам кычалаш тўҥальым, почтальон кўлеш манме увертарымашым ужмеке, тушко мийышым, - манеш Татьяна Янсубаева. - Тыге 2014 ий гыч тыште ыштем. Эр кандаше гыч кас вич шагат марте ыштена. Рушарня да шочмо - каныш кече-влак. Кызыт лум уке, сандене велосипед дене коштам. Пашадар изи, но стаж кўлеш. Чыла ўшан пелашлан гына. Тудо Йўдвел кундемыште пашам ышта. Ме кок ўдырым - Ангелина ден Валентинам куштена.
Татьяна Анатольевнан паша маршрутышкыжо 20 урем пура. Тиде - Ленин, Советский, Инякский, Спортивный, Красноармейский, Яныш Ялкайн, Энергетик-влак, Муса Джалиль, Солнечный, Пионерский, Ирсаевский, Тракторный, Семилетний, Совхозный, Урожайный, Майский, Самойлов, Фаузи Гарипов, Шаехзада Бабич.
- Мемнан Таня пеш поро айдеме, моткоч ответственный, чурийыштыже эре кечыйол волгалтеш, кажне еҥ деке корреспонденцийым жапыштыже намиен шукта, - пенсионер-влак тудын нерген порым гына ойлат. Вет лач нуно йӧратыме почтальонышт нерген газетыш возаш йодыныт.
Татьяна Янсубаеван мутшо почеш, пенсионер-влак эн чот лудаш йӧратыше еҥ улыт. Нуно тўрлӧ увер-аҥарым Интернет гыч огыл, а газет гоч пален налаш тыршат. Утларакшым тазалык, сад пакча нерген газет-влакым налыт. Мутат уке, «Дружба» да «Келшымаш» газет-влак кажне гаяк суртыш мият.
Светлана ТОЙМУРЗИНА.

Паша куаным конда
Паша куаным конда
Автор:Светлана Тоймурзина