«Порылык автобус» Мишканыш толын

Тудо районысо волонтерский штабын членже-влак дене да волонтер-влак дене вашлийын. Ильшат Нафикович погынышо-влаклан Башкортостан Республикысе волонтер-влакын пашашт нерген ойлен, ты пашан тўҥ корныж дене палдарен. Районысо волонтерский штаблан пашам сайын ыштымыжлан таум ойлен.
Мишкан районысо волонтер-влакын кураторыштлан самырык-влакын пашашт шотышто тўҥ специалист Ольга Биктубаева шотлалтеш. Тудо толшо уна-влаклан районышто волонтер-влакын пашашт нерген отчетым ыштен, пандемий жапыште шуктымо паша-влак нерген ойлен. Палемден кодаш кўлеш, районышто волонтер
паша сай шындалтын. Тачысе кечылан Мишкан агропромышленный колледж гыч, районысо школла гыч да чолга моло самырк еҥ гыч 2300 утла волонтер пашам сайын ышта.
- Рвезе-влак таза илыш-йўлам пропагандироватлат. Нуно тематический буклетым ямдылат, районный мероприятий-влакым эртарат, йоча-влаклан модыш-влакым организоватлат, - каласен Ольга Петровна. - «Ме пырля» районный движенийын тўҥ корныжлан таза илыш йўлам пропагандироватлымаш да чолга илыш
позицийым кучымаш шотлалтыт. Тыгак тимур паша шукталтеш. Кугу Отечественный сарын кажне ветеранже деке волонтер-влак пегыдемдалтыныт.
Нуно шке шоҥгыеҥыштлан тўрлӧ пашам шукташ полшат, пайрем-влак дене саламлат. Самырык-влакын самырык-влаклан эртарыме мероприятий-влак
патриотический шўлышан улыт, пеҥгыде да таза ешым аралымыашке, нравственно-патриотический воспитатлымымашке виктаралтыныт.
Муниципалитетын волонтерский штабшылан Ильшат Бикунин индивидуально аралалтме средствам конден.
Тиде кечын республикысе волонтер-влак тыгак Благовещенск да Караидель районласе волонтер-влак дене вашлийыныт.
Светлана ТОЙМУРЗИНА.