Келшымаш
+1 °С
Лум
Все новости
Тӱрлӧ
17 Сентябрьыште 2021, 10:49

Илышым йӧратыше ўдырамаш

5 сентябрьыште тылын пашаеҥже,шуко икшыван ава О. Ильтугановалан 90 ий темын

Илышым йӧратыше ўдырамаш
Илышым йӧратыше ўдырамаш

Мунло еҥ курым утла ила... Кужу ўмыран еҥ-влак нерген калык коклаште тыге ойлат. Районысо кужу ўмыран еҥ-влаклан Россий Президент лўм дене салам серыш-влак толыт. Шукерте огыл тыгай серышым Мишкан селаште илыше Орина Ильтугановалан кучыктымо.
Тиде кечын 90 ийым темыше ўдырамашым саламлаш Рустам Адгатович ден Юлия Григорьевна миеныт. Нуно Орина Ильтугановналан пашам кужу жап тыршен ыштымыжлан тау мутым ойленыт, пеҥгыде тазалыкым, суапым да пиалан, эшеат кужурак илышым тыланеныт.
Юбилейже кечын Орина Ильтугановнам моло еҥ-влакат шокшын саламленыт. Нунын коклаште родо-шочшыжо-влакат, йолташыже-влакат лийыныт.
Ӱдырамаш Мишкан селаште шочын-кушкын, ўмыржӧ мучко йоча-влак дене пашам ыштен. Ондак Мишкан селасе йоча пӧртыштӧ тыршен. Пенсийыш лекмыж деч ончыч Мишкан кандашияш школышто туныктен. Орина Ильтугановна ятыр йочалан кокымшо ава лийын да ятыр классым туныктен луктын.
Марийже Эплай Изиляевич дене коктын кум икшывым ончен куштеныт. Кызыт кувавам 7 уныкаже да 13 кугезе уныкаже куандарат.
90 ий – мунло жап. Илалше еҥ илышым сайын умыла да кажне татшым аклен мошта. Тек кугу ийгот Ольга Ильтугановнам изишат огеш ойгатаре, а куан ден суапым гына пуэн шога.
Светлана ТОЙМУРЗИНА.

Илышым йӧратыше ўдырамаш
Илышым йӧратыше ўдырамаш
Автор:Светлана Тоймурзина