Броня деч пеҥгыдырак ушем

Танкист кече Российыште сентябрьын кокымшо рушарняштыже палемдалтеш. Тиде пайремым танковый войскаште служитлыше-влак уже 75 ий палемдат.
Тений пайрем кече 12 сентябрьлан логалын. Танкист кечылан лўмлалтше мероприятий Мишкан селасе военный комиссариат пеленсе аллейыште эртен – танкист-влаклан шарнымаш знак лач тушто вераҥдалтын.
Мероприятий тўҥалтыште погынышо-влак ончылно Мишкан да Бурай районласе военный комиссар С. Васильев выступатлен. Сергей Шуматович палемден: Танкист кече Кугу Отечественный сар деч вара механизированный да бронетанковый войска-влакын Сеҥымашлан кугу надырым пыштымыштлан кєра пурталтын.
Тений тиде событийлан 75 ий темын. Кызытсе саманыште танковый войска-влак палын вашталтыныт. Техника автоматизироватлалтеш, туран лўйкалаш полшышо у система-влак шоналтыт, технологический вашталтыш-влак пурталтыт. Икманаш, кызытсе техника Кугу Отечественный сар годсо дечын палын ойыртемалтеш, тудын полшымо дене кечывалымат, йўдымат, кеч-могай игечыште тўрлє тактический задачым шукташ лиеш. Но техника кеч-кунамат техника веле, танковый войскан тўҥ поянлыкше да рўдыжӧ – чолга да чулым, шке пашаштым сайын палыше, икте-весе верч вуйын шогышо, лўддымӧ да пеҥгыде койышан танкист-влак. Мом манаш? Танкист-влак ушем (браство) танк броня дечат пеҥгыдырак.
Мероприятийыште икмыняр еҥым палемдыме. Торжественный обстановкышто Николай Мурзабаевын оҥешыже «Ветеран танковых войск» медальым пижыктыме, Валентин Шамыкаев ден Артур Матвеев танковый войскаште сайын служитлымылан оҥеш пижыктыме знак дене палемдалтыныт.
Светлана ТОЙМУРЗИНА.