Келшымаш
+2 °С
Йӱр
Все новости
Тӱрлӧ
8 Шыжа , 10:32

ППМИ программа калыклан полша

Шукерте огыл Эшым ялыште уремым тўзатыме

Тиде ялыште ППМИ программа полшымо дене ял уремым тўзаташ лийыныт. Вет шошым да шыжым Эшым урем коштын кертдымашлык лийын. Ондак ялыште калык погынымашым эртарыме, тушто мом ыштышашым кутырен келшыме. Вара инициативный группым сайлыме, кўлеш документ-влакым погымо. Паша чулымын шукталтын. Калык тыршыме дене проект сеҥышыш лектын. Тидлан ятыр вере єрыныт, но эшым-влак тыгак лийшашлан ўшаненыт да чын лийыныт.
ППМИ проектын верысе кураторжо, Мишкан район МР администраций вуйлатышын заместительже З. Шамсутдинова ял калыклан каҥаш денат, паша денат полшен. Спонсор-влакат лектыныт. Ял калык гын оксамат поген, подрядчик-влакымат муын. Эшым-влак шкат шке техникышт дене пашашке ушненыт. Тораште огыл карьерымат муыныт. Кўчык жапыште ял урем палыдымын вашталтын – ынде тушто лавыраш пижаш лўдде кошташ лиеш.

Суапле пашам шуктымо дене Эшым ял калыкым проектын верысе кураторжо З. Шамсутдинова ден Ардаш сельсовет СП администраций вуйлатыше А. Ильтубаев
саламленыт. Суапле пашаште ойыртемалтше-влакым Чап грамота дене палемдыме.
Суапле пашам шуктымаш Эшым калыкым вес ият ППМИ полшымо дене могай-гынат пашам шукташ кумылаҥден. Ме ўшанена – нуно вес ият конкурсышто сеҥат да ялыштым тўзатыме пашам умбакыже шуят. Эшым ял гыч ме Тӧҥгакыш кайышна. Тиде ялыштат калык, пошкудо ял калыкым ончен, вес ийлан ППМИ программышке ушнаш кумылаҥын.
Вениамин КОНДОГИН.

Автор:Вениамин Кондогин