Ветеран-влак чонышт дене огыт шоҥгем

2021 ий сентябрьыште отчетно-сайлыме погынымаш эртен, тушто советын у составшым сайлыме. Икмыняр тўҥалтыш организацийыште председатель вашталтын.
Тиде ийыште ветеран-влакын ятыр оҥай шонымашышт-влак лийыныт, но, чаманаш веле кодеш, ынде кокымшо ий мемнан пашанам тичмаш куат дене шукташ пандемий чаракым ышта. Палемдыме ятыр мероприятий шукталтде кодын, вет шуко еҥ погыныман мероприятий-влак чаралтыныт. Тидын годымак палемдыде ок лий, паша намиялтеш, тўҥалтыш организаций-влакын председательышт (районышто 42 тўҥалтыш ветеран организаций уло) ветеран-влак дене вашлийыт, кертмышт семын кугурак мероприятийлаште участвоватлат.
Совет калыкын Кугу Отечественный сарыште сеҥымыжлан 76 ий теммым палемдаш ямдылалтме кышкарыште райсовет президиумын членже-влак, тўҥалтыш ветеран организаций-влакын председательышт Кугу Отечественный сарын ветеранже-влак дене вашлийыныт, лўддымылык уроклаште участвоватленыт.
2021 ий мартыште мемнан республикыште «О детях войны в Республике Башкортостан» закон лектын. Тудо социальный полышым палемден да 1927 ий 22 июнь гыч 1945 ий 3 сентябрь коклаште шочшо да Башкортостан Республикыште илыше-влаклан тудым пуымо радамым рашемден.
Мемнан районышто 1020 еҥ тыгай удостоверенийым налын. Районысо ветарен-влак совет, тўҥалтыш ветеран организаций-влак тиде пашаште чолган участвоватленыт. Муниципальный власть орган-влак дене пырля документ-влакым ямдыленыт, удостоверений-влакым кучыктеныт, сар жапысе йоча-влак дене вашлийыныт.
Апрельыште ветеран-влак районный совет президиумын расширенный заседанийже эртен, тушко тўҥалтыш ветеран организаций-влакын председательыштым ўжмӧ. Тушто «Ветеранское подворье - 2021» смотр-конкурсым увертарыме.
Тиде конкурсышто Кўрзе, Ардаш, Кугу Соказа, Монар, Ирсай, Новотроицкий да Чорай сельсоветласе илалше еҥ-влак чолган участвоватленыт.
10 да 11 августышто конкурсный комиссийын членже-влак конкурсышто участвоватлаш йодмашым возышо-влакын суртышкышт лектын коштыныт. Конкурсын итогшо Илалше кече-влак лўмеш эртаралтше концертыште ышталтеш. Тудо РДК-ште 1 октябрьыште эрта.
Чаманаш веле кодеш, ветеран-влак пандемийлан кєра шонымышт семын спортивный мероприятийлаште участвоватлен огыт керт. Но яндар южышто эртыше мероприятийлаште уло кумылын участвоватлат. Мутлан, «Скандинав йєн дене коштмо кече», «Физкультурникын кечыже», «Куржталме кече» да молат.
Шкет илыше пенсионер-влак деке лектын коштына, юбиляр-влакым саламлена.
- Кызытсе неле саманыште мыланна кугу полышым волонтер-влак да «Самырык гвардийын» чолга еҥже-влак ончыктат. Полышым ончыктымо кеч-могай йодышымат нуно шке ўмбакышт налыт да пеш сайын шуктат. Кажне ийын Илалше еҥ-влакын кечышт вашеш районышто «Шарнена, аклена!» акций эрта. Тиде акций кышкарыште Кугу Отечественный сарын ветеранже-влакым да шкет илыше пенсионер-влакым саламлена. Самырык тукым Кугу Отечественный сарын геройжо Егор Орсаевын ўдыржым - Салима Егоровнам пагала да тудлан эре полышым ончыктен шога, - ойла ветеран-влак районный советын председательже Юлия Григорьевна Балахнина.
Апрельыште район администраций вуйлатыше П. Трапезников ветеран-влакын, инвалид-влакын, сарын участникше-влакын, тылыште тыршыше-влакын, сар жапысе йоча-влакын проблемышт шотышто граждан-влакым приниматлен. Палемден кодаш кўлеш, Павел Владимирович ветеран-влакын чолга е‰ышт-влак дене чўчкыдын вашлиймаш-влакым эртара, нунын проблемыштым эре шинчаончылныжо куча.
Октябрьыште VIII республиканский отчетно-сайлыме конференций эрта, тудын лектышыже почеш декабрьыште мемнан районысо ветеран-влак шке пленумыштым эртарат. Тушто конференцийын лукмо пунчалже-влакым каҥашат, шушаш ийлан паша планым ямдылат.
- Ме умылена, Российыште эпидемиологический ситуаций пеш неле. Коронавирус дене колышо-влакын чотышт кажне кечын шукемеш. Тиде осал черым чактарашлан ик йӧн гына уло - прививкым ышташ. Лач тыге гына ме шкенам да лишыл еҥна-влакым арален кертына.
Пенсионер-влакым, пашан ветеранже-влакым Илалше-влакын кечышт дене шокшын саламлем. Мыланна чылалан да лишыл еҥна-влаклан тазалыкым тыланем, - манеш Юлия Григорьевна.
Венера АГЛЯМОВА.