Эн сай доброволец

Районышто пожарым йӧртымӧ да моло техногенный чрезвычайный ситуацийым кораҥдымаште шке кумылын полышкалыше-влак (доброволец-влак) эре ешаралт шогат.
- Муниципалитетыште пожарный дружинылаште чылаже 164 доброволец тырша, - манеш профессиональный пожарный частьын вуйлатышыже С. Вялов. - Нунын коклаште Мишкан сельсоветын добровольный пожарный командыже уло. Поселенийын доброволецше-влак шкеныштым тул ваштареш кучедалше уста специалист
семын ончыктат. Иктаж вере «йошкар агытан» вуйжым нӧлталеш гын, нуно тудын ваштареш талын шогалыт да моло кумдыкыш шарлашыже эрыкым огыт пу. Шукерте огыл Мишкан СП-н пожарный командын ик членже А. Шамиданов Россий чрезвычайный ситуаций министерствын Почетный грамотыж дене палемдалтын. Тиде Почетный грамотыжым В. Зиничев подписатлен.
Чаманаш веле кодеш, Россий МЧС-ын вуйлатышыже шукерте огыл служебный долгым шуктышыла трагически колен. Сандене Алексей Шамидановлан тиде грамот поснак шергакан улеш.
Вениамин КОНДОГИН.